Machato a Tlotlisang Jehova

Sehlooho se latelang tabeng ea machato a Bakreste ha e le hantle se ile sa hlophisoa Ethiopia bakeng sa ho fana ka tataiso e molemo ka puo ea Seamharike bakeng sa ba bangata naheng eo bao e sa tsoa ba Lipaki tsa Jehova. Se tšohla meetlo ea moo le litloaelo tseo e ka ’nang eaba li fapane le tsa moo u lulang teng. Mohlomong u tla fumana phapang eo e thahasellisa haholo. Leha ho le joalo, sehlooho sena se fana ka keletso e leka-lekaneng ea Bibele eo u tla hlokomela hore e loketse esita le haeba meetlo ea machato e fapane sebakeng sa heno.

“MACHATO a Thabisang a Bokreste” e ne e le sehlooho sa taba e ithutoang ho Molula-Qhooa oa October 15, 1984. Sehlooho se latelang tokollong eo se ne se re, “Ho Fumana Thabo e Leka-lekaneng Meketeng ea Machato.” (Bakeng sa leha e le ofe ea nahanang ka ho kena lenyalong, ho na le keletso e eketsehileng e bohlale libukeng Ho Etsa Bophelo ba Lelapa la Hao bo Thabileng, khaolong ea 2, le Bocha ba Hao—Ho Fumana se Molemohali ho Bona, khaolong ea 19 le 20.)a Ba bangata e bile Lipaki tsa Jehova ka mor’a hore lihlooho tseo li be teng, kahoo, re batla ho boela re hlahloba lintlha tseo ka ho khetheha li lokelang sebaka sa rōna, hammoho le lintlha tse ling tse tšoanelehang tse tla re thusa ho etsa mekete ea machato e tlotlisang Jehova, Moqapi oa lenyalo.

Potso ea pele e ka nahanoang ke e reng, Ho lokela hore ho chatoe neng? Na letsatsi le lokela ho laoloa ke linako tsa neano tsa sebaka seo tsa machato? Tumelo ea moo ke hore lenyalo leha e le lefe le bang teng nakong e ’ngoe esele ea selemo le ke ke la atleha. Ena ke tumela-khoela e se nang motheo, hobane banyalani ba bangata ba thabileng le ba momahaneng ho sebeletseng Jehova hase ba nyalaneng nakong ea neano. Ha re lumele lehlohonolong kapa bomalimabeng. (Esaia 65:11; Bakolose 2:8) Re ke ke ra thusa beng ka rōna ba sa lumelang ho bona phapang lipakeng tsa ’nete le bohata haeba re khetha letsatsi la lechato ho latela litumela-khoela tsa bona. Taba ke hore Bakreste ba ka nyalana khoeling leha e le efe.

Ha ho lokisetsoa puo ea lechato ka mor’a ho tiisa lenyalo ka molao, e ka ba bohlale ho se lumelle hore ho fete matsatsi a mangata lipakeng tsa liketsahalo tsena tse peli. Haeba banyalani ba tla rata ho tšoarela puo ea lechato Holong ea ’Muso, ba lokela ho atamela baholo ba phutheho nako e telele pele bakeng sa ho kōpa ho sebelisa holo. Baholo ba moo ba tla etsa bonnete ba hore litokisetso tsa mokete li tla ba siea le matsoalo a hloekileng. Nako e lokela ho behoa ka mokhoa o ke keng oa thulana le tšebeletso leha e le efe ea phutheho. Mor’abo rōna ea khethiloeng bakeng sa ho fana ka puo ea lechato o tla kopana le bao e tla ba monyali le monyaluoa pejana bakeng sa ho fana ka keletso e molemo le ho tiisa hore ha ho na lithibelo tsa boitšoaro kapa tsa molao lenyalong leo le hore o lumellana le merero leha e le efe ea ’moka oa boithabiso o tla latela ka mor’a moo. Puo ea lechato e lokela ho ba bolelele ba halofo ea hora ’me e fanoe ka tsela e hlomphehang, e hatise litšoaneleho tsa moea. Ka sebele, puo ea lechato e bohlokoa ho feta mokete leha e le ofe o ka latelang ka mor’a moo.

Lechato la Bokreste ke monyetla o motle oa ho bontša hore ha re “karolo ea lefatše.” (Johanne 17:14; Jakobo 1:27) Ho hlophiseha ha rōna ho lokela ho bonahala. Sena se bolela hore re tla boloka nako ho e-na le ho etsa hore batho ba re letele, mohlomong re bile re kena-kenana le litšebeletso tsa phutheho. Sena ke se lokelang ho hlokomeloa ka ho khetheha ke monyaluoa, kaha beng ka eena ba lefatše ba ka ’na ba mo phehella hore a be morao nakong—joalokaha eka ho totobatsoa bohlokoa ba hae. Ka ho boloka nako, morali’abo rōna ea hōlileng tsebong oa Mokreste a ka bontša hore litšoaneleho tsa hae tsa moea tse kang boikokobetso le ho nahanela ke tsa bohlokoa ho eena! Hape, ha ho menngoe ralifoto bakeng sa ho nka ketsahalo ena lifoto, tlhophiso ke ea bohlokoa. Re tla etsa hantle ha re kōpa hore ralifoto a tle a apere baki le borikhoe bo tšoanelang boemo, a fasitse thae, le hore a se kena-kenane le puo ha a nka litšoantšo. Ha ho litšoantšo tse lokelang ho nkoa nakong ea thapelo. Ho hlophiseha ha rōna ho tla tlotlisa Jehova ’me ho fane ka bopaki bo botle. Ha ho hlokahale hore ho lekoe ho tsamaisa lintho kamoo lefatše le etsang kateng, ho ka pupetsang bohlokoa ba sebele ba ketsahalo ena.

Mokete hase tlamo bakeng sa lechato le atlehileng, empa ha ho na thibelo ea Mangolo bakeng sa ketsahalo e joalo e thabisang. Leha ho le joalo, ’moka o joalo oa Bakreste ba ’nete o lokela ho fapana le mekete ea lefatše e bonahalang ka ho etsa lintho ho tlōlisa, ho noa haholo, ho ja ho tlōla, ’mino o hlaha, motjeko o litšila esita le lintoa. Bibele e beha “mekete e lerata” tlas’a mesebetsi ea nama. (Bagalata 5:21) Ho bonolo haholoanyane ho ba le taolo e loketseng ha e se ’moka o moholo haholo. Ha ho hlokahale hore ho hlongoe tente bakeng sa ho khotsofatsa tloaelo e atileng. Haeba ho na le ba ka etsang qeto ea ho sebelisa tente bakeng sa sebaka kapa boemo ba leholimo, eo ke taba ea botho.

Phihlelo e bontšitse hore tsela e molemo ea ho lekanyetsa palo ea baeti ke ea ho sebelisa limemo tse tobileng tse ngotsoeng. Ho molemo haholo ho mema batho ka bomong ho e-na le liphutheho, ’me joaloka Bakreste ba hlophisehileng, re lokela ho hlonepha litekanyetso tse joalo. Limemo tse ngotsoeng li boetse li thusa ho qoba masoabi a ho ba teng ha motho ea khaotsoeng moketeng, hoba ha seo se ka etsahala, bara le barali babo rōna ba bangata ba ka ’na ba khetha ho tsamaea. (1 Bakorinthe 5:9-11) Haeba banyalani ba mema beng ka bona ba sa lumelang kapa metsoalle, ntle ho tikatiko bana e tla ba ba lekanyelitsoeng, ba lebisa tlhokomelo haholo ho bao “ba amanang le rōna tumelong.” (Bagalata 6:10) Ba bang ba khethile ho memela metsoalle ea bona ea lefatše kapa beng ka bona ba sa lumelang puong ea lechato ho e-na le moketeng. Hobane’ng? Ka sebele, ho bile le maemo ao ho ’ona beng ka motho ba lefatše ba ileng ba etsa ho soabisang moketeng oa lechato hoo bara le barali babo rōna ba bangata ba ileng ba ikutloa hore ba ke ke ba lula. Banyalani ba bang ba lokiselitse hore ba be le lijo tse nyenyane tsa motšehare le litho tse haufi tsa lelapa le metsoalle ea Bakreste.

Tumellanong le Johanne 2:8, 9, ho molemo ho khetha “motsamaisi oa mokete.” Monyali o tla batla ho khetha Mokreste ea ka tšeptjoang ea tla hlokomela hore ho ba le tlhophiso le litekanyetso tse phahameng. Ha metsoalle e tlisa limpho, sena se lokela ho etsoa ntle ho “pontšo ea mponeng.” (1 Johanne 2:16) ’Mino o ka ba monate ntle le ho silafatsoa ke mantsoe a belaetsang, lerata le feteletseng kapa morethetho o hlaha. Ba bangata ba ho fumane ho le bohlale hore moholo a mamele ’mino o tla letsoa esale pele. Motjeko o ka fetoha leraba, joalokaha metjeko e mengata ea setso e tsoa metjekong ea kemolo ’me e bontša boitšoaro ba ho khotsofatsa litakatso tsa botona le botšehali. “Nako ea ho seha kuku le ea champagne” ka linako tse ling e ’nile ea e-ba ketsahalo ea ho fetella ha batho ba lefatše boitšoarong. Ha e le hantle, banyalani ba bangata ba Bakreste ba entse qeto ea hore ho se be le joala leha e le bofe meketeng ea bona ea lechato, kahoo ba qoba mathata.

Kaha re batla ho tlotlisa Jehova, re tla qoba pontšo ea mponeng e ka lebisang tlhokomelo e feteletseng ho rōna. Esita le lingoliloeng tsa lefatše li ’nile tsa bua khahlanong le moea o atileng oa ho feteletsa lintho. E ka ba booatla bo bokaakang hore banyalani ba kene sekolotong hobane ba batla lechato le majabajaba ’me hamorao ba lahleheloe ka lilemo tse ngata e le moo ba lefang litšenyehelo tsa letsatsi leo le le leng! Ke ’nete hore seaparo leha e le sefe se aparoang ketsahalong ena e lokela ho ba se itekanetseng le se hlophehileng hantle, se tšoanelang motho ea ipolelang hore o hlompha Molimo. (1 Timothea 2:9, 10) Sehlooho se reng “Machato a Bokreste a Tšoanetse ho Bonahatsa Kelello” (Molula-Qhooa oa December 15, 1974) se ile sa fana ka tlhaloso ena e thahasellisang ka liaparo:

“Lechato la motho ke ketsahalo e khethehileng, kahoo, hangata tlhokomelo e lebisoa ho shebahaleng ha hae a thabile ’me a boheha. Leha ho le joalo, sena ha se bolele hore motho o lokela ho apara mose oa mofuta o itseng kapa sutu. Motho o etsa hantle ho nahanela mekhoa ea moo a lulang teng, litšenyehelo le litšekamelo tsa botho. . . . Leha ho le joalo, na e ne e ka ba ho utloahalang ho reka liaparo tsa theko e phahameng hoo bona ka bobona kapa ba bang ba ka imeloang licheleteng? . . . Banyaluoa ba bang ba thabetse ho sebelisa mose oa motsoalle oa bona ea ratehang kapa oa mong ka bona. Ba bang ba khotsofalitsoe haholo ke ho iketsetsa mose oa monyaluoa, mohlomong ka tsela eo, ba khona ho ba le seaparo se ka sebelisoang liketsahalong tse ling nakong e tlang. ’Me ke ho loketseng haholo bakeng sa banyalani hore ba chate ka liaparo tsa bona tsa kamehla tse ntle ka ho fetisisa . . . Ba bang ba ka ’nang ba khona ho ba le lechato le majabajaba ba ka ’na ba ikhethela ho ba le ‘lechato le sa hlahellang’ ka lebaka la mehla ena e mahlonoko.”

Ka ho tšoanang, ha ho hlokahale kunkung ea baetsana (metsoalle ea monyali le metsoalle ea banana ea monyaluoa). Le bona ba ke ke ba batla ho hulela tlhokomelo e sa hlokahaleng ho bona ka liaparo le liketso tsa bona. Le hoja motho ea khaotsoeng a ka lumelloa ho ba teng puong Holong ea ’Muso, Molula-Qhooa oa October 15, 1984, o itse: “E tla ba ho sa lokang hore har’a baetsana ho be le batho ba khaotsoeng kapa bao mokhoa oa bona oa bophelo o sisimosang, o hananang le melao-motheo ea Bibele.”

Le hoja Jesu a ile a ba teng lechatong, ha re lumele hore o ne a ka lumella tloaelo e atileng ea hore mokoloko oa likoloi o potapote ka toropong ka leratahali; mapolesa a bile a lefisitse baqhobi bakeng sa ho letsa hutara mokolokong oa lechato. (Bona Matheu 22:21.) Ho tsena tsohle, ho e-na le ho etsisa pontšo ea mponeng kapa liketso tse tloaelehileng tsa batho ba lichaba, Bakreste ba bonahatsa bohlale bo teng ho ba inyenyefatsang.—Liproverbia 11:2.

Empa ho thoe’ng ka ho ea machatong a baahisani, basebetsi-’moho le rōna ba lefatše kapa beng ka rōna ba seng haufi-ufi hammoho le metsoalle? Mokreste ka mong o lokela ho iketsetsa qeto ho sena. Ho molemo ho hopola hore nako ea rōna e bohlokoa, kaha re hloka nako bakeng sa tšebeletso ea rōna, thuto ea botho le mesebetsi e meng ea lelapa le ea phutheho. (Baefese 5:15, 16) Mafelo-beke, re na le liboka le tšebeletso ea tšimo eo re sa rateng ho e fosa. (Baheberu 10:24, 25) Linako tsa machato a mangata li thulana le likopano kapa boiteko bo khethehileng ba tšebeletso e tsamaisanang le Sejo sa Shoalane sa Morena. Ha rea lokela ho itumella ho sitisoa ho etsa boiteko bo khethehileng bo tšoanang le bo etsoang ke bara babo rōna lefatšeng ho pota ba ho ba teng Sejong sa Shoalane sa Morena. Pele re e-ba le tsebo ea ’nete, re ile ra qeta nako e ngata le batho ba lefatše, mohlomong maemong a sa hlompheng Molimo. (1 Petrose 4:3, 4) Hona joale lintho tse tlang pele bophelong ba rōna li fapane. Kamehla, hoa khoneha ho lakaletsa banyalani ba lefatše thabo ka ho ba romella karete kapa ho ba etela nakoana ka letsatsi le leng. Ba bang ba ’nile ba sebelisa boemo bo joalo bakeng sa ho paka, ba arolelana mangolo a itseng a tšoanelehang bakeng sa banyalani ba bacha.

Ka sebele, lechato leo ho lona litšobotsi tsa moea li phahametseng mekhoa ea lefatše le tla tlotlisa Jehova. Ka ho etsa bonnete ba hore ba ipoloka ba arohile lefatšeng ka litumela-khoela tsa lona le ho feteletsa ha lona lintho, ka ho se le lumelle hore le kena-kenane le mesebetsi ea kamehla ea puso ea Molimo, le ka ho bonahatsa ho itekanela ho e-na le pontšo ea mponeng, Bakreste ba tla thabela ketsahalo ena. Ho feta moo, ba tla khona ho hopola ketsahalo eo ka letsoalo le letle le ka mehopolo e ratehang. Ka ho bonahatsa bohlale le kahlolo e molemo, e se eka machato a rōna a Bokreste a ka fana ka bopaki ho bashebelli ba lipelo li tšepahalang.

[Mongolo o botlaaseng ba leqephe]

[Setšoantšo se leqepheng la 24, 25]

Bakreste ha ba latele joaloka makhoba moetlo o mong le o mong oa moo ba lulang teng oa lechato