Tosambiya Anto Akina Elongamelo Ka Lɔsɛnɔ La Pondjo

¹ Kânga mbakayange onto toho ta ntsha di’aha tshunda osombe esadi ndo talola lɔsɛnɔ lande, hatokokaki mbewɔ lotshundu la nyɔi. Ande lowando lele laso dia Bible nembetshiyaka bonde katshunda anto esombe ndo kavɔwɔ, ko ndo woho wayoshila lotshundu la nyɔi! Akambo wa mɛtɛ asɔ wekɔ lo nembetshiyama lo yoho yahakoke onto mama lo dibuku Ewo Katɔla Otsha lo Lɔsɛnɔ la Pondjo. Dibuku sɔ kadimulaka wembola w’okandanu wendana la lɔsɛnɔ ndo la nyɔi, diɔ mɛnyaka ombadi adiɔ etena kayonga Paradiso nto la nkɛtɛ.

² Lo Ngɔndɔ ka Nɛi tayosha anto dibuku Ewo l’oyango wa tatɛ mbeka la wɔ Bible lawakawɔ. (Mat. 28:​19, 20) L’ɔkɔngɔ, tayotembola wanɛ tshɛ wayɔngɛnangɛna losango la Diolelo. Lo yoho shɔ mbayotosambiya anto akina elongamelo ka lɔsɛnɔ la pondjo. (Tito 1:⁠2) Dia kamba olimu ɔsɔ, wɛ ayɛna mɛtɛ dia tokanyi tayela tɔnɛ tekɔ ohomba.

³ Lam’ahomanayɛ l’onto mbala ka ntondo, wɛ mbeyaka mboka dimbola nɛ:

◼ “Onde wɛ atayambolaka bonde kakombola anto sɛna edja efula? [Tshikande akadimule.] Aseka Boudha, Akristo, Ahindu, waa Mizilima, kâmɛ ndo anto akina nto, vɔ tshɛ nongamɛka sɛna l’ɔkɔngɔ a nyɔi.” Fola dibuku Ewo lo tshapita 6, “Lande na Katshundaso ndo Kavɔso?” ko wɛ mbadia odingɔ 3. Kana la nde yimba l’avɛsa woshawɔ lɔkɔ. Oka wembola ehende wele l’ekomelo k’odingɔ akɔ nto, ko wɛ mombola kana nde nangaka mbeya ekadimwelo awɔ. Naka nde nangaka, sɛdingola la nde edingɔ ɛmɔtshi wayela. Wekelo wambotatɛ! Naka aha ɔsɔku, shande dibuku dia nde diadja ko wɛ mbɔsa tɛdikɔ dia kalola nto, ndeka dimɛna l’ɔkɔngɔ wa lushi ɔtɔi kana nshi hiende, dia ndjenda ekadimwelo.

⁴ Wɛ koka mbutɛ onto lakɔsɛ dibuku “ewo,” wate:

◼ “Lamboya nto dia sho ndjɔsɛdingola wembola ehende wendana la nyɔi wakiso kokadimula.” Oholande wembola akɔ. L’ɔkɔngɔ nyɔkɛtshanya l’awui watawɔ lo tshapita 6 l’ɛse k’ɔtɛ a dui wata ɔnɛ: “Sangwelo dia Wâle.” Lo ndjela diaaso diele lande, nyu mbeyaka tetemala la mbeka kana mbɔsa dimbola dia komelo diele l’odingɔ 7 dia mbika etshina ka sawo dia mbala kekina. Shikikɛ lushi la ndja nto. Shande kiatshi ya leeta oya lo nsanganya, ndo ɛnyande lo tshena pe woho weta nsanganya ya l’etshumanelo. Elɛnde la wangasanu tshɛ lo losanganya.

⁵ Lo soko la soko kana l’esambishelo ka tshakitudi, wɛ koka pɔhɔla sawo ɔnkɔnɛ:

◼ “Wɛ atayambolaka ɔnɛ kakɔna katokongɛ lo nshi yayaye ndo sho ndo nkɛtɛ? [Tshikande akadimule.] Bible mbutaka kɛnɛ kayonga lo nshi yayaye lo hiembola la tshɛkɛta tshɔi ɔnɛ: Paradiso! Tɔ nembetshiyaka ɔnɛ oma l’etatelo, Nzambi akalɔngɔsɔla etenyi kɛmɔ ka nkɛtɛ paradiso ka dimɛna efula lɛnɛ akandadje atshukanyi wakandatonge. Vɔ wakahombe ndodja nkɛtɛ k’otondo l’anto ndo takikadimulaka paradiso yema yema. Enda nganɛ wɛnyawɔ lanɛ woho wotonga nkɛtɛ.” Fola dibuku Ewo lo lɛkɛ 8, ko wɛ mbadia odingɔ 9 l’ɛse k’ɔtɛ a dui w’ɔnɛ: “Lɔsɛnɔ lo Paradiso.” L’ɔkɔngɔ ko nyu kɛtshanya tokanyi tele l’odingɔ 10, ndo mbadia divɛsa dioshawɔ lɔkɔ, Isaya 55:​10, 11. Tɛnde dia nyu tetemala la sawola dia mbeya nganɛ wayonga lɔsɛnɔ lo Paradiso kambolwama ndo sɛdingola odingɔ 11-16. Kana keketshande dia nde ndjiadia ndamɛ ko nyu mbokana lushi la ndjɔkɛtshanya lɔkɔ.

⁶ Naka nyu kotatɛ mbeka lam’akanyasawola mbala ka ntondo, kete lam’ayoyowembola wɛ koka mbuta wate:

◼ “Oko akatadite lam’akatasawola mbala ketshi, Nzambi ekɔ l’oyango wa kadimula nkɛtɛ k’otondo paradiso. Dui sɔ tondjaka dimbola dimɔtshi: Ngande wayonga Paradiso kakɔ?” Fola dibuku Ewo lo tshapita 1 l’odingɔ 11-16 l’ɛse k’ɔtɛ a dui w’ɔnɛ: “Lɔsɛnɔ lo Paradiso Kambolwama.” L’ɔkɔngɔ, ɛnyande sango diele lo lɛkɛ 4-5 ndo mbolande kana nde nangaka mbidjasɛ lo dihole dia dimɛna efula dia ngango. Ko wɛ ndjadia etelo ka ntondo l’odingɔ 17 lo lɛkɛ 10. Lo ndjela diaaso diele lande, tetemala la wekelo kana tɛnde ɔnɛ lam’ayoya mbala kekina wɛ ayoyôlembetshiya kɛnɛ kalɔmbama di’onto mbidjasɛ lo Paradiso kambolwama. Shande kiatshi mɔtshi ya leeta, lembetshiyande ekongelo ka nsanganya ndo elɛnde la wangasanu tshɛ oya lo Mbalasa ka Diolelo.

⁷ Dibuku Ewo ekɔ ehomɔ ka dimɛna efula lo mbewoya anto “lɔsɛnɔ la pondjo” lakatolake Nzambi. Lo mbekaka l’anto Bible lawakawɔ, tayokoka mbâsambiya elongamelo ka diambo kɛsɔ k’oma le Nzambi, ɔnɛ ‘lahataka kashi.’