Tɔsake anangɛso l’akadiyɛso wele akanga a mpoke la nɛmɔ!

ƐLƆ kɛnɛ, ekambi waki Nzambi wekɔ nkumbo ka woke ka anangɛso l’akadiyɛso wa lo nyuma kakatatɛ kengama la apami la wamato w’oma ko nshi y’edjedja. L’atei awɔ mbele ndo: Samuɛlɛ, Davidi, Samisɔna, Rahaba, Mɔsɛ, Abarahama, Sara, Nɔa ndo Abɛlɛ. Akanga a mpoke efula wekɔ l’atei w’ekambi waki Jehowa wa kɔlamelo. Ɛnyɛlɔ, anto ahende wakakome Ɛmɛnyi wa Jehowa ntondo lo wodja wa Mongolie ele wadi l’omi w’akanga a mpoke. Ndo l’ɔtɛ wa olowanyi w’asekaso ambetawudi w’akanga a mpoke wa la Russie, Ɛmɛnyi wa Jehowa wakayinge lo tominadi ta lo Erɔpɛ tendana la lotshungɔ lele l’onto.

Nshi nyɛ, ‘ɔhɔmbɔ wa kɔlamelo ndo wa kɛsɔ’ ekɔ lo tondja ekanda l’ɔtɛkɛta w’akanga a mpoke ndo ekɔ lo nɔngɔsɔla nsanganya ya l’etshumanelo ndo ya weke l’ɔtɛkɛta w’akanga a mpoke. (Mat. 24:45) Akanga a mpoke wekɔ lo nkondja wahɔ efula oma lo tɛdikɔ tɔsɔ.a Ko onde wɛ amboyambolaka okakatanu waki l’akanga a mpoke dia mbeka akambo wendana la Nzambi ka mɛtɛ ndo dia mpama lo nyuma la ntondo ka tɛdikɔ tɔsɔ mbɔsama? Onde wɛ ambokanyiyaka kɛnɛ kakokayɛ nsala dia nkimanyiya akanga a mpoke wa lo ngelo kanyu?

La ntondo ka tɛdikɔ ta nshi nyɛ

Naka wɛ mimbola akanga a mpoke waya epalanga woho wakaweye Nzambi, kete vɔ mbeyaka kotɛ woho wakawayaoke mbala ka ntondo kakaweye lokombo laki Nzambi. Vɔ mbeyaka kotɛ nto woho wakatshikitanya dikambo sɔ nsɛnɔ yawɔ ndo wakadiâkimanyiya ɛnɔnyi efula la ntondo ka waa vidɛo kana DVD ya l’ɔtɛkɛta w’akanga a mpoke tondjama dia mbakimanyiya dia vɔ mbeya akambo wa mɛtɛ wa lotshimola wa l’Afundelo. Vɔ mbeyaka kotɛ okakatanu waki la wɔ etena kaki nsanganya y’Akristo kosalemaka ndo kokadimɔmaka l’ɔtɛkɛta w’akanga a mpoke. Onto ɔmɔtshi akadjasɛka suke la wɔ ndo akâfundɛka awui waketshamaka. Ɔnangɛso ɔmɔtshi l’ehoke akeke akambo wa mɛtɛ wa lo Bible ɛnɔnyi esambele la ntondo ka vɔ ndjotatɛ nkadimola l’ɔtɛkɛta w’akanga a mpoke.

Ɛmɛnyi wa Jehowa waya esombe wele akanga a mpoke mbohɔka woho wakawayaokaka etena kakawasambishaka kâmɛ l’anto woka wa l’etshumanelo kawɔ. Lo lonya lɔmɔtshi, vɔ wakakimɛka dibaya diakawafunde awui amɔtshi watasawolaka l’anto lo soko la soko ndo lo lonya lokina vɔ wakakimɛka Tshoto y’Etangelo la Réveillez-vous ! weke katomba. Aki okakatanu wa wolo le wɔ dia mbeka Bible l’akanga a mpoke akina lo nkamba la mikanda wa lofunda wele vɔ tshɛ kombashihodiaka dimɛna. Apandjudi waya esombe wele akanga a mpoke mbohɔka vɔ lawɔ lonyangu laki la wɔ etena kakiwɔ koshihodiaka akambo wa mɛtɛ ndo kakiwɔ kokokaka nsambisha akambo wa mɛtɛ wa lo nyuma dimɛna. Vɔ mbeyaka nto lonyangu laki la wɔ lo woho wakiwɔ la ngandji k’efula otsha le Jehowa, koko komonga l’akoka wa nsala akambo l’eshikikelo tshɛ lo yoho yɔtɔnɛ la ngandji kakɔ. Lande na? Nɛ dia vɔ kondjashikikɛka dia eokelo kawɔ k’akambo wa mɛtɛ kaki mɛtɛ.

Koko, kânga l’atei w’ekakatanu ɛsɔ tshɛ, anangɛso l’akadiyɛso w’akanga a mpoke wakatetemala nama olowanyi awɔ. (Jobo 2:3) Vɔ wakakongɛka l’elongamelo tshɛ le Jehowa. (Osam. 37:7) Kakianɛ, nde ambatshɔkɔla lo yoho y’efula oleki kɛnɛ kakawalongamɛka.

Tende welo wakadje ɔnangɛso ɔmɔtshi l’ehoke lele la wadi l’ana. La ntondo ka vidɛo ya l’ɔtɛkɛta w’akanga a mpoke tondjama, nde akasalaka la wolo dia nɔmbɔla wekelo wa lo nkumbo. Ɔnande mbohɔka ate: “Wekelo wa lo nkumbo wakongaka mbala tshɛ tshondo y’okakatanu le Papa nɛ dia nde aki paka l’abuku ato. Mbala efula nde koshihodiaka kɛnɛ kakafundama. Ndo sho ana taketɛka wekelo wolo le nde. Sho komengengaka dia mbotɛ ɔnɛ nde halembetshisha dimɛna. Kânga mbaki akambo asɔ tshɛ, nde akalɔmbɔlaka wekelo wa Bible tena tshɛ. Nde akɔsaka dia wekelo w’awui waki Jehowa mbele dikambo dioleki ohomba kânga mbakandashamaka sɔnyi lo woho wakinde komonga l’akoka wa nembetshiya awui dimɛna.”

Tekɔ nto l’ɛnyɛlɔ kaki ɔnangɛso Richard lele l’ɛnɔnyi 70, lele tshungu ndo ehoke ladjasɛ la Brooklyn, New York, lo wodja w’États-Unis. Ɔnangɛso Richard mbeyamaka dimɛna lo woho wɔtɔnde lo nsanganya y’Akristo mbala la mbala. Dia ntshɔ lo nsanganya, nde akɔtɔka lo kawolo ndo akatadiaka ahole wemala kawolo dia nde mbeya dihole diahombande nkita. L’ɔtɛ wa tshitshi k’efula ndo loonge l’ekama, wakasɛkɔla losanganya lɔmɔtshi dia ndjolisala lushi lokina. Wakewoya ase etshumanelo tshɛ, koko wakohɛ mbutɛ ɔnangɛso Richard. Etena kakayohɔ anangɛso dui sɔ, vɔ wakayange Richard ndo wakatôtana emadi la ntondo ka Mbalasa ka Diolelo akongɛ la solo dia lotutsha tshɛ dia vɔ ndihola lokuke. Etena kakawawombola lande na kakandaye lo mbalasa l’atei wa loonge l’ekama l’efula lɔsɔ, nde akakadimola ate: “L’ɔtɛ wa ngandji kokami Jehowa.”

Kakɔna kakokayɛ nsala?

Onde akanga a mpoke wekɔ lo ngelo kanyu? Onde wɛ hakoke mbeka ɔtɛkɛta w’akanga a mpoke dia sawolaka la wɔ? Tena efula akanga a mpoke mongaka la lɔsɛngɔ ndo la solo dia lotutsha etena ketshawɔ anto akina ɔtɛkɛta awɔ. Wɛ mbeyaka tohomana la kanga ehoke l’ahole watayeteta kana l’esambishelo. Kakɔna kakokayɛ nsala? Yanga dia nsawola la nde lo nkamba la tɔjɛstɛ, esato, asango, lo mbofundɛ kana lo nsanganya awui asɔ tshɛ. Oyadi kânga nde ambɛnya dia nde hayasha l’akambo wa mɛtɛ, tɛ Ɔmɛnyi wa Jehowa wele ehoke kana ɔnɛ leya ɔtɛkɛta w’akanga a mpoke dia nde kotshindɛ. Nde mbeyaka ndjetawɔ naka nde sambishama l’ɔtɛkɛta w’akanga a mpoke.

Ondo wɛ ekɔ lo mbeka ɔtɛkɛta w’akanga a mpoke ndo ekɔ lo mbɔtɔ l’etshumanelo kasalema nsanganya l’ɔtɛkɛta w’akanga a mpoke. Ngande wakokayɛ ndeka manyamanya ɔtɛkɛta akɔ? Lande na kahayakambe l’ɔtɛkɛta w’akanga a mpoke kânga etena kasawolayɛ l’apandjudi watɛkɛta? Kɛsɔ mbeyaka kokimanyiya dia wɛ manyamanya ɔtɛkɛta w’akanga a mpoke. Mbala efula, wɛ mbeyaka pembama dia ntɛkɛta lɔtɛkɛta lo dihole dia nkamba l’ɔtɛkɛta w’akanga a mpoke. Koko, oko walɔmbamadiɔ dia mbeka ɔtɛkɛta tshɛ, wɛ pombaka monga l’etete dia mbomanyamanya dimɛna.

Nsala la wolo dia mbeka ɔtɛkɛta w’akanga a mpoke mɛnyaka ngandji ndo dilɛmiɛlɔ diele la so otsha le anangɛso l’akadiyɛso w’akanga a mpoke. Ohokanyiya lonyangu longa la akanga a mpoke lushi la lushi l’ɔtɛ wahawakoke mboka kɛnɛ kata asekawɔ wa l’olimu kana wa la kalasa. Ɔnangɛso ɔmɔtshi lele kanga ehoke mbutaka ate: “Lushi tshɛ anto wele suke la mi tɛkɛtaka lɔtɛkɛta. Mbala efula dimi ndjaokaka okalema ndo oko opoko ndo dui sɔ kɔmɔlakami ndo mbetɛkami ɛkɛlɛkɛlɛ. Ndoko tɔtɛkɛta takoka kɛnɛmɔla mɛtɛ woho wayaokami.” Nsanganya yaso ekɔ dihole diahomba anangɛso l’akadiyɛso w’akanga a mpoke ndjaoka dimɛna, ndeshama dimɛna lo nyuma, sawolaka asawo wakeketsha ndo monga la lɔngɛnyi l’asekawɔ atɛmɔdi.​—Joa. 13:34, 35.

Ko kayotota dia elui wa totshitshɛ w’akanga a mpoke wasangana kâmɛ lo tshumanelo diasala nsanganya l’ɛtɛkɛta ekina? Asawo wa lo nsanganya kadimɔmaka dikambo diawɔ. Dia vɔ mboka dimɛna kɛnɛ ketshama, akanga a mpoke mbidjasɛka l’ekala wa la ntondo lo Mbalasa ka Diolelo. Dui sɔ mbakimanyiyaka dia vɔ mɛnaka okadimudi ndo ɔtɛkɛtshi dimɛna. Kɛnɛ keta mɛnyaka dia ase etshumanelo akina mbekesanɛka la tshelo shɔ dimɛna ndo hayowaekola yimba. Dui sɔ salemaka nto lo nsanganya ya weke yahombawɔ nkadimola l’ɔtɛkɛta w’akanga a mpoke. Ase etshumanelo wasala la wolo dia kadimolɛ akanga a mpoke mandɔmaka efula lo woho wasalawɔ la wolo dia mbakadimolɛ lo yoho ya dimɛna ndo yokɛma hwe.

Ondo wɛ ekɔ l’etshumanelo kele ndo la olui w’akanga a mpoke wahombawɔ kadimolɛka nsanganya l’ɔtɛkɛta awɔ. Kakɔna kakokayɛ nsala dia mɛnya anangɛso l’akadiyɛso w’akanga a mpoke ngandji kawaokayɛ? Elɛkawɔ lakayɛ ndo naka kokaka, eka yema y’ɔtɛkɛta awɔ. Ɔtɛkɛta watokodjɛke wekamu dia wɛ nsawola la wɔ ndo mbaɛnya ngandji kawaokayɛ. Wɛ ayotana yoho mɔtshi ya nsawola la wɔ, ndo naka wɛ mbaɛnya ngandji ka ngasɔ, kete wɛ ayonga la ɔngɛnɔngɛnɔ wahayohɛki. (1 Joa. 4:8) Sho koka mbeka awui efula oma le anangɛso l’akadiyɛso w’akanga a mpoke. Vɔ nangaka asawo efula, wekɔ la yimba efula ndo nangaka tɔsɛkɛsɛkɛ. Ɔnangɛso ɔmɔtshi lele ambutshi ande wakɔ ahende wekɔ akanga a mpoke mbutaka ɔnɛ: “Dimi lakole paka lale akanga a mpoke ndo vɔ wakakimanyiya efula woho wahamakokaki mbafuta. Sho koka mbeka akambo efula oma le anangɛso l’akadiyɛso wele akanga a mpoke.”

Jehowa nangaka atɛmɔdi ande wele la kɔlamelo, mbidja ndo akanga a mpoke. Ɛnyɛlɔ kawɔ ka mbetawɔ ndo ka ekikelo ekɔ l’atei wa akambo w’ɔlɔlɔ wele l’okongamelo waki Jehowa. Ɔnkɔnɛ, nyɛsɔ tɔsake anangɛso l’akadiyɛso w’akanga a mpoke la nɛmɔ!

[Nɔte ka l’ɛse ka dikatshi]

[Osato wa lo lɛkɛ 31]

Kanga ehoke mbeyaka ndeka ngɛnangɛna losango la Diolelo naka vɔ mbosambisha l’ɔtɛkɛta w’akanga a mpoke

[Esato wa lo lɛkɛ 32]

Nsanganya yaso yekɔ dihole diahomba anangɛso l’akadiyɛso w’akanga a mpoke ndjaoka dimɛna ndo keketshama lo nyuma