Diaaso diahayahombe mpandja

L’otsho wa la ntondo ka nde nkimɔ lɔsɛnɔ lande, Yeso akadjangɛ ambeki ande wa kɔlamelo dia vɔ salaka Eohwelo ka nyɔi kande. Lo nkamba la mapa waha la wodoya ndo vinyɔ ya beela, Yeso akatatshiya kɛnɛ kakayelamɛ l’ɔkɔngɔ ɔnɛ Dambo di’ekomelo kana Dambo dia dikɔlɔ dia Nkumadiɔndjɔ ndo nde akawadjangɛ ate: “Kanyotshake ɔnkɔnɛ dia mbohɔkami.”—Luka 22:19.

Ɔnɔnyi tshɛ, Ɛmɛnyi wa Jehowa wa l’andja w’otondo sanganaka dia nsala Eohwelo ka nyɔi ka Yeso. Lo 2014, Eohwelo kayosalema Lushi l’ɔtɔi, Ngɔndɔ ka nɛi 14, l’ɔkɔngɔ wa ɛɔtwɛlɔ ka wonya.

Tambokelɛ la waangasanu tshɛ dia wɛ ndjɔtɔ lo losanganya lɔsɔ nɛ dia lo diaaso sɔ, elembetshielo efula wendana la kitshimudi ya nyɔi k’olambo ka Yeso wayoshama. Anto tshɛ mbɔtɔka lo losanganya lɔsɔ ofele. Ndooko ɛkɔngɔ wayosalema lɛkɔ. Onto lakakosha periodikɛ kɛnɛ ayokotɛ wonya ndo dihole diayosalema Eohwelo ka nyɔi ka Yeso l’ɛtshi kanyu ka nkɛtɛ kana wɛ koka menda dui sɔ lo sitɛ kaso k’Ɛtɛrnɛtɛ ka jw.org. Lam’alangɛ, funda datɛ diayosalema dui sɔ diaha wɛ ndjohɛ, nɛ dia sho nongamɛka dia wɛ hohandja diaaso sɔ.