Teye Di’anto Akina Wekɔ La Waonga W’amɛna

Okakatanu

Lokaki koka nkonya onto dia monga la tshelo ya nkanɛ anto kɔlɔ. Onto lele la lokaki ndjadiyaka ndo ndjakanaka. Nde ndjaɔsaka oko onto lele laadiko ndo mbɔsaka di’anto wotshikitanyi la nde wekɔ l’ɛse kande. Onto tshɛ kokaka ntala lo djonga shɔ. Dibuku dimɔtshi (Encyclopædia Britannica) mbutaka ɔnɛ: “Anto wa l’ahole efula ndjaɔsaka la nɛmɔ efula, mbuta ate vɔ mbɔsaka dia yoho yawɔ ya lɔsɛnɔ, olelo awɔ, yoho yawɔ ya ndɔta, mbekelo, dietawɔ, nɛmɔ diele la wɔ ndo awui akina ndeka anto wele la mbekelo kina.” Ngande wakokaso mbewɔ ekanelo ka yimba ka ngasɔ?

Tɔndɔ dia lo Bible

“La okitshakitsha, nyɔshi dia anto akina nyoleka.”—FILIPƐ 2:3.

Kakɔna katetsha divɛsa nɛ? Dia mbewɔ lotamanya lamboleka, ekɔ ohomba sho mbeka dia monga l’okitshakitsha. Okitshakitsha tokimanyiyaka dia sho mbeya dia lo awui akina wa lo lɔsɛnɔ anto akina toleka. Ndooko olui w’anto wele vɔ tshɛ wekɔ la waonga w’amɛna.

Tɔsɛdingole ɛnyɛlɔ ka Stefan. Nde akole lo wodja ɔmɔtshi wa waa Kɔministɛ, koko nde akadje nsaki kaki lande ka nkanɛ anto w’oma lo wedja waki komonga wedja wa waa Kɔministɛ otshumba. Nde mbutaka ate: “Dimi mbetawɔka dia mbɔsa di’anto akina koleka, ekɔ ohomba efula dia minya tshelo ya nkanɛ anto kɔlɔ. Handeye vuiwui tshɛ. Dimi koka mbeka dui dimɔ oma le onto tshɛ.”

Kɛnɛ kakokayɛ nsala

Sala dia mɛna akambo la sso di’ɔlɔlɔ ndo etawɔ dia wɛ salaka munga. Eya di’anto akina wekɔ wolo l’awui amɔtshi weyɛ wɔdu. Tɔfɔnyake di’onto tshɛ l’oma l’olui kapanda ekɔ la munga yakɔ yaamɛ.

Lo dihole dia monga l’ekanelo ka yimba ka kɔlɔ lo dikambo di’onto ɔmɔtshi loye oma l’olui ɔmɔtshi w’anto, yambola wate:

Eya di’anto akina wekɔ wolo l’awui amɔtshi weyɛ wɔdu

‘Onde waonga wahamalange le onto akɔ, wekɔ mɛtɛ tshɛ kɔlɔ, ko kana ekɔ paka lo woho wotshikitanyiso?’
‘Onde onto ɔnɛ koka ntana munga kɛmɔtshi le mi?’
‘Lo awui akɔna amɔtshi wondeki onto ɔnɛ?’

Naka wɛ nkadimola ambola asɔ la losembwe tshɛ, kete wɛ mbeyaka aha tsho mbidja tshelo ya nkanɛ anto kɔlɔ yele layɛ otshumba, koko wɛ mbeyaka nto ntana awui amɔtshi wangɛnangɛnayɛ le onto akɔ.

Ɛnyɛlɔ ka mɛtɛ: Nelson (États-Unis)

“Laketsha ɛnɔnyi ami efula wa dikɛnda lo dihole diele anto wa lɛkɔ waki paka la nkoho y’alemba ndo mbekelo ɔtɔi. Koko etena kakamonɔ otsha l’osomba ɔmɔtshi wa woke lele l’ɛnɔnyi 19 dia tokamba lo Izinɛ ɔmɔtshi, lakatokambaka ndo lakatosukanaka l’anto efula wotshikitanyi nkoho y’alemba ndo woye oma l’ahole efula ndo mbekelo yotshikitanyi.

“Etena kakamatalekaka mbeya asekami wa l’olimu ndo kakamayɔtɔlawɔ lɔngɛnyi, lakɛnyi dia lokoho lawɔ la demba, ɔtɛkɛta awɔ ndo wodja awɔ kombutɛmi ndooko dikambo lo woho wakawakambaka olimu la wolo tshɛ, woho wakamayɛkɛka otema le wɔ ndo woho waki nsaki yawɔ ya l’etei k’otema.

“Oma laasɔ, lakayotshuka womoto lele wodja ndo lokoho la nde la demba ntshikitana la lami ndo lakayonga l’ɔngɛnɔngɛnɔ efula lo mbeka weho wa diangɔ di’amɛna efula ndo weho wa mishiki wakimi kombeyaka. Lɔsɛnɔ lakambetsha dia sho tshɛ tekɔ la waonga w’amɛna ndo wa kɔlɔ. Dia mbuta mɛtɛ, laya onto ɔlɔlɔ oma lo woho wakamangɛnangɛna ndo wakametawɔ waonga w’anto wakatshikitana la mi lokoho la demba ndo mbekelo.”