Tokimanyia anto weka Bible dia vo nongosola wekelo awo
1 Anto walongosola wekelo awo wa Bible lobingu tshe menyaka one: mete vo ndjashaka lo wekelo awo, ndo mbala efula vo pamaka esadi esadi lo nyuma oleki wane wahalongosola wekelo ako. Tshamaka tena dimotshi di’onto halongosola wekelo ande ne dia nde heye woho wa tatɛ. Ondo ayohombama mbôlembetshiya. Woho akona wa sala na?
2 Omak’etatelo, toyange yema ya wenya dia ndjashikike kana ombeki mpotoka one: ndjalongosola kedikedi wekelo w’onto ndameme. Anto efula haweye woho wa mbeka kânga mbeyawo mbadia. Akatshi 32 polo 42 wa Manuel pour l’Ecole du ministère théocratique mbishaka alako efula w’ohomba wakokaso sambiyɛ ombeki naka pombamaka.
3 Tɛ̂nya onto ako one mbeka eko ohomba: Sho kokaka menya ombeki dibuku diaso dia wekelo diele la eteketa ndo wetelo w’ohomba efula w’ekewo eshidi l’ɛse. Tôlembetshiya one: lam’okande sso l’eteketa w’ekende eshidi l’ɛse, nde ayohɔ ndo ayenya tokanyi tato l’eteketa wakinde hita. Omaloko, nde hokotwama dia kadimola lo wembola oma lo mbadia tenyi di’etondo dia lo dibuku. Naka nde ambolakanyema omak’etatelo, kete l’okongo diko, lo sanganya ya l’etshumanelo, nde ayonga l’akoka wa mbisha waɔmbwɛlɔ w’eshika. Waɔmbwɛlɔ ako ay’enya one nde nangaka ndo mbokaka awui wakêkama.
4 Tôlakanya dia nde ndjakimanyia la Bible: Pombaka ndakanya ombeki dia nde mbishola totshapita ta l’Afundelo toshilami lo dibuku dia wekelo. Etena kayondotiena esadi eto, nde ayohotɔ dia mete Bible mbekande l’ololo tshe. Mete, ondo l’etatelo, nde ayohomba kamba olimu la kombo ya abuku wa lo Bible yatanema l’etatelo ka Bible. Koko, pombaka mbokeketsha dia nde mbekesanɛ la woho one wahonyi abuku 66 wa lo Bible. Etena kayangande ndo kâdiande vɛsa motshi ya lo Bible, tôkimanyia dia nde mpoto kana mbishola etenyi k’okana la tokanyi ta lo palagalafe ndo di’aha kakitwana la ote a dui lo tshimbatshimba l’etenyi kahotone dimena la wekelo.
5 Tokeketsha ombeki watahame dia nde mbadia Bible k’otondo. Tɔtɛtɛ̂ dia dikambo ne one: Bible k’otondo eko Dui diakasambiyama oma le Nzambi ndo dui diako pombaka monga olêlo wa lo nyuma w’akristo wa mete.—Mat. 4:4; 2 Tim. 3:16, 17.
6 Toshile ekanda ekina wakimanyia dia mpoto Bible: Naka ombeki ambohama efula, nde kokaka mimɛ la kamba olimu l’ekanda ekina wakimanyia dia mpoto Bible. Aha la diha washo, tôkeketsha dia nde nyanga elembetshiyelo ekina wa ladiko l’atei w’ekanda ekina waki la Société wakandeye oma lo mboto lo sanganya y’etshumanelo. Towenya woho akona wahombande ndjakimanyia la tokambo kambo tomotshi totshikitanyi ta lo Traduction du monde nouveau, enyelo oko ‘Index des mots bibliques les plus importants.’ Etena katatɛnde ndjatonge ndameme bibliyɔtɛkɛ ande w’ekanda a Nzambi, tôlakanya dia nde kamba olimu la dibuku Comment raisonner à partir des Ecritures, Index kame ndo Auxiliaire.
7 Naka sho ndakanya anto weka laso Bible dia vo nongosola wekelo awo, kete tayowakumiya ambeki wa Bible w’eshika wayotetemalaka la pama lo mete l’okongo wa sho shidiya mbeka lawo Bible.