ONDE WƐ AAKOHƆ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka eelo, kete enda dia kana wɛ kokaka nkadimola ambola wayela anɛ:
Etena kakɔna kakatshu Yeso dia “tosambisha nyuma yele lo lokanu”? (1 Pet. 3:19)
Mɛnamaka dia yema tshitshɛ l’ɔkɔngɔ wa nde mbolɔ, Yeso akasambisha nyuma ya kɔlɔ lo kɛnɛ kendana la dilanya dia wolo diakawahombe nongola.—6/15, lɛkɛ 23.
Naa ekakatanu esato wahomana l’anto dia ntondoya lo diwala dia hende?
Vɔ ɛnɛ: Mbohɛ diwala diayɛ dia ntondo, mbokanya angɛnyi ayɛ l’olonganyi ayɛ wa hende ndo ndjaɛkɛ le olonganyi ayɛ wa hende naka wa ntondo komonga la kɔlamelo.—7/1, lɛkɛ 9-10.
Etena kakɔna kayokakitola Yeso ɛkɔkɔ la mbudi? (Mat. 25:32)
Dui sɔ diayosalema etena kayosala Yeso akambo oko Shushi ya wedja lo mfɔnu ka woke l’ɔkɔngɔ wa elanyelo k’ɛtɛmwɛlɔ wa kashi.—7/15, lɛkɛ 6.
Delo ndo okakatanyelo wa wanyu w’akanga wa kɔlɔ wɔtɛkɛtami lo wɛɛla waki Yeso w’eponga la kangaka wayosalema etena kakɔna? (Mat. 13:36, 41, 42)
Dui sɔ diayosalema lo mfɔnu ka woke etena kayowɛna dia vɔ hawoyokoka ndawɔ elanyelo.—7/15, lɛkɛ 13.
Etena kakɔna kakakotshama ɛtɛkɛta wa Yeso wendana la ɔhɔmbɔ wa kɔlamelo ndo kɛsɔ? (Mat. 24:45-47)
Vɔ kokotshama lo Pɛntɛkɔsta 33 T.D., koko wakayokotshama l’ɔkɔngɔ wa 1914. Lo 1919, ɔhɔmbɔ akakitshama laadiko di’anto wa lo luudu lande, mbuta ate Akristo tshɛ waleshama lo nyuma.—7/15, lɛkɛ 21-23.
Etena kakɔna kayetɛma ɔhɔmbɔ wa kɔlamelo olami wa diangɔ dia Yeso?
Dui sɔ diayosalema lo nshi yayaye, mbuta ate lo mfɔnu ka woke etena kayolongola ɔhɔmbɔ wa kɔlamelo difuto dia l’olongo.—7/15, lɛkɛ 25.
Onde woho wahole Bible nkombo y’anto amɔtshi watɛkɛtama lɔkɔ mɛnyaka dia vɔ bu la nɛmɔ?
Hatohombe mbuta ngasɔ. Anto amɔtshi wahole Bible nkombo yawɔ waki anto w’ɛlɔlɔ ndo akina waki anto wa kɔlɔ. (Ruta 4:1-3; Mat. 26:18) Bible mbolaka paka nkombo y’andjelo ahende wa kɔlamelo ato.—8/1, lɛkɛ 10.
Laadiko dia wolo w’oma le Nzambi, kakɔna kakakimanyiya Ɛmɛnyi wa Jehowa 230 waki lo mpango ka lokanu ka la Sachsenhausen dia mpanda lo wetshetshelo w’otsha lo nyɔi?
Kaanga mbakiwɔ waya bu la wolo l’ɔtɛ wa ndjala ndo wa hemɔ, vɔ wakakeketshanaka lam’asawɔ dia ntetemala mbikikɛ.—8/15, lɛkɛ 18.
Lande na kele ɔkɔndɔ wɛnya woho wakatehɔ ase Isariyɛlɛ ɔkɛdi wa Jɔrɔdana otsha lo Nkɛtɛ ya daka tokeketshaka?
Kaanga mbele elola kaki l’ashi, Jehowa akemadia ashi wakakɛlaka di’ase Isariyɛlɛ ntenyanya. Dui sɔ diakakeketsha mbetawɔ ndo wɛkamu awɔ le nde ndo ɔkɔndɔ ɔsɔ koka tokeketsha ndo sho.—9/15, lɛkɛ 16.
Woho wakamba Bible la kulɛrɛ mɛnyaka na?
Woho wakaba Bible la kulɛrɛ mɛnyaka dia Nzambi mbeyaka ɔnɛ kulɛrɛ koka nkotola yambalo y’anto ndo ɔnɛ kulɛrɛ koka tokimanyiya dia sho mbohɔ akambo amɔtshi.—10/1, lɛkɛ 14-15.
Ngande wakotshama daka dia lo Mika 5:5 diendana la anto a wake enanɛi ndo la alami w’ɛkɔkɔ esambele?
‘Alami w’ɛkɔkɔ esambele ndo anto a wake enanɛi’ watɛkɛtama lo Mika 5:5 nembetshiyaka dikumanyi dia lo tshumanelo diakeketsha ekambi waki Nzambi diaha vɔ mboka ɔlɔshamelo wele la ntondo kawɔ wɔma.—11/15, lɛkɛ 20.
Naa ɛkɔkɔ ɛmɔtshi wɛnya dia tekɔ l’ohomba w’ɛlɔmbwɛlɔ ka Nzambi?
Tekɔ l’ohomba w’ɛlɔmbwɛlɔ ka Nzambi dia sho nkandola ekakatanu wa lo lɔsɛnɔ. Nde tokimanyiyaka dia sho monga la lɔsɛnɔ la dimɛna ndo nde ayokotsha alaka ande wele lo Bible.—12/1, lɛkɛ 4-6.