Baboleli ba ’Muso Baa Tlaleha

Ho Hlakoloa Nyeliso Lebitsong la Molimo

LENTSOE la Molimo, Bibele, le re: “Bolokang boitšoaro ba lōna bo le botle har’a lichaba, e le hore, nthong eo ho eona li le buang hampe joaloka baetsi ba bobe, ka lebaka la mesebetsi ea lōna e metle eo tsona e leng lipaki tsa eona tse boneng ka mahlo li ka tlotlisa Molimo letsatsing la ho hlahloba ha hae.” (1 Petrose 2:12) Ka lebaka leo, Bakreste ba ’nete ba leka ka matla ho itšoara hantle e le hore ba ka qoba ho tlisa nyeliso lebitsong la Jehova.

Sebakeng se hōle sa Zambia se bitsoang Senanga, mosuoe oa sekolo o ne a utsoelitsoe seea-le-moea ntlong ea hae. Kaha Lipaki tsa Jehova li ne li ile tsa etsa mosebetsi oa boboleli sebakeng seo, monna eo o ile a li qosa ka bosholu. O ile a tlaleha taba ena sepoleseng, a bolela hore Lipaki li utsoitse seea-le-moea sa hae. Ha a fana ka bopaki ba hore Lipaki li ne li tlile ntlong ea hae, o ile a hlahisa pampitšana eo a neng a e fumane fatše. Leha ho le joalo, sepolesa ha sea ka sa mo lumela. Se ile sa mo eletsa hore a tsamaee le hore a etse lipatlisiso tse eketsehileng le tse feletseng.

Sehlopha sa baholo se ile sa khothalletsa Lipaki tse neng li sebetsa sebakeng seo mosuoe eo a lulang ho sona letsatsing leo hore li ee ’me li buisane le eena ka taba eo. Ba bang ba barab’abo rōna ba ile ba ea ’me ba buisana le eena, ba hlalosa hore ba batla ho hlakola nyeliso lebitsong la Jehova. Nakong ea puisano ea bona, ba ile ba mo hlalosetsa hore ba kopane le mohlankana e mong ntlong ea hae ’me ba mo fa pampitšana. Ho ea kamoo ba ileng ba mo hlalosa kateng, mosuoe o ile a tseba monna eo. Ha e le hantle, e ne e le ba kereke e tšoanang. Mosuoe o ile a bua le mohlankana eo, empa o ile a latola liqoso tseo. Joale mosuoe o ile a buisana le batsoali ba mohlankana enoa ka taba eo ’me a khutlela hae. Pele hora e fela, ’mè oa mohlankana enoa o ile a khutlisa seea-le-moea se utsoitsoeng.

A susumelitsoe ke ho ikoahlaea, mosuoe o ile a iteanya le sehlopha sa baholo ’me a kōpa tšoarelo ka lebaka la ho etsa liqoso tsa bohata. Baholo ba ile ba amohela boikoahlao ba hae empa ba kōpa hore liphello li phatlalatsoe e le hore e mong le e mong a ka tseba hore Lipaki li ne li se na molato. Ho ile ha etsoa tsebiso sekolong, ka tsela ena ha hlakoloa nyeliso lebitsong la Jehova. Lipaki tsa Jehova li ka tsoela pele ho etsa mosebetsi oa boboleli ka bolokolohi sebakeng seo.

[Limmapa/Setšoantšo se leqepheng la 19]

(Ha u batla ho bona boitsebiso bo hlophisitsoeng hantle, sheba sengoliloeng)

AFRIKA

Zambia

[Tlhaloso ea Moo Setšoantšo se Nkiloeng Teng]

Mountain High Maps® Copyright © 1997 Digital Wisdom, Inc.