Kɛnɛ kakakosalɛ Nzambi

Ɔnɛ ekɔ divɛsa dimɔtshi lo avɛsa wa lo Bible woleki mbeyama ndo waleka anto nshila. Anto amɔtshi mbutaka ɔnɛ ndooko divɛsa dikina “diɛnya lo tshena pe diɔtɔnganelo diele lam’asa Nzambi l’anto ndo yoho yayokoka anto shimbamɛ.” Diakɔ diele, lo wedja ɛmɔtshi anto fundaka “Joani 3:16” kana ɛtɛkɛta wa lɔkɔ, ko mbahanɛ lo dihole diambosangana anto efula, lo mituka, l’abaya wele l’ahole wa lo sɛkɛ ndo l’ahole akina.

Mɛnamaka oko wanɛ wakamba l’ɛtɛkɛta ɛsɔ wekɔ l’eshikikelo ɔnɛ, vɔ wayokondja lɔsɛnɔ la pondjo l’ɔtɛ wa ngandji ka Nzambi. Ko wɛ akanayɛ? Oko le yɛ, ngandji ka Nzambi kɛdikɛdi na? Kakɔna kafɔnyayɛ kakasale Nzambi kɛnya dia nde kookaka ngandji?

“NZAMBI AKALANGE ANDJA LO YƐDIKƆ Y’EFULA”

Anto efula mbetawɔka dia Nzambi mbakatonge anto ndo andja ɔnɛ la diangɔ diele lɔkɔ. Ditongami diasɛna diekɔ wolo nshihodia ndo diakatonghama dimɛna efula. Kɛsɔ mɛnyaka dia kanga lomba l’efula mbakaditonge. Anto efula mbishaka Nzambi losaka lushi la lushi l’ɔtɛ wakandawasha lɔsɛnɔ. Vɔ mbetawɔka nto dia lɔsɛnɔ lawɔ nemanɛka la kɛnɛ tshɛ kawasha Nzambi dia nsukɛ lɔsɛnɔ, ɛnyɛlɔ hiɛlɛlɛ, ashi, mbo ya ndɛ ndo otshikitanelo wa deko dia vɔ ntetemala nsɛna ndo ngɛnangɛna la kɛnɛ kasalawɔ.

Sho pombaka mbisha Nzambi losaka l’ɔtɛ wa diangɔ sɔ tshɛ, nɛ dia nde ekɔ mɛtɛ Otungi aso ndo Ɔnɛ latosha diangɔ diakɔ tshɛ. (Esambu 104:10-28; 145:15, 16; Etsha 4:24) Sho koka mɛnya lowando laso lo ngandji katoka Nzambi etena kakanaso yimba lo kɛnɛ tshɛ katosalɛnde dia sho monga la lɔsɛnɔ. Ɔpɔstɔlɔ Pɔɔlɔ akate ate: “[Nzambi] kasha anto tshɛ lɔsɛnɔ, lomu ndo diangɔ tshɛ. Nɛ dia oma le nde mbeso la lɔsɛnɔ, mbakɛndakɛndaso ndo mbeso lo andja ɔnɛ.”—Etsha 17:25, 28.

Koko, ngandji ka Nzambi mɛnamaka lo toho efula, aha tsho lo woho wakotshande ehomba aso wa lo demba. Nde akatotonge lo yoho ya laande ndo akatosha kɛnɛmɔ lo tosha dikoka dia mbeya akambo wa lo nyuma ndo nde tokimanyiyaka dia mbeya akambo akɔ. (Mateo 5:3) Diakɔ diele, anto wele l’okitanyiya wekɔ la diɛsɛ dia monga lo nkumbo ka Nzambi, mbuta ate nkoma “anande.”—Rɔmɔ 8:19-21.

Oko wotamidiɔ lo Joani 3:16, Nzambi akatɛnya ngandji kande lo ntoma Ɔnande Yeso la nkɛtɛ dia ndjotetsha awui wendana la Nzambi, She ndo ndjotovwelɛ. Koko, anto efula koka mbuta dia haweye lande na kaki ohomba dia Yeso vwelɛ anto ndo woho wele nyɔi ka Yeso djembetelo ya ngandji ka Nzambi le so. Tɔsɛdingole woho walembetshiya Bible lande na kakavu Yeso ndo ohomba wa nyɔi kande.

‘NDE AKAKIMƆ ƆNANDE ƐTƆI LAKANDOTE’

Anto lo tshɛ kawɔ mvɔka, diɛnɛka la hemɔ, lotshundu ndo la nyɔi. Koko, awui asɔ komonga lo sangwelo diaki Jehowa Nzambi di’oma k’etatelo. Nde akasha anto wa ntondo elongamelo ka sɛnaka pondjo lo paradiso ka la nkɛtɛ. Koko, vɔ wakahombe nsala dui dimɔtshi: Mbokitanyiya. Nzambi akawatɛ nto ɔnɛ naka vɔ ntona mbokitanyiya, kete wayovɔ. (Etatelu 2:17) Onto la ntondo akatɔmbɔkwɛ lowandji laki Nzambi ndo kɛsɔ akokonya dia nde mvɔ ndo nyɔi kakɔ kakakokanɛ ndo le tokanula tande. Ɔpɔstɔlɔ Pɔɔlɔ akalembetshiya dui sɔ lo mbuta ɔnɛ: “Oko wakɔtɔ pɛkato l’andja oma le onto ɔtɔi ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”—Rɔmɔ 5:12.

Nzambi ‘nangaka losembwe.’ (Osambu 37:28) Koko, kaanga mbakinde kominya washo oma lo kɔlɔ ka lokonda kakasale onto la ntondo, Nzambi kombisha anto tshɛ dilanya dia sowaka ndo mvɔka pondjo pondjo l’ɔtɛ w’onto ɔtɔi laki komonga l’okitanyiya ɔsɔ. Koko, lo nkamba la tɔndɔ diande dieyama dia “lumu lu lumu,” nde akakambe la losembwe lande la wɛdimu lo nyomosha anto wele l’okitanyiya elongamelo ka lɔsɛnɔ la pondjo. (Etumbelu 21:23) Dimbola diambwama ele: Woho akɔna wakahombe lɔsɛnɔ l’onto la kokele lakashisha Adama futama? Okadimwelo ele: Onto ɔmɔtshi akahombe nkimɔ kana nambola lɔsɛnɔ l’onto la kokele lele la nɛmɔ dia woho akɔ waamɛ la lɔnɛ laki la Adama.

Mbokɛmaka hwe dia, ndooko kanula y’Adama yele keema kokele yakakoke mfuta oshinga ɔsɔ, onyake Yeso. (Osambu 49:6-9) Oko wakandotɔ aha la mpowɔ pɛkato, Yeso aki kokele oko waki Adama. Diakɔ diele, lo nambola lɔsɛnɔ lande, Yeso akatshungola anto oma lo lɔhɔmbɔ la pɛkato. Lo nsala ngasɔ, nde akasha tokanula taki atshukanyi wa ntondo diaaso dia ngɛnangɛna la lɔsɛnɔ l’onto la kokele la woho akɔ waamɛ la lɔnɛ laki la Adama la Eva. (Rɔmɔ 3:23, 24; 6:23) Onde ndooko dui diahombaso nsala dia sho nkondja wahɔ oma lo ngandji ka mamba kakatɛnya Nzambi?

“ONTO TSHƐ LONGA LA MBETAWƆ LE NDE”

Lo nsɛdingola nto Joani 3:16, sho tanaka ɛtɛkɛta ɛnɛ: “Onto tshɛ longa la mbetawɔ le [Yeso] atovɔke, koko akondja lɔsɛnɔ la pondjo.” Kɛsɔ mɛnyaka di’onto pombaka nsala dui dimɔtshi dia nde nkondja woshasha wa lɔsɛnɔ la pondjo. Naka sho nangaka nkondja “lɔsɛnɔ la pondjo,” kete sho pombaka monga la mbetawɔ le Yeso ndo mbokitanyiya.

Wɛ koka ndjambola ɔnɛ: ‘Lande na kahombami mbokitanyiya? Onde Yeso kombuta ate “onto tshɛ longa la mbetawɔ le nde” ayokondja lɔsɛnɔ la pondjo?’ Ekɔ dimɛna mbetawɔ ɔnɛ Yeso ekɔ. Koko, ekɔ ohomba wɛ mbohɔ dia Bible mbutaka di’aha mbetawɔ tsho ɔnɛ Yeso ekɔ, kete ambokoka. Lo ndjela diksiɔnɛrɛ dimɔtshi (Vine’s Expository Dictionary of Old and New Testament Words) tshɛkɛta ya lo Grɛkɛ yakakambe la Joani y’ɔnɛ mbetawɔ nembetshiyaka “aha tsho mbetawɔ dui kana onto ɔmɔtshi, koko ndjaɛkɛ le nde kana lɔkɔ.” Dia onto mbetawɔma le Nzambi, nde pombaka nsala akambo efula koko aha mbeya tsho ɔnɛ Yeso ekɔ Oshimbedi. Onto lele la mbetawɔ pombaka nto nsala la wolo dia nkitanyiya kɛnɛ kaketsha Yeso. Naka onto bu la mbetawɔ kele l’etsha, kete tɔ kekɔ ka laadiko di’ɛlɔmɔ. Bible mbutaka ɔnɛ: “Mbetawɔ kaha la etsha kambovɔ.” (Jakɔba 2:26) Lo ɛtɛkɛta ɛkina, kɛnɛ kalɔmbama le onto lele la mbetawɔ, ele monga la mbetawɔ le Yeso ndo nde pombaka nsɛna lo yoho yɔtɔnɛ la mbetawɔ kande.

Pɔɔlɔ akalembetshiya dui sɔ lo mbuta ɔnɛ: “Ngandji kele la Kristo totshutshuyaka, nɛ dia tambɛna shoate: Onto ɔtɔi [Yeso] akavu dikambo dia anto tshɛ, . . . Nde akavwɛ anto tshɛ diaha wanɛ wasɛna ntetemala nsɛna dikambo diawɔ vɔamɛ, koko wasɛnɛ dikambo dia ɔnɛ lakaavwɛ ndo lakolɔ.” (2 Kɔrɛtɔ 5:14, 15) Dia mɛnya ɔnɛ tekɔ la lowando la mɛtɛ lo olambo wa Yeso, sho pombaka nsala etshikitanu lo lɔsɛnɔ laso, ɛnyɛlɔ ntshika nsɛna lo dikambo diaso shoamɛ ko nsɛna lo dikambo dia Yeso lakatovwɛ. Kɛsɔ nembetshiyaka dia kɛnɛ kakatetsha Yeso mbahombaso mbetsha lo dihole dia ntondo lo nsɛnɔ yaso. Etshikitanu esɔ mendanaka la akambo wɔsaso la nɛmɔ, ɛsɔnɛlɔ aso ndo kɛnɛ tshɛ kasalaso. Naa difuto diayolongola wanɛ wetawɔ dia Yeso ekɔ ndo wele la mbetawɔ le nde?

“ATOVƆKE, KOKO AKONDJA LƆSƐNƆ LA PONDJO”

Etenyi k’ekomelo ka divɛsa dia Joani 3:16 mɛnyaka daka diaki Nzambi le wanɛ wele la mbetawɔ l’olambo w’etshungwelo ndo wasɛna lo ndjela atɔndɔ waki Nzambi. Nzambi akalɔngɔsɔla diaha anto wele la kɔlamelo asɔ ‘ndjolanyema, koko kawokondja lɔsɛnɔ la pondjo.’ Laadiko dia laasɔ, ɛtshɔkɔ efula wekɔ lo kongɛ wanɛ wayokondja wahɔ oma lo ngandji ka Nzambi.

Yeso akalake olui ɔmɔtshi l’atei w’anto asɔ lɔsɛnɔ la pondjo l’olongo. Nde akatɛ ambeki ande wa kɔlamelo hwe dia nde ambotshɔ dia towalɔngɔsɔlɛ dihole dia vɔ toolɛ kaamɛ la nde. (Joani 14:2, 3; Filipɛ 3:20, 21) Wanɛ wayolwama dia tolɛ l’olongo, “wayoyala ɛlɔmbɛdi waki Nzambi ndo waki Kristo, ndo vɔ wayolɛ kaamɛ la nde oko nkumi ya dikanga l’edja k’ɛnɔnyi kinunu.”—Ɛnyɛlɔ 20:6.

Paka lofulo lakashikikɛma l’ambeki wa Kristo mbayolongola difuto dia ngasɔ. L’eshikikelo tshɛ Yeso akawatɛ ate: “Tanyokake wɔma, nyu lemba la tshitshɛ l’ɛkɔkɔ, nɛ dia Shɛnyu aketawɔ nyosha Diolelo.” (Luka 12:32) Anto angana wakenga “lemba la tshitshɛ l’ɛkɔkɔ” lɔsɔ? Ɛnyɛlɔ 14:1, 4 mbutaka ɔnɛ: “Dimi lakende, mɛnyi ko Ɔna Ɔkɔkɔ [Yeso Kristo lakolwama] emadi lo dikona dia Siɔna [l’olongo] nde l’anto nunu lokama l’akumi anɛi la nɛi wele la lokombo lande ndo lokombo la She lofundami lo mfumu yawɔ. . . . Vɔ wakasombama oma l’atei w’anto oko ɛlɔnga le Nzambi ndo le Ɔna Ɔkɔkɔ.” Lo mbaɛdika la miliyara y’anto waheyama mbadiema wayɔsɛna pondjo la nkɛtɛ, anto 144000 wekɔ mɛtɛ “lemba la tshitshɛ l’ɛkɔkɔ.” Vɔ wayɔlɔmbɔla oko nkumi ya dikanga, ko waa na wayowɔlɔmbɔla?

Yeso akatɛkɛta di’olui wa hende w’anto wa kɔlamelo wayokondja wahɔ oma lo Diolelo dia l’olongo. Oko wɛnyamidiɔ lo Joani 10:16, Yeso akate ate: “Dimi lekɔ la ɛkɔkɔ ekina wele bu lo lokoto lɔnɛ. Dimi layowaela ndo vɔ wayoka dui diami, ko wayoyala olui ɔtɔi ndo wayonga la olami ɔtɔi.” Olui “w’ɛkɔkɔ” ɔsɔ wayolongola difuto dia lɔsɛnɔ la pondjo la nkɛtɛ, lɔsɛnɔ lakashisha Adama la Eva oma k’etatelo. Ngande weyaso dia vɔ wayɔsɛna la nkɛtɛ lo nshi yayaye?

Avɛsa efula wa lo Bible mbutaka dia paradiso kayoyala la nkɛtɛ. Dia nshikikɛ dui sɔ, tambokɔlɔmba dia wɛ mbifola Bible kayɛ ndo mbadia avɛsa wayela anɛ: Esambu 37:9-11; 46:8, 9; 72:7, 8, 16; Isaya 35:5, 6; 65:21-23; Mateo 5:5; Joani 5:28, 29; Ɛnyɛlɔ 21:4. Avɛsa ango mɛnyaka dia ata, ndjala, hemɔ ndo nyɔi hatonga nto. Vɔ tɛkɛtaka nto di’etena kayonga anto w’ɛlɔlɔ l’ɔngɛnɔngɛnɔ lo monga la mvudu yawɔ hita, dikambɔ diawɔ hita ndo mbodɛ anawɔ lo wɔladi.a Onde ɛtshɔkɔ ɛsɔ hawokɔngɛnyangɛnya? Tekɔ l’ɛkɔkɔ w’eshika wa mbetawɔ ɔnɛ alaka asɔ wayokotshama kem’edja.

NZAMBI AKAKOSALƐ AKAMBO EFULA

Naka wɛ nkana yimba lo kɛnɛ kambokosalɛka Nzambi ndo kamondosalɛka anto lo tshɛ kawɔ, kete wɛ ayoshihodia dia nde akasale awui efula. Ɛnyɛlɔ, tekɔ la lɔsɛnɔ, lomba, yoonge ya dimɛna ndo diangɔ di’ohomba diatokimanyiya dia sho ntetemala nsɛna. Kɛnɛ koleki tshɛ ele, woshasha wa olambo w’etshungwelo wakatosha Nzambi lo tshimbo ya Yeso lakatovwɛ, koka mbɔsama oko ɔtshɔkɔ woleki woke oko wɛnyamidiɔ lo Joani 3:16.

Monga la lɔsɛnɔ la pondjo lo dihole dia wɔladi, dia dimɛna, aha la diɛnɛ la hemɔ, ata, ndjala ndo nyɔi ayonga mɛtɛ etatelo k’ɔngɛnɔngɛnɔ ndo k’ɛtshɔkɔ wahashilaki. Koko dia nkondja ɛtshɔkɔ ɛsɔ tshɛ, nemanɛka la yɛ wɛmɛ. Dimbola diakatahombe ntana okadimwelo ele, kakɔna kakokayɛ salɛ Nzambi?