Ambutshi, nyetshake ananyu oma ko tɔkɛndakɛnda tawɔ

BIBLE mbutaka ɔnɛ: “Enda, ana weko ushasha uma le [Jehowa], ee, elua w’uma l’utema weko difutu di’uma le ndi.” (Osam. 127:3) Aha la taamu, ambutshi mongaka l’ɔngɛnɔngɛnɔ w’efula etena kotɔ ɔna.

Koko laadiko di’ɔngɛnɔngɛnɔ, eotwelo k’ɔna mbelaka ɛkɛndɛ wa wolo. Ɛnyɛlɔ, di’ɔna mbola la demba dia dimɛna, nde pombaka ntatɛ ndeshama dimɛna. Dia nkimanyiya ɔna dia nde nshikimala l’ɔtɛmwɛlɔ wa mɛtɛ, nde ekɔ l’ohomba wa ndeshama lo nyuma ndo nɔmbwama oma le ambutshi ande wasala la wolo dia nkakatshiya ɛlɛmbɛ waki Nzambi l’otema ande. (Tuk. 1:8) Ko etena kakɔna kahomba ntatɛ olowanyelo ɔsɔ ndo kakɔna kalɔmbama dia nsala dui sɔ?

OHOMBA WA WETSHELO W’AMBUTSHI

Tɔsɛdingole Ɛnyɛlɔ kaki Manɔa laki lo nkumbo ka Danɛ, ɔnɛ lakasɛnaka l’osomba wa Zora wa l’Isariyɛlɛ w’edjedja. Ondjelo wa Jehowa akatɛ wadi aki Manɔa laki ekomba ate nde ayota ɔna. (Emb. 13:2, 3) Manɔa pami ka kɔlamelo kɛsɔ nde la wadɛnde kombidja taamu ɔnɛ daka diaki Jehowa sɔ hadiotokotshama. Koko vɔ wakayakiyanyaka di’akambo amɔtshi. Manɔa akalɔmbɛ ate: “Khumemi li, etawo umvutshi aye ako lakayatumi nkalula le su, dia ntetsha akambu wayutuhumba ntshela ona layututa.” (Emb. 13:8) Manɔa nde la wadɛnde wakayakiyanyaka lo woho wakawahombe ndjodia ɔnɔsɔ. Aha la taamu, vɔ waketsha Samisɔna k’ɔnawɔ ɛlɛmbɛ waki Nzambi ndo wakakondja etombelo w’amɛna. Bible mbutaka ɔnɛ: ‘Nyuma kaki Jehowa kakahema Samisɔna.’ Etombelo waki la dui sɔ ele, Samisɔna akasale elimu wa wolo etena kakandakambaka oko shushi l’Isariyɛlɛ.​—Emb. 13:25; 14:5, 6; 15:14, 15.

Ko etena kakɔna kahomba ambutshi ntatɛ mbetsha anawɔ? Timɔte aketshama “efundelo w’ekila” oma le Eyunikɛ wa nyango ndo oma le Lɔyisɛ la tshɛnde “oma ko kiɛndakɛnda” yande. (2 Tim. 1:5; 3:15) Lo mɛtɛ, Timɔte aketshama Afundelo w’ekila oma ko kiɛndakɛnda yande.

Ayonga dui dia lomba le ambutshi w’Akristo dia vɔ nɔmba Jehowa ɛlɔmbwɛlɔ ndo nkongɛ la ntondo woho wa vɔ ndjotatɛ mbetsha ɔnawɔ “oma ko kiɛndakɛnda” yande. Tukedi 21:5 mbutaka ɔnɛ: “Tukanyi ta kanga kolamelu, tatûkundjiyaka diango efula.” Mbokɛmaka dia la ntondo k’ɔna mbotɔ, ambutshi pombaka ndjalɔngɔsɔla dimɛna. Vɔ koka nsala listɛ l’akambo amɔtshi wakoka ɔnawɔ ndjonga l’ohomba. Vɔ koka mbidja ndo akambo wa lo nyuma lo listɛ lɔsɔ. Ambutshi pombaka monga l’oyango wa ndowanya ɔnɔsɔ kaanga la ntondo ka nde mbotɔ.

Dibuku dimɔtshi (Early Childhood Counts—A Programming Guide on Early Childhood Care for Development) mbutaka ɔnɛ: “Wɔɔngɔ w’ɔna ashashi ndjokeketalaka ngɔndɔ ngana l’ɔkɔngɔ w’eotwelo kande. L’etena kɛsɔ, tɔtshɔngu ta lo wɔɔngɔ takimanyiya ɔna dia nde nkimɛ akambo fulanɛka woho w’anyanya.” Ɔnkɔnɛ, ayonga dui dia lomba le ambutshi dia vɔ nkamba la diaaso dia tshitshɛ sɔ dieke wɔɔngɔ w’ɔnawɔ l’akoka efula wa nkakatɛ awui wawetshawɔ dia vɔ mbeetsha akambo wa lo nyuma ndo dia nde mbaɔsa la nɛmɔ.

Kadiyɛso kɛmɔtshi kele ombatshi mboka mbutaka lo kɛnɛ kendana l’ɔnande la womoto ate: “Lakatatɛ ntomba la nde l’esambishelo etena kakinde eke la ngɔndɔ ɔtɔi. Kaanga mbakinde kombeyaka kɛnɛ kaketaka, lekɔ l’eshikikelo ɔnɛ dui sɔ diaki la shɛngiya le nde. Etena kakandakome mangase, nde akatatɛ mbisha anto wakahomanaka la so l’esambishelo traktɛ.”

Ana wetshama oma ko tɔkɛndakɛnda tawɔ ndowanaka. Koko, ambutshi wetsha anawɔ akambo wa mɛtɛ pomanaka l’ekakatanu.

‘NYOYATSHUNGWE ETENA’

Woho wafukutanya ɔna ndo wahandadje yimba lo kɛnɛ kawetshawɔ koka monga tshondo y’okakatanu le ambutshi. Ndo nto, ɔna koka mbekola yimba yande lo dihole dikina etena kawetshawɔ. Laadiko dia laasɔ, vɔ mongaka la nsaki ka mbeya akambo efula wa l’andja ɔnɛ. Ko kakɔna kakoka ambutshi nsala dia vɔ nkimanyiya anawɔ dia mbidjaka yimba lo kɛnɛ kawaetshawɔ?

Tɔsɛdingole kɛnɛ kata Bible lo Etumbelu 6:6, 7: “Aui ane wamumukudjangela elo, wayali l’utema aye. Kuwakokomiyaki an’aye, kuwatelakewo, lam’udjashiye lu luudu laye, ndu lam’atayakendakenda lu mbuka, lam’etamiye, ndu lam’etoye.” Tshɛkɛta ‘nkɔkɔmiya’ mbelaka kanyi ya mbetsha onto mbala la mbala. Ɔna ekɔ oko osongo weke tshitshɛ wele l’ohomba wa mbutamɛka ashi mbala la mbala dia vɔ mbola. Lam’ele wekelo wa mbala la mbala kimanyiyaka epalanga dia vɔ mbohɔ akambo w’ohomba, dui sɔ koka nkimanyiya ndo ana w’akɛnda.

Ambutshi pombaka mbetshaka wenya kaamɛ l’anawɔ dia mbaetshaka akambo wa mɛtɛ waki Nzambi. Lo andja ɔnɛ watshikitana wonya tshɛ, ekɔ tshondo y’okakatanu dia mbetshaka wenya kaamɛ l’ana. Koko ɔpɔstɔlɔ Pɔɔlɔ tokeketshaka ɔnɛ: “Nyoyatshungole etena” dia nsala akambo w’ohomba w’Okristo. (Ɛf. 5:15, 16) Ngande wakokaso nsala dui sɔ? Ekumanyi kɛmɔtshi ka l’etshumanelo kele wadɛnde nde lawɔ aki ombatshi mboka wa pondjo ndo laki l’elimu efula wa nsala aki l’okakatanu dia monga la wɛdimo lam’asa wetshelo wa ana, mɛmba ɛkɛndɛ wa l’etshumanelo la olimu ande wa l’emunyi. Kakɔna kakawasale dia kondjaka etena ka mbetsha ɔnawɔ la womoto la dikɛnda? Ɔnangɛso mbutaka ɔnɛ: “Pindju tshɛ la ntondo ka dimi ntshɔ l’olimu, dimi la wadɛmi takawaadiɛka awui oma lo Buku di’ɛkɔndɔ wa lo Bible kana oma lo biukubuku Tɔsɛdingolake Afundelo lushi la lushi. La dikɔlɔ tshɛ, taki l’ekongelo ka mbaadiɛka Bible la ntondo ka nde ndala ndo takatshɔka la nde l’esambishelo. Sho konanga ndanya ɛnɔnyi ande wa ntondo wa lɔsɛnɔ.”

‘ANA WEKƆ OKO MPITO’

Sho mɛtɛ nangaka di’anaso mbola ndo ndjonga epalanga wayaɛmbɛ ɛkɛndɛ. Koko oyango wa ntondo wahomba ambutshi mbetsha anawɔ ele dia monɛ ngandji ka Nzambi l’etema awɔ.​—Makɔ 12:28-30.

Osambu 127:4 mbutaka ɔnɛ: “Uku pitu lu anya wa minginga ka wulu, osoku mbeli ana w’olongo a pami.” Ana wekɔ oko mpito yahomba mbokama dia nkotsha oyango ayɔ. Mengenga hakoke pondjo nkaloya lohito kam’aliokande. Ɔnkɔnɛ, ana wekɔ oko “pitu” l’anya w’ambutshi awɔ paka l’etena ka tshitshɛ keto. Diakɔ diele ambutshi pombaka nkamba dimɛna l’etena kɛsɔ dia vɔ monɛ awui waki Nzambi lo timba ndo l’etema w’anawɔ oma ko tɔkɛndakɛnda tawɔ.

Lo kɛnɛ kendana la lonyuma l’ana, ɔpɔstɔlɔ Joani akafunde ate: “Ndooko dikambo dioleki mbishami ɔngɛnɔngɛnɔ oleki dia dimi mboka dia anami wekɔ lo ntetemala nkɛndakɛnda l’akambo wa mɛtɛ.” (3 Jni. 4) Ambutshi w’Akristo vɔ lawɔ koka monga l’ɔngɛnɔngɛnɔ wa ngasɔ etena kɛnawɔ anawɔ watetemala nkɛndakɛnda “l’akambo wa mɛtɛ.”