Hakykaty ýumşaklyk bilen aýdyň

1. Ýehowanyň maşgalasynyň agzasy bolmak üçin näme etmeli?

DOGAN-UÝALAR ilkinji sapar tanyşanlarynda: «Hakykata nädip geldiň?» diýip soraýarlar. Olaryň käbiri: «Men hakykaty çagalygymdan bäri bilýärin» diýip jogap berýärler. Käbiri bolsa: «Men hakykaty ýaňy-ýakynda eşitdim» diýýärler. Biz Ýehowany tanan günümizden bäri, Onuň Sözündäki hakykat boýunça ýaşaýarys. Eger hakykaty söýsek we hakykata görä ýaşasak, Ýehowanyň maşgalasynyň agzasy bolarys. Munuň üçin biz sözde we iş ýüzünde dogruçyl bolmaly (Zeb. 15:1—3).

2. a) Adamlar Isa barada nämäni bilýärdi? b) Adamlar Hudaý hem Isa baradaky hakykata nähili seslendiler?

² Isa pygamber hemişe hakykaty aýdýardy. Hatda duşmanlary onuň hemişe hakykaty aýdýandygyny, adamlara ýaranjaňlyk etmeýändigini aýtdy (Mat. 22:16). Isa pygamber şägirtlerine adamlaryň hakykata nähili seslenjekdigini aýdyp: «Men ogly kakasyndan, gyzy ejesinden, gelni gaýynenesinden aýyrmaga geldim» diýdi (Mat. 10:35). Isa adamlaryň hakykatdan ýüz öwürmegini islemeýärdi, ýöne olaryň gulagyna hoş ýakmajakdygyny bilýärdi (Mat. 23:37). Şol sebäpli ol käbir adamlaryň hakykaty kabul etse-de, käbirleriniň ony ýigrenjekdigine düşünýärdi (2 Sel. 2:9—11).

3. Makalada näme hakda gürrüň ederis?

³ Biz Isa pygamberiň göreldesine eýerip dogruçyl bolmaly. Adamlar halamasa-da, hemişe hakykaty aýtmaly. Aýdýan zatlarymyz adamlaryň göwnüne ýaramasa-da, wagyz etmeli we Mukaddes Kitabyň hakykatlaryny öwretmeli. Ýöne biz hakykaty nädip we haçan aýdýandygymyza üns bermeli. Geliň, ilki bilen, «Ýehowa baradaky hakykaty nireden bilmeli?» diýen soragyň jogabyny bileliň. Soňra hakykaty näme üçin, haçan we nädip aýtmalydygy hakda gürrüň ederis. Şu soraglaryň jogabyny bilsek, adamlara dogrymyzy aýdanymyzda we hoş habary wagyz edenimizde has ýumşak hem-de sypaýy bolarys.

HAKYKATY NIREDEN TAPMALY?

4. Ýehowa näme üçin «hakykatyň Hudaýy» diýilýär?

⁴ Ýehowa hakykatyň Gözbaşy, Onuň aýdýan zatlarynyň barysy dogry. Meselem, Ýehowa nämäniň ýagşydygyny, nämäniň ýamandygyny öwredýär (Zeb. 19:9; 119:142, 151). Onuň aýdan her bir sözi ýerine ýetýär. Ol hemişe sözünde durýar (4 Mus. 23:19; Işa. 55:10, 11). Dogrudanam, Ýehowa hiç haçan ýalan sözlemeýär (Ýew. 6:18). Şonuň üçin hem Oňa «hakykatyň Hudaýy» diýilýär (Zeb. 31:5, çykgyt).

5. «Hakykatyň Hudaýyny» tanamak näme üçin kyn däl? Düşündiriň (Resullar 17:27).

⁵ Köp adamlar: «Hudaý ýok, eger bolaýanda-da Ony tanap bolmaz» diýýärler. Aslynda beýle däl. Ýaradylan zatlar Ýehowanyň hakykatdanam bardygyny subut edýär (Rim. 1:20). Pawlus Afinadaky bilimli greklere ýüzlenende Hudaýyň «Ony gözlemegimizi» isleýändigini we «hiç kimden uzakda däldigini» aýtdy (Resullar 17:27-ni okaň). Dogrudanam, Ýehowa pesgöwünli adamlara hakykaty açýar (Ýah. 6:44).

6. a) Mukaddes Kitapda haýsy hakykatlar barada aýdylýar? b) Siz hakykaty bilýändigiňize näme üçin begenýärsiňiz?

⁶ Ýehowany tanamak üçin Mukaddes Kitaby okamaly. Ýehowa ony mukaddes ruhy arkaly ýazdyrdy (2 Pet. 1:20, 21). Mukaddes Kitapdaky ýazylan zatlaryň ählisi dogry, biz oňa arkaýyn ynanyp bileris. Meselem, biz älem-jahany we ondaky ähli zady Ýehowanyň ýaradandygyna ynanýarys (1 Mus. 1:1, 26). Miras geçen günä sebäpli ähli adamlaryň kösenip ýaşaýandygyny we ölýändigini bilýäris (Rim. 5:12; 6:23). Şeýle-de Ýehowanyň Ogly Isa arkaly «ýalanyň atasy» Şeýtanyň ýetiren zyýanynyň öwezini doljakdygyna şübhelenmeýäris (Ýah. 8:44; Rim. 16:20). Mundan başga-da, Mukaddes Kitapdaky wadalaryň ýerine ýetjekdigine, ýagny Isanyň erbetligi aýyrjakdygyna, ölüleri direltjekdigine, ýer ýüzüni Jennet etjekdigine we adamlary kämillige ýetirjekdigine berk ynanýarys (Ýah. 11:25, 26; 1 Ýah. 3:8). Ýehowa bize Özi baradaky hakykaty öwredýär we bize-de şol hakykaty adamlara öwretmegi tabşyrdy. Biz Ýehowany tanap, adamlara Ol hakda öwredip bilýändigimize örän begenýäris (Mat. 28:19, 20).

HAKYKATY NÄME ÜÇIN AÝTMALY?

7, 8. Ýehowa hakykaty näme maksat bilen aýdýandygymyza üns berýärmi? Mysal getiriň (Markus 3:11, 12; surata serediň).

⁷ Ýokarda belläp geçişimiz ýaly, Ýehowanyň maşgalasynyň agzasy bolmak üçin hakykaty aýtmaly. Ýöne Hudaýy razy etmek üçin diňe hakykaty aýtmak ýeterlik däl. Ýehowa hakykaty näme üçin aýdýandygymyza üns berýär. Geliň, Isanyň ýer ýüzünde wagyz edende bolan waka seredeliň (Markus 3:11, 12-nji aýatlary okaň). Bir gezek Isa Jelile deňziniň golaýynda wagyz edip ýördi. Onuň daş-töweregi adamdan doludy. Märekäniň arasynda içine jyn giren adamlar hem bardy. Olar Isanyň aýagyna ýykylyp: «Sen Hudaýyň Ogly» diýip gygyrýardylar. Aslynda, jynlar Isa barada hakykaty aýtdylar, ýöne olaryň niýeti gowy däldi. Belki-de, olar märekäni içine jyn giren adamlaryň dogry zatlary aýdýandygyna ynandyrjak bolandyrlar. Şeýdip, adamlary Ýehowa gulluk etdirmejek bolandyrlar. Ýöne jynlar Isany aldap hem, onuň göwnünden turup hem bilmediler. Şonuň üçin Isa olara özi hakda wagyz etdirmedi.

⁸ Biz şu wakadan näme öwrenýäris? Ýehowa biziň hakykaty näme maksat bilen aýdýandygymyzy görýär. Şol sebäpli biz adamlara hakykaty Ýehowany söýýändigimiz üçin gürrüň bermeli. Hakykaty wagyz edýändigimiz üçin öwenlerinde özümizi däl-de, Ýehowany şöhratlandyrmaly (Mat. 5:16; Resullar 14:12—15-nji aýatlary deňeşdiriň).

9. Biz näme etmeli däl we näme üçin?

⁹ Geliň, özümizi arşa galdyrmaly däldigini görkezýän bir ýagdaýa seredeliň. Aýdaly, jogapkär dogan bize hiç kime aýdylmaly däl maglumaty aýdýar. Bizem ony başgalara aýdýarys. Dogan-uýalar şol maglumatyň dogrudygyny bilenlerinde, biziň nireden eşidendigimize haýran galarlar we başga-da köp zatlary bilýändiris öýderler. Biz adamlaryň öňünde köp zat bilýän ýaly görüneris, ýöne Ýehowanyň öňünde ynamdan gaçarys (Nak. 11:13). Sebäbi aýdýan zadymyz dogry bolsa-da, biz syry paş etdik. Onsoňam, hakykaty nädogry niýet bilen aýtdyk.

HAKYKATY NÄDIP AÝTMALY?

10. «Sözleriňiz ýakymly bolsun» diýen jümle nämäni aňladýar? (Koloslylar 4:6).

¹⁰ Koloslylar 4:6-ny okaň. Pawlus resul Kolosdaky mesihçilere: «Sözleriňiz ýakymly bolsun» diýip maslahat berdi. Ol nämäni göz öňünde tutduka? Asyl nusgada şol jümle aýdýan sözlerimiziň diňe bir peýdaly bolman, ýumşak bolmalydygyny we ýürege täsir etmelidigini görkezýär.

11, 12. Hakykaty öwredenimizde näme üçin ünsli bolmaly? Mysal getiriň (Surata serediň).

¹¹ Biz adamlara Mukaddes Kitapdan hakykaty öwredenimizde Pawlus resulyň maslahatyna eýermeli. Mukaddes Kitapda hakykatlar süňkleri bölüp, ýilige çenli baryp ýetýän ýiti gylyja meňzedilýär. Başgaça aýdanyňda, ol adamyň duýgularyny we niýetlerini ýüze çykarýar (Ýew. 4:12). Eger biz Mukaddes Kitapdaky hakykaty ökdelik bilen wagyz etmesek, onda bizi diňleýän adamyň gahary gelip, dawalaşmagy mümkin.

¹² Aýdaly, biz wagyzda şekillere sežde edýän, maşgalasy bilen Täze ýyl baýramyny bellemegi gowy görýän adam bilen tanyşýarys. Biz oňa jansyz şekillere sežde etmegiň biderekdigini, Täze ýyl baýramyny bellemegiň Mukaddes Kitaba esaslanmaýandygyny düşündirip bileris (Işa. 44:14—20; 2 Kor. 6:14—17). Ýöne biz şu zatlary ilkinji gürrüňdeşlikde aýtsak nähili bolar? Elbetde, biz dogry zady aýtsak-da, Hudaýyň Sözüni ökdelik bilen öwretmeris.

13. Sözlerimiz tagamly bolar ýaly näme etmeli?

¹³ Pawlus resul Koloslylara beren maslahatynda aýdýan sözlerimiziň tagamly bolmalydygyny aýtdy. Biz adamyň göwnüne degmejek bolup hakykaty ýoýmaly däl ýa-da ony gizlemeli däl. Gaýtam Mukaddes Kitapdaky hakykaty adamlaryň ýüregine täsir eder ýaly edip öwretmeli (Eýp. 12:11). Elbetde, ýakymly sözlemek hemişe aňsat däl. Meselem, biz bir tagamy halaýan bolsak, ony başgalar hem halaýandyr diýip pikir etmegimiz mümkin. Edil şonuň ýaly, aýdýan sözlerimizi adamlar hem halaýandyr öýtmegimiz mümkin. Ýöne adamlar dürli-dürli bolýar. Meselem, käbir medeniýetde adamlar pikirini açyk aýdýar. Olar hatda uly adamlardan hem çekinmeýärler. Käbir ýerlerde bolsa pikiriňi göni aýtmak ýerliksiz, hatda gödek hasaplanýar. Şonuň üçin Pawlus resul: «Her kime nädip jogap bermelidigini biliň» diýip maslahat berdi. Diýmek, biz «terbiýäm şeýle» ýa-da «men halaýaryn» diýmän, aýdýan sözlerimizi adamlara görä üýtgetmeli, sebäbi sözlerimiz özümize däl-de, adamlara ýakymly bolmaly.

HAKYKATY HAÇAN AÝTMALY?

14. Isa şägirtlerine bilýän zatlarynyň barysyny bir gezekde öwretdimi? Düşündiriň.

¹⁴ Isa pygamber hemişe adamlar bilen mähirli gepleşýärdi, olara köp zatlary öwredýärdi (Mar. 6:34). Ýöne olar Isadan entek köp zatlary öwrenmelidi. Isa adamlara bilýän zatlarynyň barysyny bir gezekde öwretjek bolmady. Sebäbi ol şägirtleriniň käbir hakykatlary kabul edip bilmejekdigine düşünýärdi. Isa şägirtlerine: «Häzir olara düşünmersiňiz» diýdi (Ýah. 16:12). Biz Isadan näme öwrenýäris?

15. Okuw geçip başlan adama ähli zady bir gezekde öwretmelimi? Düşündiriň (Nakyllar 15:23; surata serediň).

¹⁵ Görşümiz ýaly, hakykaty bilmek bar zady bir gezekde öwretmegi aňlatmaýar. Biz Isadan görelde alyp, adamyň ýagdaýyny göz öňünde tutmaly. Geliň, Täze ýyl baýramçylygyny bellemegi gowy görýän adam hakdaky mysala dolanalyň. Elbetde, biz şol baýramçylygyň ýalan dinden gelip çykandygyny, Hudaýa ýaramaýandygyny bilýäris. Göz öňüne getiriň, siz şol adam bilen Täze ýyl baýramyna birki hepde galanda okuw geçip başlaýarsyňyz. Eger biz oňa Mukaddes Kitapdan baýramçylyklaryň ýalan dinden gelip çykandygyny görkezsek we Täze ýyl baýramyny bellemegi goýmalydygyny aýtsak dogry bolarmy? Ýakymly sözledigimiz bolarmy? Käbir okuw geçýänler Mukaddes Kitapdan öwrenen zatlaryny kabul edip, şol bada eýerýärler. Käbirlerine bolsa garaýşyny üýtgedip, öňki edip ýören zatlaryny goýmak üçin wagt gerek bolýar. Okuw geçýänlerimiz ruhy taýdan öser ýaly, hakykaty kabul etjek wagty aýtmaly (Nakyllar 15:23-i okaň).

16. Okuw geçýänlere «hakykat ýolunda ýöremäge» nädip kömek edip bileris?

¹⁶ Adamlara Ýehowa barada öwredip alýan şatlygymyzy hiç zada deňäp bolmaýar. Eger biz şu makaladaky maslahatlara eýersek, adamlara «hakykat ýolunda ýöremäge» kömek ederis. Ilki bilen, özüňiz hakykat ýolunda ýöräp, görelde boluň (3 Ýah. 3, 4). Siziň ýaşaýşyňyzdan Hudaýyň Sözündäki wadalara ynanýandygyňyz görünsin. Hakykaty, dogry zady päk niýet bilen aýdyň. Sözleriňiz ýakymly we mähirli bolsun. Adamlara Mukaddes Kitabyň hakykatyny haçan we nädip öwretmelidigini biliň. Özüňizi däl-de, ähli zatda Ýehowany şöhratlandyryň. Şonda hakykatyň Hudaýy Ýehowanyň gullukçysy diýip tanalarsyňyz.