Yasukanya la Nzambi

Etena kadimanyiya Nzambi, onde nde mbohɛka?

OKADIMWELO wa tshena pe ele: Eelo. Jehowa akalake lo dikambo di’anto wetawɔnde ate: “Dimi layadimanyia uhedia awo, handjuho kolo kawo ntu.” (Jɛrɛmiya 31:34) Ɔnkɔnɛ, Jehowa toshikikɛka dia etena kadimanyiyande atshi wa pɛkato wayatshumoya, nde hohɔ pɛkato yawɔ kânga yema tshitshɛ. Onde kɛsɔ nembetshiyaka ɔnɛ Otungi w’andja bu l’akoka wa mbohɔ pɛkato yakandadimanyiya? Ɛtɛkɛta waki Ɛzɛkiyɛlɛ tokimanyiyaka dia sho mbeya woho wadimanyiya Nzambi ndo wôhɛnde pɛkato.—Adia Ɛzɛkiyɛlɛ 18:19-22.

Lo nkamba la ɔprɔfɛta Ɛzɛkiyɛlɛ oko yɛmba awui yande, Jehowa akewoya dombwelo diande otsha le ase Juda l’ase Jerusalɛma waki komonga la kɔlamelo. Wodja lo tshɛ kawɔ wakoke ɔtɛmwɛlɔ wa Jehowa ɔkɔngɔ ndo wakalodia nkɛtɛ l’awui wa ngala. Jehowa akatewoyisha ɔnɛ osomba wa Jerusalɛma wayolanyema oma le ase Babilɔna. Koko, kânga mbakandewoya dombwelo diande, Jehowa akawaewoya losango l’elongamelo. Onto tshɛ akahombe nsala ɔsɔnwɛlɔ ande hita; nɛ dia onto l’onto aki l’onongo wa ditshelo diande.—Divɛsa 19, 20.

Ko kakɔna kakahombe nsalema naka onto ɔmɔtshi ambotshika akambo wa kɔlɔ ko osala akambo w’ɔlɔlɔ? Jehowa akate ate: “Naka untu a kolo ayukadimo uma lu kolo yandi yakandatshaka, ndu ayulamaka elembe ami, la ayutshaka kene keli ololo ndu usimbwi, mete ndi ayulumba; ndi huvo.” (Divɛsa 21) Eelo, Jehowa aki suke dia ‘dimanyiya’ otshi wa pɛkato wakatshike nsala kɔlɔ ndo waki la ndjatshumuya ka mɛtɛ.—Osambo 86:5.

Ko, kayotota dia pɛkato yakandasale? Jehowa akalembetshiya ate: “Ehedia andi tshe wakandatshaka, wayuhamamela.” (Divɛsa 22) Lembetɛ dia pɛkato y’onto layatshumoya “[y]ayuhamamela.” Lande na kediɔ dui dia diambo?

Lo Bible, tshɛkɛta ya lo Hɛbɛru yokadimɔmi ɔnɛ “mbohɔ” kokaka nembetshiya awui efula koko aha tsho nkanyiya dikambo diambetaka. Lo kɛnɛ kendana la tshɛkɛta shɔ, dibuku dimɔtshi mbutaka ɔnɛ: “Mbala efula, [yɔ] nembetshiyaka etshelo kɛmɔtshi kɔsɔhanyemi la vɛrbɛ y’otshelo.” Ɔnkɔnɛ, “mbohɔ” kokaka nembetshiya “nsala.” Oma lɔkɔ, etena kata Jehowa lo dikambo di’otshi wa pɛkato wayatshumoya ɔnɛ pɛkato yande ‘yayohamamela,’ Nde ekɔ lo nanga mbuta dia Nde hatosha otshi wa pɛkato dilanya nto l’ɔtɛ wa pɛkato shɔ, ɛnyɛlɔ lo mbofunda kana mbosha dilanya.a

Ɛtɛkɛta wele lo Ɛzɛkiyɛlɛ 18:21, 22 mɛnyaka woho wadimanyiya Jehowa pɛkato tshɛ lo tshɛ ndo dui sɔ minandaka etema aso. Etena katodimanyiya Jehowa pɛkato yaso, nde hotosha dilanya to pondjo lo nshi yayaye l’ɔtɛ wa pɛkato yakɔ. Koko, nde mbokaka pɛkato y’onto lakayatshumoya ɔkɔngɔ. (Izaya 38:17) Ekɔ oko nde dimulaka pɛkato yakɔ.—Etsha 3:19.

Oko weso anto wele kema kokele, tekɔ l’ohomba wa nkɛtshi ka Nzambi. Ndo nto, sho salaka pɛkato tena la tena. (Rɔmɔ 3:23) Koko, Jehowa nangaka dia sho mbeya ɔnɛ naka sho ndjatshumoya l’otema ɔtɔi, kete nde ayotodimanyiya. Ndo etena kadimanyiyande, nde mbohɛka, mbuta ate nde hatohɔ pɛkato yaso l’oyango wa tofunda kana tosha dilanya nto l’ɔtɛ ayɔ. Shi ɔsɔ ekɔ dui di’esambelo! Shi nkɛtshi kaki Nzambi kotshutshuyaka dia wɛ nyomoleka ndjasukanya la nde?

[Nɔte ka l’ɛse ka dikatshi]