Anto Efula Wekɔ La Mbetawɔ
ONDJASHI Nzambi ɔmɔtshi wa omoto w’Ose Brésil akate ate: “Yeso ekɔ onto la diambo! Nde mambiyaka anto mɛtɛ!” Lo mɛtɛ, ndoko onto lâma dikambo dia nkudu kele la lokombo la Yeso. Anto efula wambosowa ndo wambodiakema l’ɔtɛ ande lo lɔsɛnɔ l’anto.
Etshina k’esambishelo k’ɔpɔstɔlɔ Petero la Joani la Jerusalɛma ‘kakakama lo lokombo la Yeso.’ Wakawande ndo wakakɔmɔla eshingɔ lo woho wakawasambishaka ngasɔ. Koko, vɔ “wakamo uma la ntundu k’embadi, watangenangena ne dia vo wakakuki dia monywama dia lukumbu loso.”—Etsha 5:28, 41.
Atipa aki Okristo okina wa l’eleko ka ntondo wakɔshi lokombo la Yeso la nɛmɔ. Lo Enyelo, dibuku di’ekomelo dia lo Bible, Yeso akate ɔnɛ nde ekɔ “omenyi ami, kanga kolamelu, lakadiakema l’atei anyu, lene udjashi Satana.” (Enyelo 2:13) Atipa, kâmɛ l’Akristo akina wa la Pɛrɛngamo wakatone manguna mbetawɔ kaki lawɔ le Kristo. Atipa akamamema lokombo la Yeso kânga lam’aki lɔsɛnɔ lande lo wâle!
L’ɔkɔngɔ wa yɛdikɔ y’eleko l’etenyi, mbut’ate: lo 155 T.D., Polycarp, ɔnɛ lakataka ate Okristo mbende akayohomanaka l’ohemba akɔ wâmɛ lam’akawotshutshuya dia nde manguna Kristo. Nde akakadimola ate: “Aya ɛnɔnyi akumi enanɛi l’esamalo mbôkambɛmi, ndo ndoko lushi lambondotshɛ kɔlɔ. Ko lâsɔ, ngande wakokami tɛnga Nkumɛmi ndo ombitshi ami na?” Lam’ele nde akatone manguna Kristo, wakahanɛ Polycarp l’otamba ko mbotshumba.
Apɔstɔlɔ, Atipa, l’akina waketawɔ mvɔ dia nshikikɛ awui wakawasambishaka lo dikambo dia Kristo. Kayotota lo dikambo di’anto wa nshi nyɛ na?
Lokombo la Yeso Ɛlɔ Kɛnɛ
Lokombo la Yeso latetemalakɔ la sokoya anto dia vɔ kɛnɛmɔla kɛnɛ kele l’etema awɔ. L’Amɛrika wa lo sudɛ, lo ɛnɔnyi akumi wêke kambeta ɛnɛ, ɛtɛmwɛlɔ wayasɛma ɔnɛ wekɔ la mbetawɔ le Yeso wambofulanɛ hakoke. Ɔtɛmwɛlɔ wa waa Pentecôtistes tanemaka kânga lo ngelo ya totshitshɛ. L’etena kakɔ kâmɛ, ɛtɛmwɛlɔ akɔ wekɔ lo taleke sɛngiyama oma le ase pɔlitikɛ. Oko ɛnyɛlɔ, lo Congrès ndo lo Sénat (olui a waa dipite) k’Ase Brésil, ase ɛtɛmwɛlɔ ɛsɔ wekɔ l’ahole 31 lɔkɔ.
Ɔtɛmwɛlɔ ɔmɔtshi w’oyoyo wa l’États-Unis wambɔsa Yeso oko tshonga esambu yawɔ (élément central). Ambetawudi w’ɔtɛmwɛlɔ akɔ mbetanaka ɔnɛ Anami wa Daka. Jurunalɛ Time y’ɔnɔnyi 1997 akakɔndɔla ɔnɛ lofulo l’anto wambɔtɔ lɔkɔ lakadɛ oma lo 4200 lo 1991 polo lo 1,1 miliyɔ lo 1996. Lo slɔga kawɔ kɛmɔtshi, vɔ mbutaka ɔnɛ: “Yeso adje otshumba, Ombitshi ami wa pondjo pondjo.”
Koko, aha tokanyi tshɛ tele l’anto lo lokombo la Yeso mbele tokanyi t’ɛlɔlɔ. Anto wambɔlɔ ata efula lo lokombo lande. Lo lokombo la Yeso, Ase Juda wakadiakema, wakahembɔma ɛtɛ, wakahɛnyahɛnyama dia mbetawɔ kawɔ kotshikitanyi, wakahembɔma anya kana ekolo, ndo wakatshumbama lohanema l’etamba. Atete ndoko edja, anto wakatatɛ sondja awui wa l’evanjiliɔ losondja. Kɛsɔ tshɛ mɛnyaka nganɛ wafukutanya anto kitshimudi ya lokombo la Yeso ndo nganɛ wakambawɔ alɔ lo yoho ya kɔlɔ!
Lâdiko dia lâsɔ, wembola efula w’eshika mumbɔmaka: Monga la mbetawɔ lo lokombo la Yeso tondjaka etombelo akɔna? Naa kanyi yele l’Ɛmɛnyi wa Jehowa lo dikambo sɔ na? Sawo diayela diayokadimola wembola ɛsɔ.