Paghaharap ng Mabuting Balita—Taglay ang Matatandang mga Publikasyon
1 Ang paggawa ng desisyon na sumamba sa Diyos ay napakahalaga. Ito ay nangangahulugan ng ating buhay. Kaya, ang pagkakaroon ng kaalaman at karunungan upang ikapit ito ay isang kapakipakinabang na tunguhin.—Kaw. 23:23; Juan 17:3.
2 Upang magkaroon ng kaalaman at sumulong sa karunungan, kailangan tayong lubusang mag-aral ng Salita ng Diyos. Saganang ipinagkakaloob ni Jehova ang kaalaman at karunungan sa mga taimtim na naghahanap sa kaniya. Sa maraming mga taon, siya’y naglaan sa pamamagitan ng kaniyang organisasyon ng saganang mga publikasyon na sumasaklaw sa maraming larangan ng kaalaman sa Bibliya. Ang mga ito ay maaaring maging isang malaking kapakinabangan sa marami na hindi pa nakakakilala kay Jehova.
KAHALAGAHAN NG MATATANDANG MGA PUBLIKASYON
3 Sa Pebrero, marami sa atin ang mag-aalok ng 192-pahinang matatandang mga aklat sa larangan. Mayamang impormasyon ang tinataglay ng mga publikasyong ito na may espirituwal na kahalagahan para sa mga tao. (Tingnan ang Mateo 5:14-16.) Kaya pagsikapan nating mailagay ang lahat ng matatandang mga publikasyon na nasa stock ng ating kongregasyon sa buwang ito.
4 Binigyan ng isang kapatid na babae ang kaniyang asawang hindi sumasampalataya ng isang matandang aklat bilang regalo. Sa panahong iyon ay wala pa siyang ipinakikitang interes. Namangha siya nang basahin nito ang buong aklat sa isang gabi. Napatibay nito ang kaniyang pananampalataya anupa’t siya’y dumalo sa sumunod na pulong at humiling ng isang pag-aaral sa Bibliya. Sa loob lamang ng tatlong buwan, siya’y nakikibahagi na sa ministeryo sa larangan at ngayon ay bautisado na.
MAGKAROON NG POSITIBONG SALOOBIN
5 Huwag hamakin ang kapangyarihan ng Salita ng Diyos na siyang itinatampok ng mga matatandang publikasyong ito. Kung ang inyong kongregasyon ay walang 192-pahinang mga matatandang publikasyon, kung gayon maaari kayong mag-alok ng aklat na Worldwide Security o alinman sa mga bagong 192-pahinang aklat sa abuloy na ₱14.00.
6 Tamasahin nawa nating lahat ang isang mabungang ministeryo sa pamamagitan ng pamamahagi ng kaalaman ng Salita ng Diyos taglay ang matatandang mga publikasyong ito!