Ngande wakokɛ mɛnya ndjakitshakitsha ka mɛtɛ?
NDJAKITSHAKITSHA ka mɛtɛ kekɔ la nɛmɔ di’efula lo washo wa Nzambi. Jakɔba akafunde ate: “[Nzambi] atutunaka kanga utaku, keli atushaka one layakitshakitsha ngandji ka mamba.” (Jakoba 4:6) Lanɛ, ondo Jakɔba akakambe la tokanyi efula tɛnyami l’Afundelo w’Ase Hɛbɛru. “[Jehowa] eko ladiku, ndi atukanelaka kanga ndjakitshakitsha. Keli ndi atulimbitelaka kanga utaku uma l’etali.” “Untu leli la endelu ka lahi ayuhuluyama, la kanga utaku ayukitshakitshama. Ku [Jehowa] ndame kayediama lu lushi lako.” “Ndi atosokaka asokanyi, keli ndi [Nzambi] atuhumuyaka akanga a ndjakitshakitsha lukulu l’olo.”—Osambu 138:6; Isaya 2:11; Tukedi 3:34.
Ndo ɔpɔstɔlɔ Petero mbatokeketsha dia monga la ndjakitshakitsha. Nde akafunde ate: “Ee, nyu tshe nyuyalotsha la ndjakitshakitsha, ne dia nkambanela, ne dia [Nzambi] atutunaka akanga w’utaku, keli atushaka wane wayakitshakitsha ngandji ka mamba.”—1 Petero 5:5.
Ɛnyɛlɔ ka Kristo ka ndjakitshakitsha
Wɛ kokaka ndjambola wate: monga la ndjakitshakitsha ekɔ la wahɔ akɔna na? Le onto latsha tshɛ dia monga Okristo wa mɛtɛ, okadimwelo wa dimbola sɔ ekɔ ohomba efula. Monga la ndjakitshakitsha kɛdikɛdi monga oko Kristo. Yeso akɛnya ndjakitshakitsha kande lo mbetawɔ lotumu la lânde la mimɔ oma l’olongo ko ndja la nkɛtɛ ndo ndjonga onto lele ndo l’ɛse k’andjelo. (Heberu 2:7) Kânga mbakinde Ɔna Nzambi, nde akakikɛ sɔnyi kakawotsha atunyi ande w’ase ɛtɛmwɛlɔ. Nde koshisha ndjakimɛ kande l’atei w’ehemba, kânga mbakandakoke mbeta nyemba yande y’andjelo dia ndjôkimanyiya.—Mateu 26:53.
L’ekomelo, Yeso akahanema la diɔnyɔ tshɛ l’otamba w’asui, koko nde akatshikala la kɔlamelo le She. Diakɔ diakakoke Paulo funda lo dikambo diande ate: “Nyuyali la yimba nye l’atei anyu yaki ndu le Kristu Jesu. Kuyanga ndi aki lu efanelu ka [Nzambi], ndi kunkana ati: Mbedima pupu la [Nzambi] eko engo ka dimi munda. Keli ndi akayanya uma lu lutumbu, akayala uku ukambi, akuto lu efanelu k’antu. Lam’akandayala uku untu, ndi akayakitshakitsha, akayala la ukitanyia edja ndu lu nyoi, ee, nyoi ka l’utamba [w’asui].”—Filipi 2:5-8.
Lâsɔ, ngande wakokaso mɛnya ndjakitshakitsha ka mɛtɛ na? L’akambo wɛnama la washo, ngande wakosaso ntsha oko anto wele la ndjakitshakitsha koko aha oko akanga w’etako na?
Woho watotshaka onto lele la ndjakitshakitsha
Nyɛsɔ tênde woho wahombaso monga la ndjakitshakitsha lo kɛnɛ kendana l’olimu: oyadi lo dihole di’olimu kana l’olimu w’Okristo. Di’olimu kɛndakɛnda dimɛna, anɔmbɔdi, ewandji ndo anami pombaka monga. Onto ɔmɔtshi lahomba mbɔsaka tɛdikɔ pombaka monga. Ngande watoyotshaka na? Onde wɛ tokanyiyaka yoho nyɛ: “Ayaɔsande mɛtɛ dia nde ndjombitɛ ɔnɛ sala nganɛ na? Akamakambe olimu ɔnɛ ko nde amboyakɔ?” Eelo, naka wɛ ekɔ otako, kete wɛ ayoka wolo kitanyiya. Lo wedi okina, onto lele la ndjakitshakitsha salaka la wolo dia ‘ntsha akambo aha l’otshanu kana lo ndjatombola, koko la yimba ya ndjakitshakitsha ɛna ɔnɛ anto akina mbôleka.’—Filipi 2:3.
Ngande watoyotshaka lam’akosha dikɛnda kana womoto kanyi mɔtshi na? Naka wɛ ekɔ la ndjakitshakitsha, kete wɛ ayoyietawɔ. Ko naka wɛ ekɔ la lotamanya, kete wɛ ayoyiɔnyɔla kana ndjitona mbala kakɔ ɔtɔi. Onde wɛ ayoleka nanga vɔ kotombola kana koshimboya lo kɔlɔ kayoyokokonya l’elanyelo, kana ndjela alako wakoka kôdia?—Tukedi 27:9; 29:5.
Onde wɛ kokaka shika ekolo la ntondo k’atunyi? Ndjakitshakitsha ayokokimanyiya dia wɛ tokomɛ ekakatanu ndo mbikikɛ oko wakatshe Jɔbɔ. Ko naka wɛ ekɔ otako, kete wɛ ayona momala kana mbeyaka tɔmbɔkɔ, ndo monga la tokanyi ta kɔlɔ lam’ayokokomɛ ekakatanu wa ngasɔ.—Jobo 1:22; 2:10; 27:2-5.
Ɔnɛ layakitshakitsha mbokaka anto ngandji ndo mbadimanyiyɛka
Anto amɔtshi mbokaka wolo mbuta ɔnɛ: “Okimwe lam’alangɛ. Dimi mbakatshe kɔlɔ. Wɛ mbɔswɛ.” Lande na? Toko oma l’otako w’efula wele lawɔ! Koko mbala efula, nɔmba onto edimanyielo l’otema ɔtɔi shidiyaka osanyi esadi eto.
Onde wɛ tetawɔka dimanyiyɛ onto lambokotshɛ kɔlɔ? Ko kana wɛ mombɛka kɛlɛ nshi kana ngɔndɔ oma l’otako ayɛ ndo tonaka tɛkɛta la nde nɛ dia wɛ owɔsa oko otunyi? Onde wɛ totshaka tshɛ dia sɔmbɔya? Anto wambodiakana l’esanyi wa ngasɔ. Akina waya la shambu ya nanyaka lokumu l’onto akɔ. Lo yoho yotshikitanyi, onto lele la ndjakitshakitsha mbokaka akina ngandji ndo mbadimanyiyɛka. Lande na? Nɛ dia ngandji hadia kɔlɔ kotshe onto. Jehowa aketawɔka dimanyiyɛ Ase Isariyɛlɛ lam’akandɛnaka ɔnɛ vɔ waya bu l’otako. Ombeki wa Yeso wele la ndjakitshakitsha mongaka suke dia dimanyiyɛ onto, kânga mbala ko mbala!—Joele 2:12-14; Mateu 18:21, 22; 1 Koreto 13:5.
Onto lele la ndjakitshakitsha ‘mbishaka ɛnyɛlɔ lo nɛnya anto akina.’ (Romo 12:10) Lo Dyookaneelo dy’Oyooyo sho mbadiaka ɔnɛ: “Nyohetetale lo mbishana nɛmɔ laasanyu.” Onde wɛ nɛnyaka anto akina ndo mandolaka akoka la diewo diawɔ? Ko kana mbala tshɛ wɛ toyangaka kânga dikambo dia tshitshɛ dia nanya lokumu lawɔ lo mbamamatanyiyɛ awui wa kashi? Onde wɛ nɛnyaka anto akina oma ka tshina di’otema? Naka wɛ ekɔ l’okakatanu lo dikambo sɔ, kete ondo oma lo woho weyɛ bu la lotui tshitshi ndo oma lo lotamanya layɛ.
Kanga otako bu la lotutsha. Ɔnɛ lele la ndjakitshakitsha ekɔ la lotutsha ndo mbikikɛka. Ko wɛ ngande na? Onde wɛ hatokikɛka mbala tshɛ kakotshɛwɔ kɔlɔ? Onto latsha ngasɔ bu l’ekikelo. Naka wɛ ekɔ la ndjakitshakitsha, kete wɛ hatoyadiya. Ohɔ kɛnɛ kakatombe lam’akayadiya ambeki wa Yeso. Vɔ wakawane efula dia mbeya akɔna oleki woke l’atei awɔ. Vɔ wakohɛ dia vɔ tshɛ waki ‘ɛhɔmbɔ w’anyanya’!—Luka 17:10; 22:24; Mako 10:35-37, 41.
Voltaire, ofundji ɔmɔtshi wa la France, akɔmbɔla ndjakitshakitsha oko “anima wahonyi lokumu . . . waha l’otako.” Eelo, ndjakitshakitsha ekɔ yimba ya wɔlamu. Onto lele la ndjakitshakitsha ekɔ la yimba yahonyi lokumu koko aha ya lotamanya. Nde ekɔ la dilɛmiɛlɔ di’efula ndo la loshilambo.
Bonde kahombaso ntsha la wolo dia monga la ndjakitshakitsha? Ele nɛ dia Nzambi ngɛnangɛnaka dionga dia ndjakitshakitsha ndo diɔ tokimanyiyaka dia sho nɔmbwama oma le Nzambi. Oma lo ndjakitshakitsha ka Danyɛlɛ, Jehowa akɔsaka omvutshi ɔsɔ oko “ulangimi” ndo akatome ondjelo ɔmɔtshi dia ndjowɛnya ɛnɛlɔ! (Danyele 9:23; 10:11, 19) Ndjakitshakitsha mbelaka onto ɛlɔlɔ efula. Vɔ wayokosha angɛnyi wa mɛtɛ wakoka ngandji. Kɛnɛ koleki tshɛ ele: vɔ mbelaka ɛtshɔkɔ wa Jehowa. “Difutu dia ndjakitshakitsha la woma wa [Jehowa] dieli: ekundji, nemo la lumu.”—Tukedi 22:4.
[Caption on page 7]
[Caption on page 7]
Mbuta la ndjakitshakitsha ɔnɛ okimwe koka mbɔdja otema