Tekɔ anto waki jehowa l’ɔtɛ wa ngandji kande ka mamba
‘Anto wa Jehowa mbeso.’—ROMO 14:8.
1, 2. a) Diɛsɛ diakɔna diele la so? b) Ambola akɔna wayotɔsɛdingola?
WODJA w’Isariyɛlɛ waki mɛtɛ la diɛsɛ dia woke etena kakawatɛ Jehowa ate: “Nyu nyayuyala wudja ami l’atei a wedja tshe”! (Etum. 19:5) Ɛlɔ kɛnɛ, ase etshumanelo k’Akristo vɔ lawɔ wekɔ la diɛsɛ dia monga anto waki Jehowa. (1 Pet. 2:9; Eny. 7:9, 14, 15) Ɔsɔ ekɔ diɛsɛ diakoka tosha ɛlɔlɔ wa pondjo pondjo.
2 Monga anto wa Jehowa ekɔ diɛsɛ diele l’ɔkɛndɛ. Anto amɔtshi mbeyaka ndjambola ɔnɛ: ‘Onde layonga l’akoka wa nsala kɛnɛ kanɔmba Jehowa? Naka lambosala pɛkato, onde nde ayomboka ɔkɔngɔ? Onde monga onto laki Jehowa mbidjakami lo shasa?’ Bu kɔlɔ ndjaoka ambola asɔ. Koko, ntondotondo, sho pombaka nsɛdingola dimbola di’ohomba nɛ: Ɛlɔlɔ akɔna wakondjaso lo monga anto waki Jehowa?
Monga anto waki Jehowa mbelaka ɔngɛnɔngɛnɔ
3. Ɛlɔlɔ akɔna wakakondja Rahaba lo yɛdikɔ yakandɔshi ya nkambɛ Jehowa?
3 Onde anto kondjaka wahɔ ɔmɔtshi lo woho wewɔ anto waki Jehowa? Tende ɛnyɛlɔ kaki Rahaba numba kɛmɔtshi kakasɛnaka l’osomba wa Jeriko y’edjedja. Aha la tâmu, nde akodiama lo ditshelo dia kɔlɔ dia l’ɔtɛmwɛlɔ wa tozambizambi ta kashi ta la Kanana. Koko, etena kakandoke nkumu y’etshumba wakakimanyiya Jehowa ase Isariyɛlɛ dia mbidja nde akashikikɛ dia Jehowa mbele Nzambi ka mɛtɛ. Ɔnkɔnɛ, nde akadje lɔsɛnɔ lande lo wâle dia nkokɛ ekambi waki Nzambi wakandasɔnɛ ndo lo nsala ngasɔ nde akayaɛkɛ le wɔ lo kɛnɛ kendana la nshi yande yayaye. Bible mbutaka ɔnɛ: “Rahaba, kanga munanyi, kunyindjama pupu lu etsha andi lam’akandalungula akendji, ku akâtumi lu mbuka kekina?” (Jak. 2:25) Ohokanyiya ɛlɔlɔ wakandayokondja etena kakandakome onto ɔmɔtshi la l’atei wa wodja wakɛdiama waki Nzambi, mbuta ate wodja waketshama Ɛlɛmbɛ waki Nzambi wendana la ngandji ndo la losembwe. Nde aki mɛtɛ l’ɔngɛnɔngɛnɔ w’efula lo woho wakandatshike yoho yande ya lɔsɛnɔ y’edjedja! Nde akayotshukanaka l’ose Isariyɛlɛ ɔmɔtshi ndo akote Bɔaza lakayongaka okambi ɔmɔtshi waki Nzambi wa kɔlamelo.—Jas. 6:25; Ruta 2:4-12; Mat. 1:5, 6.
4. Wahɔ akɔna wakakondja Ruta l’ɔtɛ wa yɛdikɔ yakandɔshi ya nkambɛ Jehowa?
4 Ruta k’ose Mɔaba nde lawɔ akɔshi yɛdikɔ ya nkambɛ Jehowa. Etena kakinde eke osekaseka, ondo nde akatɛmɔlaka Kɛmɔshɛ ndo tozambizambi tokina t’ase Mɔaba, koko nde akayeyaka Jehowa Nzambi ka mɛtɛ ndo nde akayotshukanaka l’ose Isariyɛlɛ ɔmɔtshi lakalawɔ lo wodja awɔ. (Adia Ruta 1:1-6.) L’ɔkɔngɔ diko, Ruta nde la Ɔrɔpa wakonɛ vɔ la okilo awɔ wa womoto Naɔmi dia ntshɔ otsha la Bɛtɛlɛhɛma, koko Naɔmi akâtshutshuya dia vɔ nkalola otsha lawakawɔ. Komonga dui dia tshitshɛ le wɔ dia vɔ ntshɔ todjasɛ l’Isariyɛlɛ. Ɔrɔpa ‘akakalola lo wodja awɔ ndo le tozambizambi tawɔ’ koko Ruta akatone nkalola. Nde akɔshi yɛdikɔ shɔ oma lo mbetawɔ ndo akeyaka onto akɔna akandalangaka kambɛ. Nde akatɛ Naɔmi ate: “Tuntshutshiyaki dia dimi nkutshika kuyanga mamitwana la ye. Lene ayuyutsho, kayumotsho ndu dimi. Wudja aye, wayuyala wudja ami, ndu [Nzambi k]aye, ayuyala [Nzambi k]ami.” (Ruta 1:15, 16) L’ɔtɛ wa yɛdikɔ yakandɔshi ya nkambɛ Jehowa, Ruta akakondja wahɔ oma lo Ɛlɛmbɛ waki la yɛdikɔ ya lânde dikambo dia wadi waki edo, ase wola ndo wanɛ waki komonga la bɛtshi dia nkɛtɛ. Nde akatane ɔngɛnɔngɛnɔ, ekokelo ndo lotui tshitshi l’ahafu waki Jehowa.
5. Kakɔna kamboyɛna lo dikambo di’anto wakambɛ Jehowa la kɔlamelo?
5 Ondo wɛ mbeyaka anto amɔtshi wele l’ɔkɔngɔ wa vɔ ndjakimɔ le Jehowa wakatetemala mbokambɛ olimu la kɔlamelo l’edja k’ɛnɔnyi akumi. Mbolawɔ wahɔ wakawakondja lo mbokambɛ. Kânga mbele ndoko onto lahahomana l’ekakatanu, tolembetelo ta shikaa tekɔ tasukɛ ɛtɛkɛta w’omembi w’esambo wata ɔnɛ: “Wudja weli la [Jehowa] uku [Nzambi k]awo, weko la ongenongeno!”—Osam. 144:15.
Jehowa hatɔlɔmbɛ kɛnɛ kahatakoke nsala
6. Lande na kahatahombe mboka wɔma ɔnɛ hatotonga l’akoka wa nsala kɛnɛ katɔlɔmba Jehowa?
6 Wɛ mbeyaka ndjambola dia kana wɛ ayonga l’akoka wa nsala kɛnɛ kakɔlɔmba Jehowa. Ekɔ dui dia wɔdu di’onto ndjakiyanya otamanya lo kɛnɛ kendana la monga okambi waki Nzambi, wasɛna lo yoho yɔtɔnɛ l’ɛlɛmbɛ ande ndo watɛkɛta lo lokombo lande. Ɛnyɛlɔ, Mɔsɛ akɔshi dia nde kema l’akoka etena kakandatomama dia tɔtɛkɛta l’ase Isariyɛlɛ ndo la nkumekanga ka l’Edjibito. Koko, Nzambi kɔnɔmba Mɔsɛ kɛnɛ kakinde komonga l’akoka wa nsala. Jehowa ‘akawetsha kɛnɛ kakandahombe nsala.’ (Adia Etumbelu 3:11; 4:1, 10, 13-15.) Lam’ele Mɔsɛ aketawɔ ekimanyielo kaki Nzambi, nde akakondja ɔngɛnɔngɛnɔ waya oma lo nsala lolango laki Nzambi. Woho akɔ wâmɛ mbele, Jehowa hatɔlɔmbɛ kɛnɛ keso bu l’akoka wa nsala. Nde mbeyaka dia sho kema kokele ndo nde nangaka tokimanyiya. (Osam. 103:14) Nkambɛ Nzambi oko ombeki waki Yeso ekɔ dui diakeketsha koko aha dui diatɔlɛndja, nɛ dia yoho ya lɔsɛnɔ shɔ mbelaka anto akina ɛlɔlɔ ndo ngɛnyangɛnyaka otema wa Jehowa. Yeso akate ate: “Nyuyi le mi . . . ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema.”—Mat. 11:28, 29.
7. Lande na kahombaso monga l’eshikikelo dia Jehowa ayotokimanyiya dia sho nsala kɛnɛ kalongamɛnde le so?
7 Jehowa ayotoshaka nshi tshɛ ekeketshelo kele la so ohomba edja tshɛ kayotɔlɔmbaka ekimanyielo. Ɛnyɛlɔ, ondo Jeremiya kondekaka ntɛkɛta dimɛna. Ɔnkɔnɛ, etena kakɔsɔnɛ Jehowa dia nde monga ɔprɔfɛta Ande, Jeremiya akate ate: “Hayii! Khumadiondjo [Jehowa], we henyi, dimi haleyi nteketa, ne dia dimi leki dikenda.” L’ɔkɔngɔ diko, nde akayotaka ɔnɛ: “Dimi haloteketa ntu lu lukumbu landi.” (Jer. 1:6; 20:9) Koko, oma l’ekeketshelo kaki Jehowa, Jeremiya akayongaka l’akoka wa nsambisha l’edja k’ɛnɔnyi 40 w’etondo losango laki anto kolingɛnyangɛnyaka. Jehowa akoshikikɛ mbala ko mbala ɔnɛ: “Dimi leko kame laye dia nkutshungula.”—Jer. 1:8, 19; 15:20.
8. Ngande wɛnyaso dia sho ndjaɛkɛka le Jehowa?
8 Oko wakakeketsha Jehowa Mɔsɛ la Jeremiya, nde kokaka tokimanyiya dia sho nsala kɛnɛ kalɔmbande Akristo ɛlɔ kɛnɛ. Dui dioleki ohomba ele ndjaɛkɛ le Nzambi. Bible mbutaka ɔnɛ: “Ekamaki [Jehowa] l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye.” (Tuk. 3:5, 6) Sho mɛnyaka dia sho ndjaɛkɛka le Jehowa etena ketawɔso ekimanyielo katoshande lo tshimbo y’Ɔtɛkɛta ande ndo y’etshumanelo. Naka sho mbetawɔ dia Jehowa nɔmbɔla wanya aso lo lɔsɛnɔ laso, kete ndoko ɛngɔ kayotoshimba dia sho monga la kɔlamelo le nde.
Jehowa kanɛka ekambi ande l’onto ndo l’onto
9, 10. Woho akɔna w’ekokelo katɛkɛtama l’Osambu 91?
9 Etena kakanawɔ yimba dia kana vɔ kokaka ndjakimɔ le Jehowa, anto amɔtshi mbeyaka ndjambola dia wâle waya lo nsala pɛkato ndo lo mbikashema le Jehowa. Diɛsɛ ko, Jehowa toshaka ekokelo kele la so ohomba dia nama diɔtɔnganelo dia nɛmɔ efula diele lam’asaso la nde. Nyɛsɔ tende woho wɔtɛkɛtami dikambo sɔ l’Osambu 91.
10 Osambu ɔsɔ tatɛka lo mbuta ɔnɛ: “One latudjaseka lu [dihole dia woshɛshɛ di]a Khum’Ulungu, kayuyala lu didjidji dia Kanga-Wulu-Tshe. Dimi latutaka dia [Jehowa] nti: Ndi keli eshamelu kami la lungeli lami, [Nzambi k]ami katumekamaka. Ndi ayukuhandja uma lu djunga y’umambi [a tofudu].” (Osam. 91:1-3) Tolembete dia Nzambi ndakaka dia nde ayokokɛ wanɛ wawoka ngandji ndo wayaɛkɛ le nde. (Adia Osambu 91:9, 14.) Woho akɔna w’ekokelo kɛsɔ? Jehowa akakokɛ ekambi ande ɛmɔtshi wa lo nshi y’edjedja lo demba ndo lo tena dimɔtshi l’oyango wa nkokɛ ɔlɔndji wakahombe ndjotɔ Mɛsiya wakalakema. Koko, ekambi ekina efula wa kɔlamelo wakandama lo nkanu, wakahɛnyahɛnyama ndo wakadiakema l’esehe tshɛ l’oyango wa mbashishɛ kɔlamelo yawɔ le Nzambi. (Heb. 11:34-39) Vɔ wakakondja dihonga diaki lawɔ ohomba dia mbikikɛ nɛ dia Jehowa akakokɛ lo nyuma oma lo wâle waya lo nshisha olowanyi. Ɔnkɔnɛ, Osambu 91 kokaka mbokɛma oko daka di’ekokelo ka lo nyuma.
11. Ele ‘dihole dia woshɛshɛ dia Nkum’Olongo,’ ndo Nzambi waa na wakokɛnde lɛkɔ?
11 ‘Dihole dia woshɛshɛ dia Nkum’Olongo’ diatɛkɛtama l’osambo ɔsɔ ekɔ dihole dia didjidji di’ekokelo ka lo nyuma. Wanɛ wadjasɛ lo dihole sɔ, kokamɛka oma le ɛngɔ tshɛ kana onto tshɛ ladja mbetawɔ kawɔ ndo ngandji kokawɔ Nzambi lo wâle. (Osam. 15:1, 2; 121:5) Diɔ diekɔ dihole di’eshamelo nɛ dia anto wele bu ambetawudi hawodieye. Lo dihole diakɔ, Jehowa kokɛka anto wata lo mɛtɛ ɔnɛ: ‘Wɛ ekɔ Nzambi kami kayaɛkɛmi le nde.’ Naka sho ntshikala lo dihole di’eshamelo sɔ, kete hatotoyakiyanya otamanya dia Nzambi ayotɔsɛka naka tambotala lo djonga yaki Satana lele ‘omambi wa tofudu.’
12. Awui akɔna wadja diɔtɔnganelo diasaso la Nzambi lo wâle?
12 Kakɔna kadja diɔtɔnganelo dia dimɛna diele lam’asaso la Nzambi lo wâle? Omembi w’esambo akashile awui efula wadja diɔtɔnganelo sɔ lo wâle, l’atei w’awui akɔ mbele ndo “elandu watudianganaka l’utshu . . . [ndo] elanyelu katuyakaka la midi.” (Osam. 91:5, 6) ‘Omambi wa tofudu’ mundaka anto lo nsaki ka dipanda. (2 Kor. 11:3) Nde mundaka anto akina lo mbatshutshuya lo lokaki, lotamanya ndo lo nsaki ka lomombo la l’emunyi. Ndo nde minganyiyaka anto akina lo waa filozofi yele oko ngandji k’otamanya ka wodja, wetshelo w’ohilwelo ndo ɔtɛmwɛlɔ wa kashi. (Kol. 2:8) Ndo anto efula wekɔ lo ntala lo djonga ya dieyanelo dia mindo. Awui asɔ wambokonya miliyɔ y’anto dia nshisha ngandji kokawɔ Nzambi.—Adia Osambu 91:7-10; Mat. 24:12.
Woho wa nkokɛ ngandji kokaso Jehowa
13. Ngande watokokɛ Jehowa oma lo awui wadja lonyuma laso lo wâle?
13 Woho akɔna wakokɛ Jehowa ekambi ande lo wâle wa lo nyuma ɛsɔ? Osambu 91 mbutaka ate: “Ndi ayukosengwela andjelo andi. Dia vo nkulama lu mbuka yaye tshe.” (Osam. 91:11) Andjelo wa l’olongo tɔlɔmbɔlaka ndo tokokɛka dia sho nsambisha lokumu l’ɔlɔlɔ. (Eny. 14:6) Lâdiko dia andjelo, dikumanyi di’Akristo tokokɛka diaha sho kesama oma lo wetshelo wa kashi lo mbetshaka awui w’oma l’Afundelo l’eshikikelo tshɛ. Vɔ kokaka nkimanyiya onto tshɛ layanga dia ntshika mbekelo mɔtshi ya kɔlɔ. (Tito 1:9; 1 Pet. 5:2) Ndo nto, ‘ɔhɔmbɔ wa kɔlamelo ndo wa kɛsɔ,’ toshaka mbo ya ndɛ ya lo nyuma yatokokɛ oma lo wetshelo w’ohilwelo, oma l’awui walomialomia nsaki ya mindo, oyangelo w’ɔngɔnyi, wa lokumu ndo oma l’awui akina efula wa kɔlɔ. (Mat. 24:45) Kakɔna kambokokimanyiya dia wɛ nshika tanga la ntondo ka wâle ɛsɔ?
14. Ngande wakokaso nkondja wahɔ oma lo ekokelo katosha Nzambi?
14 Kakɔna kahombaso nsala dia ntshikala lo ‘dihole dia woshɛshɛ’ diaki Nzambi di’ekokelo? Oko watetemalaso nsala la wolo dia ndjakokɛ oma lo wâle wa lo demba wele oko aksida, diakatanelo kana hemɔ, mbele sho pombaka ntetemala nsala la wolo dia ndjakokɛ oma lo wâle wa lo nyuma. Ɔnkɔnɛ, mbala la mbala sho pombaka kambaka la ɛlɔmbwɛlɔ katosha Jehowa l’ekimanyielo k’ekanda aso, ka nsanganya ya l’etshumanelo ndo ya weke. Sho nyangaka nto alako oma le dikumanyi. Shi ndo sho kondjaka wahɔ oma lo waonga wotshikitanyi wakɛnɛmɔla anangɛso l’akadiyɛso w’Akristo? Lo mɛtɛ, woho wasanganaso l’etshumanelo tokimanyiyaka dia sho monga la lomba.—Tuk. 13:20; adia 1 Petero 4:10.
15. Bonde kakokaso monga l’eshikikelo dia Jehowa nkoka tokokɛ la ntondo ka dikambo tshɛ diakoka tokonya diaha sho mbetawɔma le nde?
15 Sho kokaka monga l’eshikikelo dia Jehowa kokaka tokokɛ oma lo dikambo tshɛ diakoka tokonya diaha sho mbetawɔma le nde. (Romo 8:38, 39) Nde akakokɛ etshumanelo oma lo shɛngiya ya wolo y’ɛtɛmwɛlɔ ndo la ntondo ka atunyi w’ase pɔlitikɛ wokongaka nshi tshɛ l’oyango aha wa todiaka koko wa tanganya la Nzambi kaso k’ekila. Daka diaki Jehowa nɛ diekɔ lo kotshama: “Ehumo tshe kambutshulama dia ndo la ye huluwana.”—Is. 54:17.
Onto akɔna atosha lotshungɔ?
16. Lande na kele andja ɔnɛ hawokoke tosha lotshungɔ?
16 Onde woho weso anto waki Nzambi todjaka lo shasa? Kema, monga anto wa l’andja ɔnɛ mbatodja lo shasa. Andja ɔnɛ wambanganaka etale la Jehowa ndo wekɔ lo nɔmbɔma oma le jambizambi ya ngala yanda anto lo lɔhɔmbɔ. (Joa. 14:30) Ɛnyɛlɔ, dikongɛ di’akambo diaki Satana kambaka l’ekakatanu wendana l’ekondjelo dia mbidja anto lo shasa. (Ɛdika la Enyelo 13:16, 17.) Pɛkato lawɔ kekɔ la wolo wa minda anto lo lɔhɔmbɔ. (Joa. 8:34; Heb. 3:13) Ɔnkɔnɛ kânga mbakoka anto wele bu ambetawudi ndaka dia mbisha anto lotshungɔ etena kakeketshawɔ anto dia nsɛna yoho ya lɔsɛnɔ yahɔtɔnɛ la wetshelo waki Jehowa, onto tshɛ lâhokamɛ ayondama esadi eto lo lɔhɔmbɔ la pɛkato ndo lo yoho ya lɔsɛnɔ yatatetemala ndana.—Romo 1:24-32.
17. Lotshungɔ lakɔna latosha Jehowa?
17 Lo wedi okina, Jehowa ayotokokɛ oma l’oseka ɛngɔ tshɛ kakoka tosalɛ kɔlɔ naka sho ndjaɛkɛ le nde. Lo toho tɔmɔtshi, awui wele la so wekɔ oko w’onto lele la hemɔ layaɛkɛ tshɛ le munganga ɔmɔtshi wa manamana wakoka mbosakɛ dimɛna. Sho tshɛ tekɔ la ɛngɔ kɛmɔtshi kadja nsɛnɔ yaso lo wâle, mbuta ate pɛkato kakatahowɔ. Paka lo ndjaɛkɛ le Jehowa lo tshimbo y’olambo wa Kristo mbakokaso nongamɛ dia pandɔ oma l’etombelo wa pɛkato ndo nsɛna pondjo pondjo. (Joa. 3:36) Oko wakoka mpama wɛkamu wadjaso le munganga etena kokaso nkumu yendana la diewo diande mbayohama wɛkamu aso le Jehowa etena katetemalaso mbeka akambo wendana la nde. Omalɔkɔ, sho tetemalaka mbeka Ɔtɛkɛta wa Nzambi dimɛna dimɛna nɛ dia dui sɔ diayotokimanyiya dia sho mbôka ngandji lo yoho yayonya oseka wɔma tshɛ wakoka ndja lo monga anto ande.—1 Joa. 4:18.
18. Etombelo akɔna wayokondja anto wasɔna dia monga anto waki Jehowa?
18 Jehowa mbishaka anto tshɛ lotshungɔ la mbɔsaka tɛdikɔ. Ɔtɛkɛta ande mbutaka ɔnɛ: “Nyosonole lumu, dia nyu la an’anyu ndjala la lulumbi, lu mbuka [Jehowa, Nzambi k]anyu, ngandji.” (Euh. 30:19, 20, sho mbɛnganyisha alɛta ango.) Nde nangaka dia sho mɛnya ngandji kawokaso lo nsɔna dia mbokambɛ la lolango laso. Lo dihole dia todja lo shasa, monga anto waki Nzambi kokaso ngandji ayotokimanyiya dia sho monga l’ɔngɛnɔngɛnɔ.
19. Lande na kele woho weso anto waki Jehowa ekɔ djembetelo ya ngandji kande ka mamba?
19 Oko weso atshi wa pɛkato, sho hatokoke monga anto waki Nzambi ka kokele. Paka oma lo ngandji kande ka mamba mbakoka dikambo sɔ salema. (2 Tim. 1:9) Ɔnkɔnɛ Paulo akafunde ate: “Naka shu teko la lumu keti shu teko la lumu le Khumadiondjo. Naka shu tambuvo, keti shu tambuvo le Khumadiondjo. Okone kana teko la lumu, kana tambuvo shu teko wa Khumadiondjo.” (Romo 14:8) Hatonyangaki pondjo lo woho wakatasɔnɛ dia monga anto waki Jehowa.
Ngande wayoyokadimola?
• Ɛlɔlɔ akɔna waya lo monga anto waki Jehowa?
• Lande na keso l’akoka wa nsala kɛnɛ kalongamɛ Nzambi le so?
• Ngande wakokɛ Jehowa ekambi ande?
[Esato wa lo lɛkɛ 8]
Mbola anto akina wahɔ wakondjawɔ lo monga anto waki Jehowa
[Osato wa lo lɛkɛ 10]
Naa toho tɔmɔtshi tatokokɛ Jehowa?