Kema wɔdu monga la okitshakitsha

ANTO efula mbɔsaka dia okitshakitsha bu ohomba lo andja wa nshi nyɛ. Anto weya nɔmbɔla anto akina ndo wɔsama dia vɔ mamboleka tondoya lɔsɛnɔ wekɔ anto wasala la wolo awɔ tshɛ dia ndeka anto akina, akanga w’etako ndo wanɛ watɛtɛ anto akina dia sala kɛnɛ kalangawɔ. Anto lo tshɛ kawɔ kɔmiyaka yoho ya lɔsɛnɔ y’ase ɛngɔnyi ndo y’akanga wa lokumu, koko aha yoho ya lɔsɛnɔ y’anto wele la okitshakitsha ndo la memakana. Mbala efula, wanɛ watondoya lo lɔsɛnɔ funaka dia oma lo welo awɔ hita mbambowotondoya. Lo dihole dia vɔ monga la okitshakitsha, vɔ ndjafunaka dia la wolo awɔ hita mbambowotondoya.

Onyangiyangi ɔmɔtshi w’ose Canada akatɛkɛta dikambo dia dionga dia “lokaki ndo dia lotamanya” diele la anto wa lo wodja ande. Anto akina fɔnyaka dia tekɔ lo nsɛna lo tshunda diele ndeka dimɛna ndjangɛnyangɛnya oleki mɛmba ɛkɛndɛ dikambo di’anto akina ndo vɔ mɛnaka dia anto wa nshi nyɛ wekɔ lo taleke ndjasha paka lo awui awɔ ato. Lo andja wa ngasɔ, anto mbeyaka mbɔsa okitshakitsha oko dionga diele kema ohomba.

Lo mɛtɛ, tɔtɔi toto mbakoka mama dia okitshakitsha ekɔ dionga di’ɔlɔlɔ le anto akina, lam’ele bu wolo nsɛna la anto wele la okitshakitsha. Koko, lo andja wa shɛmanedi wasɛnaso ɔnɛ, anto amɔtshi mbokaka wɔma dia monga la okitshakitsha, nɛ dia anto akina wayowaɔsa oko ɛhɔdu.

Bible, Ɔtɛkɛta waki Nzambi akatatshi ɔnɛ lo nshi yaso nyɛ anto “wayosema, wayutakula.” (2 Timote 3:1, 2) Onde wɛ hetawɔ dia prɔfɛsiya kɛsɔ kekɔ lo kotshama ɛlɔ kɛnɛ? Onde wɛ fɔnyaka di’ekɔ ohomba monga la okitshakitsha? Kana onde wɛ fɔnyaka dia onto lele la okitshakitsha mbɔsamaka oko ɔhɔdu ndo onto lakoka anto akina mɛngiya esadi eto?

Kɛnɛ kele mɛtɛ ele, Bible mbishaka ɛkɔkɔ w’eshika wa mbɔsa okitshakitsha la nɛmɔ ndo monga lawɔ. Tɔ toshaka kanyi yele la wɛdimo, tɔlɔmbaka dia sho monga la wɔ ndo tɛnyaka dia okitshakitsha wa mɛtɛ ekɔ djembetelo ya wolo, koko aha ya ɔhɔdu.

[Osato wa lo lɛkɛ 3]

Ngande wahombaso ndjaoka etena kasalaso awui amɔtshi?