Аз рӯи брошураи «Хабарҳои нағз» таълим диҳед
1. Брошураи «Хабарҳои нағз» чӣ гуна омода шудааст?
1 Дар «Хизмат ба Салтанати Худо» аз моҳи июл гуфта шуда буд, ки яке аз маводи асосии мо барои таълимдиҳӣ, ин брошураи «Худо барои мо хабарҳои нағз дорад!» мебошад. Дар ин брошура оятҳо чун иқтибос оварда нашудаанд ва ин имкон медиҳад, то худи шахс оятҳоро аз Китоби Муқаддас хонад. Бисёри адабиётамон тавре чоп шудаанд, ки хонанда бе ёрдами касе онро фаҳмида метавонад, лекин ин брошура бошад, тавре омода гардидааст, ки хонанда онро бо касе бояд муҳокима кунад. Бинобар ин ҳангоми пешкаш кардани брошура мо бояд кӯшиш кунем, ки тарзи омӯзиши онро низ нишон диҳем, то соҳибхона бубинад, ки омӯзиши хушхабар аз Каломи Худо то чӣ андоза гуворо аст (Мат. 13:44).
2. Чӣ тавр дар ташрифи аввал брошураи «Хабарҳои нағз»-ро истифода бурдан мумкин аст?
2 Ташрифи аввал. Шумо метавонед чунин гӯед: «Ман назди шумо барои он омадам, ки бисёриҳо дар бораи оянда ғам мехӯранд. Барои ҳамин аз шумо низ пурсидани будам, ба фикратон ягон вақт шароит беҳтар мешуда бошад? [Ба ҷавоб гӯш диҳед.] Дар Каломи Худо дар бораи оянда хабарҳои умедбахш навишта шудаанд. Баъзе саволҳое, ки Китоби Муқаддас ба онҳо ҷавоб медиҳад, инҳоянд». Брошураро ба дасти шахс дода, ба ӯ гӯед ки аз қафои он ягон саволашро интихоб кунад. Сархати аввали дарси интихобшударо муҳокима карда, нишон диҳед, ки омӯзиши Китоби Муқаддас чӣ хел мегузарад. Ё ин ки саволи шавқоварро дар асоси дарси интихобкардаи худ ба соҳибхона диҳед ва сипас нишон диҳед, ки чӣ тавр бо ёрии ин брошура аз Китоби Муқаддас ҷавоб ёфтан мумкин аст. Ғайр аз ин баъзе воизон дар пешниҳодашон видеонавори дар сайти jw.org-бударо, ки ба мавзӯи дарс мувофиқат мекунад, нишон медиҳанд.
3. Фаҳмонед, ки чӣ тавр бо воситаи брошураи «Хабарҳои нағз» омӯзиш гузаронидан мумкин аст?
3 Тарзи гузарондани омӯзиш. 1) Саволи рақамдорро, ки бо ҳарфҳои ғафс чоп шудаанду диққати шахсро ба фикри асосӣ равона мекунанд, хонед. 2) Сипас сархатро хонед. 3) Оятҳои бо хати курсив қайдшударо хонед ва эҳтиромона саволҳо дода, ба шахс кӯмак намоед, то фаҳмад ки чӣ тавр оят ба саволи додашуда ҷавоб медиҳад. 4) Агар ба савол дигар сархат низ дахл дошта бошад, қадамҳои 2-юм ва 3-юмро такрор кунед. Агар ягон видеонаворамон ба саволи муҳокимашуда дахл дошта бошаду шумо ҳоло онро ба шахс нишон надода бошед, пас дар мавриди мувофиқ онро нишон диҳед. 5) Дар охир барои боварӣ ҳосил кардан, ки соҳибхона мавзӯъро хуб фаҳмидааст ё не, аз ӯ хоҳиш кунед, то фикрашро нисбати савол баён кунад.
4. Чӣ ба мо кӯмак мекунад, то аз ин мавод бомаҳорат истифода барем?
4 Бо ин маводи пурарзиш шинос шавед. Дар ҳар мавриди мувофиқ аз он истифода баред. Пеш аз ҳар омӯзиш, дар бораи омӯзанда ва оиди чӣ тавр бо ӯ ба таври беҳтарин оятҳои мавзӯъро муҳокима карда тавонистанатон, фикр кунед (Мас. 15:28; Аъм. 17:2, 3). Бо ба даст овардани таҷриба ва маҳорат, ин брошура барои таълим додани ҳақиқат ба одамон, адабиёти дӯстоштаатон хоҳад шуд.