“Nyohɔ wanɛ wanyɔlɔmbɔla”

ƐTƐKƐTA wa ɔpɔstɔlɔ Pɔɔlɔ ɛsɔ watanema lo Hɛbɛru 13:7 kokaka kadimɔma nto ɔnɛ: “Nyohɔ wanɛ wele ewandji anyu.” Ntatɛ oma lo Pɛntɛkɔsta ka 33 T.D. apɔstɔlɔ wa kɔlamelo wa Nkumadiɔndjɔ Yeso Kristo wakakotsha ɔkɛndɛ ɔsɔ oko olui-walɔmbɔla wakalɔmbɔlaka etshumanelo k’oyoyo k’Akristo kakakengama. (Ets. 6:2-4) Oya lo ɔnɔnyi 49 T.D., olui-walɔmbɔla ɔsɔ wakakengama aha la apɔstɔlɔ waki Yeso ato, koko ndo anto akina. Etena kakɔsama yɛdikɔ lo dikambo dia wonyelo wa mpota, olui-walɔmbɔla ɔsɔ wakakengama la “apɔstɔlɔ la dikumanyi la Jɛrusalɛma.” (Ets. 15:1, 2) Vɔ waki la ɔkɛndɛ wa mendaka akambo wakendanaka la Akristo wa l’ahole tshɛ. Vɔ wakatomaka mikanda ndo wadjango wakakeketshaka tshumanelo ndo wakakimanyiyaka ambeki dia ntshikala kaamɛ lo tokanyi ndo lo ditshelo. Tshumanelo diaki l’okitanyiya ndo diakayelaka ɛlɔmbwɛlɔ ka olui-walɔmbɔla ndo etombelo wakonge ele diɔ diakalongolaka ɛtshɔkɔ wa Jehowa ndo diakatahamaka.​—Ets. 8:1, 14, 15; 15:22-31; 16:4, 5; Hɛb. 13:17.

² L’ɔkɔngɔ wa nyɔi ka apɔstɔlɔ, apɔstazi efula wakatombe. (2 Tɛs. 2:3-12) Oko wakatatshi Yeso lo wɛɛla ande wendana la eponga la nkangaka, eponga (Akristo w’akitami) wakonɛma la nkangaka (Akristo wa kashi). L’edja ka ntambe efula, kanga ekambɔ akatshike dia elui ehende ɛsɔ mbola polo ndo l’etena ka dinela mbuta ate “etena k’ekomelo ka dikongɛ di’akambo.” (Mat. 13:24-30, 36-43) Akristo w’akitami l’onto ndo l’onto waketawɔmaka le Yeso etena kɛsɔ, koko ndooko olui-walɔmbɔla, ndooko ehomɔ shikaa kakakambaka la Yeso lanɛ la nkɛtɛ dia mbisha ambeki ande ɛlɔmbwɛlɔ. (Mat. 28:20) Koko, nde akatatshi dia otshikitanu wakahombe salema lo etena ka dinela.

³ “Akɔna mɛtɛ ele ɔhɔmbɔ wa kɔlamelo ndo kɛsɔ?” La dimbola sɔ, Yeso Kristo akɔtshiya wɛɛla ɔmɔtshi kana ɛnyɛlɔ kele etenyi ka “djembetelo” yakandasha yendana la “ekomelo ka dikongɛ di’akambo.” (Mat. 24:3, 42-47) Yeso akɛnya dia ɔhɔmbɔ wa kɔlamelo ɔsɔ ayonga l’olimu efula wa mbishaka ekambi waki Nzambi mbo ya ndɛ ya lo nyuma “lo etena kahombama.” Oko wakakambe Yeso la olui w’apami koko aha onto l’onto dia nɔmbɔla lo ntambe ka ntondo, ɔhɔmbɔ wa kɔlamelo wakamba la Yeso lo ekomelo ka dikongɛ di’akambo bu onto ɔtɔi.

TEYE ELE “ƆHƆMBƆ WA KƆLAMELO NDO KƐSƆ”

⁴ Yeso akandasɔnɛ dia ndeshaka ambeki ande? Mbokɛmaka dia nde akahombe nkamba la Akristo w’akitami wele la nkɛtɛ. Bible mbowaelɛka “ɛlɔmbɛdi wakamba oko nkumi ya dikanga” wanɛ wakawasha ɔkɛndɛ wa “mbewoya l’ahole tshɛ waonga w’amɛna efula wa Ɔnɛ laka [wa] elɛ oma lo wodjima oya l’osase ande wa diambo.” (1 Pe. 2:9; Mal. 2:7; Ɛny. 12:17) Onde akitami tshɛ wele la nkɛtɛ mbakenga ɔhɔmbɔ wa kɔlamelo? Keema. Etena kakasha Yeso apami oko 5 000 mbo ya ndɛ lo dihindo aha la mbadia wamato la ana wa totshitshɛ, nde akayisha ambeki ko ambeki lo wedi awɔ wakakahɛ elui w’anto. (Mat. 14:19) Nde akalesha anto efula lo tshimbo y’anto angana ato. Ɛlɔ kɛnɛ, nde ekɔ lo mbisha mbo ya ndɛ ya lo nyuma lo yoho yakɔ yaamɛ.

⁵ Ɔnkɔnɛ, “olami wa kɔlamelo ndo kɛsɔ” kengama la djui ya tshitshɛ y’anangɛso w’akitami yendana mbala kakɔ ɔtɔi la ɔlɔngɔswɛlɔ ndo okahanyelo wa mbo ya ndɛ ya lo nyuma l’etena ka woongelo wa Kristo. (Luka 12:42) Lo nshi y’ekomelo, anangɛso w’akitami wakenga “ɔhɔmbɔ wa kɔlamelo ndo kɛsɔ” wekɔ lo nkamba kaamɛ lo mbalasa kalɔmbɔla olimu aso l’andja w’otondo. Ɛlɔ kɛnɛ, anangɛso w’akitami asɔ mbakenga Olui-walɔmbɔla w’Ɛmɛnyi wa Jehowa.

⁶ Kristo ekɔ lo nkamba la olui ɔsɔ dia dianganya akambo wendana la okotshamelo wa prɔfɛsiya ya lo Bible ndo dia mbisha ɛlɔmbwɛlɔ ka la wonya kendana la woho wa nkamba la atɔndɔ wa lo Bible lo lɔsɛnɔ la lushi la lushi. Mbo ya ndɛ ya lo nyuma shɔ yekɔ lo kahanyema lo tshimbo ya tshumanelo di’Ɛmɛnyi wa Jehowa dia lo ngelo la ngelo. (Isa. 43:10; Ngal. 6:16) Lo nshi yakafundamaka Bible, wakashaka ɔhɔmbɔ kana olami wakawɛkɛka otema ɔkɛndɛ wa nɔmbɔla diangɔ dia lo luudu la nkumɛnde. Woho akɔ waamɛ mbele, ɔhɔmbɔ wa kɔlamelo ndo kɛsɔ akalongola ɔkɛndɛ wa nɔmbɔla ambetawudi wa lo luudu la nkumɛnde. Ɔnkɔnɛ, ɔhɔmbɔ wa kɔlamelo mendaka nto diangɔ dia l’emunyi, olimu w’esambishelo, kongɛ nsanganya ya weke, nsɔna emendji dia mɛmba ɛkɛndɛ wotshikitanyi l’okongamelo ndo ntondja ekanda walembetshiya Bible wakimanyiya “anto wa lo luudu.”​—Mat. 24:45.

⁷ Ko waa na wele “anto wa lo luudu”? Lo tshena pe, vɔ wekɔ wanɛ waleshama. L’etatelo, anto wa lo luudu tshɛ waki akitami. L’ɔkɔngɔ diko, anto wa lo luudu asɔ wakayokengama ndo la olui a woke wa “ɛkɔkɔ ekina.” (Jni. 10:16) Elui ehende ɛsɔ wekɔ lo ndɛ mbo ya ndɛ ya lo nyuma yasha ɔhɔmbɔ wa kɔlamelo.

⁸ Lo mfɔnu ka woke, etena kayoya Yeso dia ndjewoya ndo ndjolombosha dikongɛ di’akambo dia kɔlɔ nɛ, nde ayokitsha ɔhɔmbɔ wa kɔlamelo “laadiko wa diangɔ diande tshɛ.” (Mat. 24:46, 47) Wanɛ wakenga ɔhɔmbɔ wa kɔlamelo wayolongola difuto diawɔ dia l’olongo. Kaamɛ la atshikadi w’Akristo 144 000, vɔ wayolongola lowandji lawɔ la l’olongo kaamɛ la Kristo. Kaanga mbele ndooko ɔhɔmbɔ wa kɔlamelo ndo kɛsɔ wayonga la nkɛtɛ, Jehowa la Yeso wayosha anto wayɔsɛna la nkɛtɛ lo Diolelo dia Mɛsiya ɛlɔmbwɛlɔ lo tshimbo ya wanɛ wakasɔnama dia nkamba oko “ewandji.”​—Os. 45:16.

LANDE NA ‘MBOHƆ WANƐ WATƆLƆMBƆLA’?

⁹ Tekɔ la ɛkɔkɔ efula wa ‘mbohɔ wanɛ watɔlɔmbɔla’ ndo mɛnya dia sho ndjaɛkɛka le wɔ. Lande na kele nsala dui sɔ ekɔ dia wahɔ aso? Ɔpɔstɔlɔ Pɔɔlɔ akate ate: “Vɔ wekɔ lo ntetemala nyolama oko anto wayowoyokoya la wɔ, dia vɔ nsala dikambo sɔ l’ɔngɛnɔngɛnɔ koko aha la lonyangu, nɛ dia dui sɔ diayonga l’etombelo wa kɔlɔ le nyu.” (Hɛb. 13:17) Ekɔ ohomba dia sho nkitanyiya ndo ndjela ɛlɔmbwɛlɔ ka wanɛ watɔlɔmbɔla, nɛ dia vɔ wekɔ lo ntetemala tolama dia tokokɛ lo nyuma ndo dia sho monga dimɛna.

¹⁰ Oko wofundamidiɔ lo 1 Kɔrɛtɔ 16:14, Pɔɔlɔ mbutaka ɔnɛ: “Dikambo tshɛ diasalanyu, diasaleme la ngandji.” Tɛdikɔ tɔsama lo wahɔ w’ekambi waki Nzambi mbɔsamaka lo ndjela dionga dia dimɛna efula dia ngandji sɔ. Lo kɛnɛ kendana la ngandji, 1 Kɔrɛtɔ 13:4-8 mbutaka ɔnɛ: “Ngandji ekɔ la solo dia lotutsha ndo ɔlɔlɔ. Ngandji bu la kandjema. Tɔ hayasɛmɛ, hayadiya, hasale akambo lo yoho ya fumbɔ nsɔnyi, hayange wahɔ ande hita, hoke nkɛlɛ esadi. Tɔ hadia akambo wa kɔlɔ wosalɛwɔ. Tɔ hangɛnangɛna lo akambo wa kɔlɔ, koko ngɛnangɛnaka lo mɛtɛ. Tɔ kukumɛka akambo tshɛ, mbetawɔka akambo tshɛ, nongamɛka akambo tshɛ, mbikikɛka akambo tshɛ. Ngandji hakomɛ pondjo.” Lam’ele ngandji mbatshutshuya tɛdikɔ tshɛ tɔsama dikambo dia wahɔ w’ekambi wa Jehowa, tekɔ la ɛkɔkɔ tshɛ wa ndjaoka lo lotui tshitshi lo ɛlɔmbwɛlɔ kɛsɔ. Ndo nto, ɔsɔ ekɔ tsho ɔkɛnɛmwɛlɔ wa ngandji ka Jehowa.

¹¹ Oko wakidiɔ lo ntambe ka ntondo, wanɛ wakamba la Jehowa dia nɔmbɔla ekambi ande wekɔ anto wele bu kokele. Koko, Jehowa akakambe la anto wele bu kokele lo nshi y’edjedja dia nkotsha lolango lande. Nɔa akasale waato wa luudu ndo akasambisha akambo wendana la elanyelo kakahombe ndja lo nshi yande. (Eta. 6:13, 14, 22; 2 Pe. 2:5) Mɔsɛ akasɔnama dia nɔmbɔla ekambi waki Jehowa oma l’Edjibito. (Eto. 3:10) Apami wele bu kokele wakasambiyama dia mfunda Bible. (2 Tim. 3:16; 2 Pe. 1:21) Woho wakamba Jehowa la anto wele bu kokele ɛlɔ kɛnɛ dia nɔmbɔla olimu w’esambishelo ndo wa mbetɛ anto ambeki, hakitshakitsha wɛkamu aso l’okongamelo waki Nzambi. Koko, sho keketshamaka nɛ dia sho mbeyaka dia aha la osukɔ wa Jehowa, okongamelo hawosalaki pondjo kɛnɛ tshɛ kasalawɔ. L’atei w’ekakatanu ndo wa tena dia wolo, ɔhɔmbɔ wa kɔlamelo ambɛnya dia nyuma ka Nzambi mbalɔmbɔla akambo. Ɛlɔ kɛnɛ, etenyi kɛnama k’okongamelo waki Jehowa kambolongola lokema l’ɛtshɔkɔ. Diakɔ diele, tekɔ lo sukɛ okongamelo akɔ l’otema ɔtɔi ndo tekɔ lo ndjaɛkɛ tshɛ le wɔ.

WOHO WƐNYASO WƐKAMU ASO

¹² Wanɛ wasɔnama dia monga la ɛkɛndɛ lo etshumanelo mɛnyaka wɛkamu awɔ lo mbetawɔ nkotsha kɛnɛ kaalɔmbawɔ l’ɔngɛnɔngɛnɔ ndo la kɔlamelo tshɛ. (Ets. 20:28) Oko weso apandjudi wa Diolelo, sho sambishaka lo luudu la luudu, salaka wendelo w’eyoyo, ndo nɔmbɔlaka wekelo wa Bible la ohetoheto tshɛ. (Mat. 24:14; 28:19, 20) Dia sho ndeka nkondja wahɔ oma lo mbo ya ndɛ y’efula ya lo nyuma yatosha ɔhɔmbɔ wa kɔlamelo ndo kɛsɔ, sho ndjalɔngɔsɔlaka dimɛna ndo mbɔtɔka lo nsanganya yaso y’Akristo mbidja ndo nsanganya ya weke. Sho kondjaka wahɔ efula oma lo ekeketshelo konga lam’asaso etena kayashaso dia monga kaamɛ l’anangɛso l’akadiyɛso lo nsanganya y’Akristo shɔ.​—Hɛb. 10:24, 25.

¹³ Etena kakimɔso weshasha wa diangɔ diaso dia l’emunyi dia nsukɛ okongamelo, sho mɛnyaka wɛkamu aso lɔkɔ. (Tok. 3:9, 10) Etena kɛnaso dia anangɛso waya la ohomba wa diangɔ dia l’emunyi, sho mbakimanyiyaka aha la ntshimbatshimba. (Ngal. 6:10; 1 Tim. 6:18) Sho salaka ngasɔ oma lo yimba ya ngandji k’onto l’ɔnango ndo mbala tshɛ sho nyangaka waaso wa mɛnya Jehowa la okongamelo ande dia sho ngɛnangɛnaka ɛlɔlɔ wakondjaso.​—Jni. 13:35.

¹⁴ Sho mɛnyaka nto dia sho ndjaɛkɛka le okongamelo lo sukɛ tɛdikɔ tɔsawɔ. Kɛsɔ nembetshiyaka dia sho ndjelaka l’okitshakitsha tshɛ ɛlɔmbwɛlɔ ka wanɛ wakasɔnama dia tɔlɔmbɔla, ɛnyɛlɔ emendji w’etshimbedi ndo dikumanyi dia l’etshumanelo. Anangɛso asɔ wekɔ l’atei wa ‘wanɛ watɔlɔmbɔla,’ wanɛ wahombaso nkitanyiya ndo monga l’ɛse kawɔ. (Hɛb. 13:7, 17) Oyadi kaanga hatoshihodia dimɛna ɛkɔkɔ wɔsami tɛdikɔ tɔmɔtshi, sho mbeyaka dia sukɛ tɛdikɔ takɔ ayonga dikambo dia ɔlɔlɔ aso wa pondjo. Etombelo w’oma lo dikambo sɔ ele, Jehowa tɔtshɔkɔlaka l’ɔtɛ wakitanyiyaso Ɔtɛkɛta ande ndo okongamelo ande. Lo nsala ngasɔ, mbɛnyaso okitanyiya aso le Owandji, Yeso Kristo.

¹⁵ Mɛtɛ, tekɔ la ɛkɔkɔ wa ndjaɛkɛ le ɔhɔmbɔ wa kɔlamelo ndo kɛsɔ. Satana lele jambizambi ya dikongɛ nɛ di’akambo ekɔ lo nsala la wolo tshɛ dia mbisha lokombo la Jehowa ndo okongamelo ande nsɔnyi. (2 Kɔr. 4:4) Aha sho ntala lo tolonga ta kɔlɔ taki Satana! (2 Kɔr. 2:11) Nde mbeyaka dia “etena kambootshikalɛ kaya mondo” la ntondo ka nde mbikashema lo difuku diaha la ekomelo, ndo nde amboyashikikɛ dia manganya ekambi wa Jehowa efula oma le Nzambi. (Ɛny. 12:12) Ɔnkɔnɛ, oko wataleke Satana mbidja welo ande, toleke ndjasukanya la Jehowa. Nyɛsɔ toyaɛkɛ le Jehowa ndo le ehomɔ kakamba la nde dia nɔmbɔla ekambi ande ɛlɔ kɛnɛ. Lo nsala ngasɔ, tayokenga tshunda di’anangɛso l’akadiyɛso diele kaamɛ.