Tulungan Silang Kumilos Salig sa Mensahe
1 Ang ating gawaing pangangaral ay nagbibigay sa mga tao ng pagkakataong ‘makinig sa mga salita ng hula ng Apocalipsis.’ (Apoc. 1:3) Subalit upang sila’y makaligtas sa “malaking kapighatian,” kailangan silang kumilos salig dito. (Apoc. 7:14) Mga buhay ang nasasangkot! Tiyaking dumalaw muli sa mga nagpakita ng interes.
2 Kung nakapag-iwan kayo ng aklat na “Apocalipsis,” maaari ninyong sabihin:
◼ “Mabuti’t nakita ko kayong muli. Nang huli tayong mag-usap, napag-usapan natin ang tungkol sa mga hula ng Apocalipsis, at nakapag-iwan ako sa inyo ng publikasyon na nagpapaliwanag nito. Marahil ay napansin ninyo na bagaman ang aklat ng Apocalipsis ay malalim, ito’y maaaring maintindihan sa liwanag ng mga pangyayari sa makabagong panahon. Nais kong gumugol ng ilang minuto upang ipaliwanag kung ano ang sinasabi ng Bibliya hinggil sa ating panahon.” Pagkatapos ay bumaling sa publikasyon na maaari ninyong gamitin upang pasimulan ang isang pag-aaral sa Bibliya.
3 Kung nakapag-iwan kayo ng tract na “Ang Sanlibutan Bang Ito’y Makaliligtas?” sa unang pagdalaw, maaari ninyong sabihin ang ganito:
◼ “Ako’y naliligayahang masumpungan kayo sa tahanan ngayon. Nang ako’y dumalaw kamakailan, ating pinag-usapan ang hinggil sa isang tanda na lilitaw bago ang katapusan ng sanlibutan. [Repasuhin ang angkop na mga aspeto ng tanda sa Mateo 24:3-14.] May napansin ba kayong anumang pangyayari kamakailan sa daigdig na maaaring katuparan ng bahagi ng tandang iyon?” Ginagamit ang mga ilustrasyon sa kabanata 16 ng aklat na Apocalipsis, magkomento sa katuparan ng ilan sa mga hulang ito ng Bibliya.
4 Kung inanyayahan ninyo ang maybahay sa Memoryal, sabihin:
◼ “Noong huli ko kayong dalawin, ating pinag-usapan ang kahalagahan ng kamatayan ni Jesus para sa sangkatauhan. Inanyayahan ko rin kayo na dumalo sa Memoryal ng kaniyang kamatayan, na aalalahanin ng mga Kristiyano sa palibot ng daigdig sa Marso 26. Ako’y naparito ngayon upang ipagunita sa inyo na kayo ay imbitado sa mahalagang okasyong iyon. [Banggitin ang oras at dako ng selebrasyon.] Maaaring makatulong sa inyo na makita ang kahalagahan ng okasyon kung ating rerepasuhin ang ilang mga pagpapala na ating tinatamasa ngayon bilang resulta ng ginawa ni Jesus sa sangkatauhan, gayundin ang mga pagpapala na darating pa.” Pagkatapos ay talakayin ang mga angkop na punto mula sa kabanata 41 ng aklat ng Apocalipsis. Maaari rin ninyong itampok ang mga ilustrasyon sa mga pahina 294, 299, at 308. Hangga’t maaari, isaayos na matulungan ang taong interesado na makadalo sa Memoryal.
5 Kung ang tao ay nakinig lamang nang may kabaitan, maaaring maging mabisa ito:
◼ “Ako’y lubos na nasiyahan sa ating nakaraang pag-uusap hinggil sa Bibliya. Ako’y nagbalik dahilan sa nais kong tamasahin ninyo ang pangako ng Diyos doon sa mga nagnanais na matuto nang higit pa tungkol sa kaniya.” Basahin ang Juan 17:3, pagkatapos ay bumaling sa tract na Buhay sa Isang Mapayapang Bagong Sanlibutan.
6 Ang inyo nawang pagpapahalaga sa pantubos ay magpakilos sa inyo na gumawa ng mga pagdalaw muli sa mga taong interesado. Tulungan silang kumilos sa kagilagilalas na mensahe sa Apocalipsis. Tandaan, “ang itinakdang panahon ay malapit na”!—Apoc. 1:3.