Муҳимияти омӯзиши шахсӣ ва оилавии Китоби Муқаддас!
1. Чӣ тавр Ҳайати Роҳбарикунанда имрӯзҳо нисбати мо ғамхории махсусро зоҳир мекунад ва чаро?
1 Имрӯз низ чун дар асри як, Ҳайати Роҳбарикунанда барои беҳбудии халқи Яҳува хеле ғамхорӣ мекунад (Аъм. 15:6, 28). Мусибати бузург босуръат наздик шуда истодааст, аз ин рӯ ба ҳар як воиз хеле муҳим аст, ки муносибати худро бо Яҳува мустаҳкам гардонад. Чӣ тавр вақтро ки барои китобомӯзиши ҷамъомад ҷудо мекардед истифода хоҳед бурд? Ин вақтро бояд бо аҳли оила барои ибодати Яҳува бахшид. Ба туфайли ин, мо Каломи Худоро боз ҳам чуқуртар таҳқиқ карда, аз ин оби ҳаётбахши ҳақиқат баҳра хоҳем гирифт (Заб. 1:1–3; Рум. 11:33, 34).
2. Чӣ тавр шомеро, ки барои ибодати Худо бо аҳли оила ҷудо кардаем, истифода барем?
2 Шом барои ибодати Худо бо аҳли оила. Сарварони оила дар назди Яҳува ӯҳдадоранд, ки бо оилаашон мунтазам омӯзиши пурмазмуни Китоби Муқаддас гузаронанд (Такр. Ш. 6:6, 7). Масеҳиёне, ки оиладор нестанд, ин вақтро метавонанд барои таҳқиқу омӯзиши шахсӣ истифода баранд. Ба ҳамаи мо хеле муҳим аст, ки барои омӯзишу мулоҳиза кардан «фурсатро ғанимат» донем, то ки барои ба фишори рӯзҳои шарир тоб овардан, рӯҳан бақувват бошем (Эфс. 5:15, 16).
3, 4. Дар интихоби мавод барои омӯзиш чӣ маслиҳат дода мешавад ва чиро бояд ба назар гирифт?
3 Чиро омӯзиш кунем. Агар аз «Индекси адабиёти Бурҷи дидбонӣ» ё «Китобхонаи электронии Бурҷи дидбонӣ» истифода барем, омӯзиши Китоби Муқаддас шавқовар мегардад. Оилаҳо метавонанд аз рӯи мақолаҳои «Бурҷи дидбонӣ», ба мисли рубрикаҳои доимии «Сири хушбахтии оила», «Фарзандонатонро таълим диҳед» ва «Барои хонандагони ҷавон» омӯзиш гузаронанд. Ҳамчунин аз маҷаллаи «Бедор шавед!», рубрикаи «Саволҳои ҷавонон» ва мақолаҳои дигари аҷоиби онро дар бораи мӯъҷизаҳои офариниш метавон омӯхт.
4 Агар Каломи Худоро бо аҳли оила шитоб накарда хонем, принсипу дарсҳои Китоби Муқаддас ба дилу ақли ҳар як аъзои оила нақш хоҳад баст (Ибр. 4:12). Баъзан яке аз филмҳои созмонамонро тамошо ва муҳокима кардан мумкин аст. Чаро барои омӯзиш фикри ҳар як аъзои оиларо ба назар гирифта, аз тарзу мавзӯъҳои гуногун истифода набарем?
5. Чаро имрӯз омӯзиши шахсӣ ва оилавии Китоби Муқаддас дар ҳаёти мо муҳим аст?
5 Чаро имрӯз ин муҳим аст. Рӯҳан қавӣ будан моро омода хоҳад кард, то ки истода бубинем, ки чӣ гуна Яҳува моро наҷот медиҳад (Хур. 14:13). Азбаски мо дар «миёни насли саркаш ва фосид» зиндагӣ дорем, ба волидон барои тарбия кардани фарзандонашон ҳидояти Худо зарур аст (Фил. 2:15). То ин ки дар мактаб фарзандон ба бадахлоқӣ дода нашаванд, ба онҳо кӯмак зарур аст (Мас. 22:3, 6). Ҳамсарон бояд издивоҷи худро чун «риштаи сеқабата» бо Яҳува мустаҳкам гардонанд (Воиз 4:12). Пас биёед, вақти боқимондаро бохирадона истифода бурда, худро бо имони бағоят муқаддас мустаҳкам гардонем (Яҳд. 20).