Onde sho kanaka lomba oma l’Afundelo?
1 Ɔsɔlai wambekesanɛ l’ata ntshɔka lo ta la dihomo diande olotshi dingawo diande omak’ote polo ndo l’ekolo dia ndjakokɛ. Okambi w’olimu wambekesanɛ l’olimu ndo wayalongosola dia kamba lo yaandjo ya woke tɛ̂mbaka dihomo diele lande l’ohomba dia ntsha lutumu lomotshi. Okambi waki Jehowa omotshi watotshoka l’olimu wa sambisha ayokime “yɔɔmbɔ” yande l’anya ndo ayokamba layo olimu la komba etena tshe kayondokondja diaaso. (Ef. 6:17) Onde, osoku mbasalaso ndo sho lawo? Onde, sho tshikɛka Dui dia Nzambi etena dia dio teketa lam’asambishaso woho wa dio kɛtsha etema a wane watohokame?—Tok. 8:1, 6.
2 Sambisha kema nshi tshe dikambo dia tshitshe. Lo mbilo motshi, anto hawoleke mbidjase lawakawo, ndo lo mvudu nye yatanemawo, anto ako weko l’akambo efula wa ntsha, dio diako diele, etena k’ololo ka tatɛ asawo wa Bible w’eshika pombamaka. Ko lam’ele Bible kele dibuku diakiso dioleki ohomba efula, woho akona wakokaso kamba ladio olimu tena tshe lo osambishelo, ndo dia kimanyia woho wa dui diakasambiyama diatanema loko monga la shengiya le wane wadioka na?
3 Lo tena tshe: Lo soko la soko diayototo, sho nangaka mbifola Bible dia kɛtsha oteketshi aso. Sho pombaka ndjalongosola dia oyango oso oyadi kânga tayohomba menya okanda omotshi. Naka onto eko lo tatshu esadi esadi ko sho kema l’etena ka mbadia vɛsa tshoi kana tohende, lande na k’eso hatokoke shila kana mbuta tenyi dia vɛsa motshi la ntondo ka mbow’enya okanda na? Ntsha ngaso ayokoka dia kotola yambalo yande ndo mbosokoya dia nde mpokame.—Heb. 4:12.
4 Oko enyelo, naka tamboteketa dia ote a dui omotshi wendana la ki ka demba, l’okongo wa sho mbisha oteketshi aso moyo, sho kokaka mbetola dimbola ne: “Onde we fonyaka one hemo yayoshila lushi lomotshi, ndo onto tshe ayonga la demba di’okolonganu?” Oyadi okadimwelo akona wayoshama, sho kokaka mbadia mbala kako otoi lo Bible kana mbuta tenyi dimotshi di’Afundelo, oko vɛsa nye: Isaya 33:24 kana Enyelo 21:4. Naka sho ntsha ngaso, kete tayotshike Dui dia Nzambi dihole dia dio teketa.
5 Lo waembwelo w’eyoyo: Pombaka nongosola waembwelo w’eyoyo. Koko, tena dimotshi kokaka tshama dia tayohomba sawola lo ete w’awui w’eso konongosola. L’etena keso, dibuku Comment raisonner à partir des Ecritures tôngaka ehomo ka ta k’ololo. Lo shila kana mbadia avɛsa wele lo dibuku diako, tayenya anto dia sho teko ekambi a Nzambi koko aha wane watalanya Dui diako.—2 Kor. 2:17.
6 Naka sho koteketa di’ote omotshi a dui w’eyama, sho kokaka mbifola dibuku Comment raisonner lo mbɔtwɛlɔ kemotshi kasungana, oko “Jésus Christ,” “Derniers jours” kana “Résurrection,” ndo kamba olimu la ote omotshi a dui wahonyi dia mimɛ sawo. Kokaka sho nomba anto dia vo mbadia tovɛsa tomotshi l’atei a Bible yakiwo voameme. Lo ntsha ngaso, Dui dia Nzambi diayonga la wolo wa nsena le wo, ndo nyuma ka Jehowa kayokamba olimu naka anto ako wayonga l’etama wotolongani.
7 Têko l’ɔkɛndɛ w’ohomba efula: wa sambisha lokumu l’ololo ndo wa pɛmɔla atshi wa kolo. Diewoyelo diaki Jehowa mbedio koko, aha diakiso. Totshike Dui diande, yɔɔmbɔ (lokuwa) ya nyuma, dihole dia dio tokimanyia.