“Nde . . . asale dia kɛnɛ tshɛ kakongɛyɛ ndowana”

1. Kakɔna kahomba ɛlɔngɔlɔngɔ nshikikɛ lo kɛnɛ kendana la nshi yawɔ yayaye? Kakɔna kakoka mbakimanyiya diaha ndeka ndjakiyanya? (Enda osato wele lo mbɔtwɛlɔ.)

ONDO ɛlɔngɔlɔngɔ mbetawɔka dia ntondo k’onto ntatɛ munda lɔkɛndɔ, ekɔ dui dia lomba dia nde nkongɛ lɛnɛ ayondotshɔ. Lɔsɛnɔ lekɔ oko lɔkɛndɔ ndo etena ka nkongɛ lɛnɛ alangayɛ ntshɔ ele etena kekeyɛ ɔlɔngɔlɔngɔ. Lo mɛtɛ, bu dui dia wɔdu dia nkongɛ dui sɔ. Heather ɔna ɔmɔtshi la womoto akate ate: “Ekɔ dui dia wɔma. Wɛ pombaka nshikikɛ kɛnɛ kahombayɛ nsala la lɔsɛnɔ layɛ.” Naka ndo wɛ mbayaoka ngasɔ, kete ohɔ dia Jehowa mbutaka ate: “Toyakiyanyake, nɛ dia dimi kele Nzambi kayɛ. Dimi layokokeketsha, eelo, dimi layokokimanyiya.”—Isa. 41:10.

2. Ngande weyayɛ dia Jehowa nangaka dia wɛ nkongɛ dia monga la nshi yayaye y’ɔngɛnɔngɛnɔ?

² Jehowa kokeketshaka dia nkongɛ kɛnɛ kayoyosala lo nshi yayaye la lomba tshɛ. (Ond. 12:1; Mat. 6:20) Nde nangaka wɛ monga l’ɔngɛnɔngɛnɔ. Dui sɔ mbokɛmaka hwe etena kɛnayɛ, kokayɛ ndo kalɛtayɛ diangɔ diakandatonge. Ndo nto Jehowa ndjakiyanyaka lo dikambo diaso lo toho tokina. Nde toshaka alako ndo tetshaka yoho yoleki dimɛna ya nsɛna. Diakɔ diele, etena katona anto alako ande wa lomba, nde hangɛnangɛna. Nde mbutɛka wanɛ wahayele ɛlɔmbwɛlɔ kande ate: “Nyakasɔnɛ kɛnɛ kaki kɔngɛnyangɛnyami. . . . Nyende, ekambi ami wayɔngɛnangɛna, koko nyu nyayodiɛnɛ la nsɔnyi. Nyende, ekambi ami wayoda ekoko w’ɔngɛnɔngɛnɔ l’ɔtɛ wa eongelo k’ɔlɔlɔ k’otema.” (Isa. 65:12-14) Etena kasalaso ɛsɔnwɛlɔ wa lomba lo lɔsɛnɔ, sho tombolaka Jehowa.​—Tok. 27:11.

NKONGƐ DIA NSALA AWUI WAYOKOSHA ƆNGƐNƆNGƐNƆ

3. Kakɔna kakɔlɔmba Jehowa?

³ Kakɔna kakɔlɔmba Jehowa dia wɛ nkongɛ? Dia wɛ monga l’ɔngɛnɔngɛnɔ, wɛ pombaka mbeya Jehowa ndo mbokambɛ. L’ɔtɛ wa dui sɔ mbakatonge Jehowa anto. (Os. 128:1; Mat. 5:3) Waa nyama wakatongama tsho dia ndɛka, nɔka, ndo mbotaka ana. Koko Jehowa nangaka dia wɛ nkongɛ lɔsɛnɔ layɛ lo yoho yayokosha ɔngɛnɔngɛnɔ ndo monga l’oyango. Otungi ayɛ ekɔ “Nzambi ka ngandji,” “Nzambi k’ɔngɛnɔngɛnɔ,” ɔnɛ lakatonge anto “lo efanelo kande.” (2 Kɔr. 13:11; 1 Tim. 1:11; Eta. 1:27) Wɛ ayonga l’ɔngɛnɔngɛnɔ naka wɛ mbokoya Nzambi kaso ka ngandji. Bible mbutaka ɔnɛ: “Ɔngɛnɔngɛnɔ waya lo mbisha ndeka wa nongola.” (Ets. 20:35) Onde wɛ atayaokaka ngasɔ? Ɔsɔ ekɔ dui dia mɛtɛ diendana la lɔsɛnɔ. Ɔnkɔnɛ, Jehowa nangaka dia wɛ nkongɛ awui wa lo nshi yayaye wohikami lo ngandji kokayɛ anto akina ndo kawokayɛ.​—Adia Mateo 22:36-39.

4, 5. Kakɔna kakashaka Yeso ɔngɛnɔngɛnɔ?

⁴ Yeso Kristo akanyotshikɛ nyu ɛlɔngɔlɔngɔ l’esekaseka ɛnyɛlɔ ka kokele. Etena kakinde dikɛnda, nde akakokaka nkɛnya ndo nsala shɛkɛsɛkɛ. Oko wadita Ɔtɛkɛta wa Nzambi, ekɔ “etena ka mbɔla” ndo “etena ka nnɔ lokombe.” (Ond. 3:4) Yeso akayasukanya nto la Jehowa lo mbekaka Afundelo. Etena kakinde la ɛnɔnyi 12 embetsha wa lo tɛmpɛlɔ wakambe “lo menda yimba yande ndo ekadimwelo ande.”​—Luka 2:42, 46, 47.

⁵ Etena kakayala Yeso opalanga, nsala kɛnɛ kakɔɔlɔmbaka Nzambi dia nsala akawoshaka ɔngɛnɔngɛnɔ. Ɛnyɛlɔ, Nzambi akalange dia nde “mbewoya ase wola lokumu l’ɔlɔlɔ” ndo “akanga wa totshungu ɔsɛnɛlɔ.” (Luka 4:18) Osambo 40:8 mɛnyaka tokanyi ta Yeso lo mbuta ɔnɛ: “Dia nsala lolango layɛ, wɛ Nzambi kami, kele ɔngɛnɔngɛnɔ ami.” Yeso akangɛnangɛnaka mbetsha anto akambo wendana la She. (Adia Luka 10:21.) Lushi lɔmɔtshi l’ɔkɔngɔ wa nde nsawola la womoto ɔmɔtshi awui wendana l’ɔtɛmwɛlɔ wa mɛtɛ, Yeso akatɛ ambeki ande ate: “Mbo ya ndɛ yami ele nsala lolango la Ɔnɛ lakantome ndo nshidiya olimu ande.” (Jni. 4:31-34) Yeso aki l’ɔngɛnɔngɛnɔ nɛ dia nde akɛnya Nzambi ndo anto akina ngandji kakandawaokaka. Naka wɛ nsala woho akɔ waamɛ, kete ndo wɛ ayonga l’ɔngɛnɔngɛnɔ.

6. Lande na kele ekɔ dimɛna mbutɛ anto akina kɛnɛ kasangoyayɛ dia nsala lo nshi yayaye?

⁶ Akristo efula wakatatɛ olimu w’ombatshi mboka etena kakiwɔ ɛlɔngɔlɔngɔ ndo dui sɔ diakawasha ɔngɛnɔngɛnɔ. Onde wɛ koka mbutɛ amɔtshi l’atei awɔ kɛnɛ kasangoyayɛ? “Sangwelo ndanaka lam’aha ɔkɛtshanyelo, koko dikambo ndowanaka lam’ele andaki efula.” (Tok. 15:22) Ondo anangɛso l’akadiyɛso asɔ wayokotɛ ɔnɛ olimu w’ombatshi mboka wayokokimanyiya dia nongola olowanyelo wayokokimanyiya lɔsɛnɔ layɛ l’otondo. Yeso akeke awui efula oma le She etena kakinde l’olongo. Oma laasɔ, etena kakandakambaka olimu ande w’esambishelo la nkɛtɛ, nde akatetemala mbeka. Nde akonge l’ɔngɛnɔngɛnɔ etena kakandasambishaka anto akina lokumu l’ɔlɔlɔ ndo akalame olowanyi ande la ntondo k’ekakatanu wa wolo. (Adia Isaya 50:4; Hɛb. 5:8; 12:2) Tayanga mɛna woho wakoka olimu wa lo tena tshɛ kosha ɔngɛnɔngɛnɔ.

ƐKƆKƆ WƐNYA DIA MBETƐ ANTO AMBEKI EKƆ OLIMU WOLEKI DIMƐNA

7. Lande na kangɛnangɛna ɛlɔngɔlɔngɔ efula mbetɛ anto ambeki?

⁷ Yeso akatotɛ dia ntshɔ dia ‘tetɛ anto ambeki’ ndo towaetsha. (Mat. 28:19, 20) Naka wɛ nkongɛ dia nkamba olimu ɔsɔ, kete wɛ ayonga la lɔsɛnɔ la dimɛna latombola Nzambi. Oko wediɔ lo dikambo di’olimu tshɛ, wɛ pombaka mbɔsa etena ka ndowanyema. Ɔnangɛso Timothy lakatatɛ olimu w’ombatshi mboka eke mangase akate ate: “Dimi nangaka kambɛ Jehowa l’olimu wa lo tena tshɛ, nɛ dia ɔsɔ ekɔ yoho yawɛnyami ngandji kami. L’etatelo dimi kokokaka mbeka l’anto Bible, koko l’ɔkɔngɔ wa monɔ l’ɛtshi ka nkɛtɛ kekina, ndo l’edja ka ngɔndɔ ɔtɔi lakatatɛ mbeka l’anto efula Bible. Ombeki ɔmɔtshi akatatɛ ndja lo Mbalasa ka Diolelo. L’ɔkɔngɔ wa dimi mbɔtɔ Kalasa ka Bible k’anangɛso w’enyemba ngɔndɔ hiende, wakayotoma lo dihole dikina lɛnɛ akamatotatɛ mbeka l’anto anɛi. Lakalangaka mbetsha anto ndo lakɛnaka dia nyuma k’ekila kekɔ lo mbatshikitanya.”a—1 Tɛs. 2:19.

8. Kakɔna kakasale ɛlɔngɔlɔngɔ ɛmɔtshi dia nsambisha anto efula?

⁸ Ɛlɔngɔlɔngɔ ɛmɔtshi wakeke ɔtɛkɛta okina. Ɛnyɛlɔ, Jacob, y’oma l’Amérique du Nord, akafunde ate: “Etena kakimi l’ɛnɔnyi esambele, asekami efula wa la kalasa waki ase Vietnam. Lakalangaka mbatɛ akambo wendana la Jehowa, diakɔ diele l’ɔkɔngɔ w’etena kɛmɔtshi lakakongɛ dia mbeka ɔtɛkɛta awɔ. Lakaleke mbeka ɔtɛkɛta ɔsɔ lo mbɛdika Tshoto y’Etangelo ya l’Angɛlɛ la ya l’ɔtɛkɛta w’ase Vietnam. Lakɔtɔ nto lɔngɛnyi l’ase etshumanelo ka l’ɔtɛkɛta w’ase Vietnam kaki suke. Etena kakimi l’ɛnɔnyi 18, lakatatɛ olimu w’ombatshi mboka. L’ɔkɔngɔ diko, lakayɔtɔ lo Kalasa ka Bible k’anangɛso w’enyemba. Dui sɔ diambokimanyiya lo dihole diemi ombatshi mboka nshi nyɛ, lɛnɛ emi dimɛ ekumanyi lo olui wasala nsanganya l’ɔtɛkɛta w’ase Vietnam. Ase Vietnam efula mambaka lo woho wakameke ɔtɛkɛta awɔ. Vɔ mbelɛkami ndo mbala efula dimi mbekaka la wɔ Bible. Amɔtshi wakatetemala polo lo batizama.”—Ɛdika la Etsha 2:7, 8.

9. Kakɔna katetsha olimu wa mbetɛ anto ambeki?

⁹ Olimu wa mbetɛ ambeki ketshaka dia monga la mbekelo y’amɛna y’olimu, woho wa nsawola dimɛna, woho wa monga l’eshikikelo ndo l’ɔkɔmi. (Tok. 21:5; 2 Tim. 2:24) Koko olimu ɔsɔ wayoleka kosha ɔngɛnɔngɛnɔ nɛ dia wɛ mbekaka woho wa mɛnya kɛnɛ ketawɔyɛ oma l’Afundelo. Wɛ ayeka nto woho wa nkamba kaamɛ la Jehowa.—1 Kɔr. 3:9.

10. Ngande wakokayɛ monga l’ɔngɛnɔngɛnɔ lo nkamba olimu wa mbetɛ anto ambeki kaanga ɛtshi kayɛ ka nkɛtɛ kekɔ wolo?

¹⁰ Wɛ koka monga l’ɔngɛnɔngɛnɔ lo nkamba olimu wa mbetɛ anto ambeki kaanga anto yema tshitshɛ wa l’ɛtshi kayɛ ka nkɛtɛ mbalanga mbeka Bible. Dia mbetɛ anto ambeki, etshumanelo k’otondo kambaka kaamɛ oko olui. Kaanga mbele mbeyaka monga ko ɔnangɛso kana kadiyɛso ɔtɔi keto mbambokondja onto layonga ombeki, sho tshɛ tekɔ l’ɔngɛnɔngɛnɔ nɛ dia sho tshɛ takasambisha dia nyanga. Ɛnyɛlɔ, Brandon laki ombatshi mboka l’edja k’ɛnɔnyi divwa l’ɛtshi ka nkɛtɛ kakalangaka anto yema tshitshɛ mbeka Bible, mbutaka ate: “Dimi ngɛnangɛnaka nsambisha lokumu l’ɔlɔlɔ nɛ dia kɛsɔ mbatɔlɔmba Jehowa dia nsala. Lakatatɛ olimu w’ombatshi mboka yema tshitshɛ l’ɔkɔngɔ wa dimi nshidiya kalasa. Dimi keketshaka anangɛso w’ɛlɔngɔlɔngɔ wa l’etshumanelo kaso ndo ngɛnangɛnaka dia mɛna woho watawahame lo nyuma. L’ɔkɔngɔ wa dimi mbɔtɔ Kalasa ka Bible k’anangɛso w’enyemba, wakatome oko ombatshi mboka lo dihole dikina. Ekɔ mɛtɛ dia dimi kokondja ndooko onto lakatetemala polo lo batisimu l’ɛtshi ka nkɛtɛ kɛsɔ, koko apandjudi akina waki la wɔ. Lekɔ l’ɔngɛnɔngɛnɔ nɛ dia lakakongɛ dia ndjasha tshɛ l’olimu wa mbetɛ anto ambeki.”​—Ond. 11:6.

LƐNƐ AKOKA KƐNƐ KAKONGƐYƐ KOKONYA

11. Naa toho tokina ta kambɛ Jehowa tele l’ɛlɔngɔlɔngɔ l’esekaseka efula?

¹¹ Tekɔ la waaso efula wa kambɛ Jehowa. Ɛnyɛlɔ ɛlɔngɔlɔngɔ l’esekaseka efula wekɔ lo nkimanyiya l’olimu wa wokelo. Tekɔ l’ohomba wa nkama ya Mbalasa ya Diolelo y’eyoyo. Ahole asɔ tombolaka Jehowa, diakɔ diele mbisha lonya dia mbaka koka kosha ɔngɛnɔngɛnɔ. Wɛ koka nto monga l’ɔngɛnɔngɛnɔ lo nkamba l’ananyɔ ndo akadiyɛyɛ. Ndo wɛ koka mbeka awui efula, ɛnyɛlɔ woho wa nsala olimu wa dimɛna aha l’okakatanu ndo woho wa nkamba kaamɛ l’emendji ayɛ.

12. Ngande wakoka olimu w’ombatshi mboka nkonya lo waaso akina?

¹² Ɔnangɛso Kevin mbutaka ate: “Ntatɛ lam’akimi dikɛnda, lakakombolaka kambɛ Jehowa l’olimu wa lo tena tshɛ l’edja ka nshi mɔtshi. Oshimu kele edja, lakatatɛ nkamba olimu w’ombatshi mboka etena kakimi l’ɛnɔnyi 19. Lakayakotshɛka ehomba ami lo kambaka etenyi ka lushi l’ɔnangɛso laki ombiki. Lakeke woho wa nsala ɛtɛ wa mvudu, adidishi ndo nkuke. L’ɔkɔngɔ diko, lakakambe ɛnɔnyi ehende kaamɛ l’olui w’anangɛso wakimanyiya lɛnɛ ambosalema mpokoso dia nyomoka Mbalasa ya Diolelo ndo mvudu dikambo di’anangɛso. Etena kakamoke dia waki l’ohomba wa nsala olimu wa wokelo l’Afrique du Sud, lakalodia dɛmandɛ ndo wakambelɛ. Lanɛ l’Afrikɛ, lekɔ lo teteta dia takaka Mbalasa ya Diolelo l’ahole wotshikitanyi l’ɔkɔngɔ wa mingu ngana tsho. Olui w’ambiki wemi wekɔ oko ase nkumbo. Sho mbidjasɛka kaamɛ, mbekaka Bible ndo kambaka kaamɛ. Dimi ngɛnangɛnaka nto nsambisha kaamɛ l’anangɛso wa lo dihole diemi lomingu tshɛ. Woho wakamakongɛ oma lo dikɛnda akakimanyiya dia monga l’ɔngɛnɔngɛnɔ lo toho takimi kɔfɔnyaka.”

13. Lande na kele ɛlɔngɔlɔngɔ efula wakambɛ Jehowa lo Bɛtɛlɛ wekɔ l’ɔngɛnɔngɛnɔ?

¹³ Anangɛso l’akadiyɛso amɔtshi waki ambatshi mboka wokamba lo Bɛtɛlɛ nshi nyɛ. Olimu wa lo Bɛtɛlɛ wekɔ yoho ya lɔsɛnɔ yasha ɔngɛnɔngɛnɔ nɛ dia kɛnɛ tshɛ kasalawɔ lɛkɔ ekɔ dikambo dia Jehowa. Ase nkumbo ka Bɛtɛlɛ kimanyiyaka dia ntondja Bible ndo ekanda l’oyango w’anto mbeka akambo wa mɛtɛ. Dustin, ose Bɛtɛlɛ ɔmɔtshi mbutaka ate: “Lakayadjɛ oyango wa nkamba olimu wa lo tena tshɛ etena kakimi l’ɛnɔnyi divwa ndo lakonge ombatshi mboka lam’akamashidiya kalasa. L’ɔkɔngɔ w’ɔnɔnyi l’etenyi, wakambelɛ lo Bɛtɛlɛ, lɛkɔ lakateka woho wa nkamba la mashinyi watondjawɔ ekanda ndo l’ɔkɔngɔ diko woho wa nsala dikongelo dia l’ɔrdinatɛrɛ. Lo Bɛtɛlɛ, dimi ngɛnangɛnaka mboka akambo wendana la woho watahame olimu wa mbetɛ anto ambeki l’andja w’otondo. Dimi nangaka nkamba lɛkɔ nɛ dia kɛnɛ kasalaso kimanyiyaka anto dia ndjasukanya la Jehowa.”

KAKƆNA KASANGOYAYƐ DIA NSALA LO NSHI YAYAYE?

14. Kakɔna kakokayɛ nsala oma ko kakianɛ dia ndjalɔngɔsɔla lo dikambo di’olimu wa lo tena tshɛ?

¹⁴ Ngande wakokayɛ ndjalɔngɔsɔla dia nkamba olimu wa lo tena tshɛ? Dia kambɛ Jehowa lo yoho yoleki dimɛna, wɛ pombaka monga la waonga w’Okristo. Mbekaka Ɔtɛkɛta wa Nzambi mbala la mbala, kanaka yimba dimɛna lɔkɔ ndo nsala la wolo dia nkɛnɛmɔla mbetawɔ kayɛ lo nsanganya ya l’etshumanelo. Etena kakayɔtɔ kalasa, lowanya dikoka diayɛ dia nsambisha anto akina lokumu l’ɔlɔlɔ. Eka dia ndjasha le anto lo mbambola kanyi yawɔ l’ɔkɔmi tshɛ ndo hokamɛ ekadimwelo awɔ. Ndo nto, wɛ koka ndjakimɔ dia nsala awui amɔtshi l’etshumanelo, ɛnyɛlɔ nkimanyiya dia nsola kana nɔngɔsɔla Mbalasa ka Diolelo. Jehowa ngɛnangɛnaka nkamba l’anto wele l’okitshakitsha ndo wele suke dia nkamba olimu. (Adia Osambo 110:3; Ets. 6:1-3) Ɔpɔstɔlɔ Pɔɔlɔ akalɔmbɛ Timɔte dia nkamba oko misiɔnɛrɛ nɛ dia “anangɛso . . . wakatɛkɛtaka dimɛna lo dikambo dia Timɔte.”​—Ets. 16:1-5.

15. Kakɔna kakokayɛ nsala dia nkondja olimu wayokokimanyiya dia monga ombatshi mboka?

¹⁵ Efula k’ekambi wa lo tena tshɛ wekɔ l’ohomba w’olimu. (Ets. 18:2, 3) Ondo wɛ kokaka mbɔtɔ kalasa ka mondo kayokokimanyiya dia nkondja olimu wakambawɔ etenyi ka lushi watanema l’ɛtshi kanyu ka nkɛtɛ. Tɛ omendji anyu w’otshimbedi ndo ambatshi mboka akina kɛnɛ kasangoyayɛ ndo mbolawɔ tokanyi. Oma laasɔ, oko wadita Bible, “yaɛkɛ le Jehowa lo kɛnɛ tshɛ kasalayɛ, ko sangwelo diayɛ diayolowana.”—Tok. 16:3; 20:18.

16. Ngande wakoka olimu wa lo tena tshɛ kɔlɔngɔsɔla dikambo di’ɛkɛndɛ ekina wa lo nshi yayaye?

¹⁶ Wɛ koka monga l’eshikikelo dia Jehowa nangaka dia wɛ “nkukutɛ” nshi yayaye y’ɔngɛnɔngɛnɔ. (Adia 1 Timɔte 6:18, 19.) Olimu wa lo tena tshɛ wayokokimanyiya dia monga Okristo wambotshunda lo nkamba kaamɛ l’ekambi ekina wa lo tena tshɛ. Ndo nto, anangɛso efula wakɛnyi dia nkamba olimu wa lo tena tshɛ etena kekewɔ ɛlɔngɔlɔngɔ akayowakimanyiya lo awala awɔ. Mbala efula, wanɛ wakakambe olimu w’ombatshi mboka ntondo ka ntshukana wekɔ lo ntetemala nkamba oko ambatshi mboka kaamɛ oko atshukanyi.​—Rɔmɔ 16:3, 4.

17, 18. Ngande wele nkongɛ kɛnɛ kayoyosala lo nshi yayaye mendanaka l’otema ayɛ?

¹⁷ Osambo 20:4 mbutaka lo dikambo dia Jehowa ɔnɛ: “[Nde] akokotshe nsaki y’otema ayɛ ndo asale dia kɛnɛ tshɛ kakongɛyɛ ndowana.” Etena kakongɛyɛ kɛnɛ kayoyosala lo nshi yayaye, kana yimba lo kɛnɛ kalangayɛ mɛtɛ nsala la lɔsɛnɔ layɛ. Kana yimba lo kɛnɛ kasala Jehowa etena kɛnɛ ndo kɛnɛ kakokayɛ nsala l’olimu ande. Oma laasɔ nkongɛ dia nsala kɛnɛ kɔɔngɛnyangɛnya.

¹⁸ Naka wɛ nkamba la lɔsɛnɔ layɛ dia kambɛ Jehowa tshɛ lo tshɛ ndo mbotombola, kete wɛ ayonga l’ɔngɛnɔngɛnɔ w’efula. Wɛ “[ayɔ]ngɛnangɛna lo yɛdikɔ y’efula le Jehowa, ko nde ayokokotshɛ nsaki y’otema ayɛ.”​—Os. 37:4.