Totombole Ɔn’aki Jehowa l’Enondo!
1 Lushi la lomingu, Nisana 9 ka l’ɔnɔnyi 33 lo tena diaso nɛ, olui a woke w’anto la wanga w’atoko l’anya awɔ wakayayola Ɔn’aki Jehowa l’enondo, Nkumadiɔndjɔ Yeso Kristo, oko ‘Nkumekanga koye lo lokombo la Jehowa!’ (Luka 19:38; Heb. 1:6) L’atei a nshi y’ekomelo yaketsha Yeso la kɛtɛ, lushi l’ɔtɔi, Nisana 10 la lushi la hende, Nisana 11 aki nshi yakaleke olimu efula, nde akakimamɛ l’olimu ande w’esambishelo ka lo sɛkɛ.
2 Lo nshi yaso nyɛ, olui okina w’anto woleki woke wele la wanga w’atoko l’anya awɔ, lo yoho ya didjidji, wekɔ lo mbida ekoko la dui dia wolo ɔnɛ: “Panda keko ka [Nzambi kaso, NW] latudjaseka lu kiti ka diulelu, ndu ka Ona-Okoko!” (Eny. 7:9, 10) Lo Mɔmbi 14, tayosangana dia sala Eohwelo ka nyɔi ka Kristo. Lam’ele lushi lɔsɔ lekɔ lo ndjasukana, onde sho hatokoke fudia weolo aso l’olimu ndo, nyomoda kioko shɔ ya lotombo yadama l’andja w’otondo la wolo oka?
3 Tonyomoleka Salangana l’Olimu: Apandjudi efula wakɔshi tɛdikɔ dia ndjâla ambatshi mboka wa tshanda lo ngɔndɔ k’Asasa a ndjoko kana ka Mɔmbi. Onde ndo wɛ kokaka sala woho akɔ wâmɛ? Naka ɔsɔku, kete lodia dɛmandɛ aha la tshimbatshimba. Ekumanyi kɛmɔtshi ayɔngɛnangɛna dia kadimola lo wembola wotshikitanyi wayambolayɛ lo dikambo dia woho w’olimu ɔsɔ.
4 Oyadi tayokoka ndjâla ombatshi mboka wa tshanda kana kema, tayoyatshutshuya dia salangana l’olimu lo ngɔndɔ ka Asasa a ndjoko kana ka Mɔmbi. Ondo etshumanelo mbeyaka tɔshi tɛdikɔ dia pomanaka lushi tshɛ lo ngɔndɔ kakɔ dia ntshɔ otsha la tosambisha. Lâsɔ, pombaka nama mbilo efula dia dikambo sɔ.
5 Tshumanelo tshɛ pombaka tɔshi tɛdikɔ dia pomana lo yoho ya lânde lushi la tanu, Mɔmbi 14 dia tosambisha. Kânga mbele lotumu la wolo ndjalaka dia nɔngɔsɔla losanganya la Eohwelo ka nyɔi ka Yeso, onto tshɛ la l’atei aso ambokeketshama dia nde sambisha lushi la tanu la pindju, naka nde kokaka sala ɔsɔku. Lâdiko di’esambishelo ka lo luudu la luudu, toyashikikɛ dia kana anto wakatelɛ oya lo Eohwelo ka nyɔi ka Yeso wekɔ la diaaso dia koma lɛkɔ ndo wohɔkɔ wonya la dihole diayosalema losanganya.
6 Tele Anto Akina ndo Takeketsha: Yeso akasha ambeki ande ɔlɛmbɛ ɔnɛ ate: “Nyutshaki okone, dia nyu mbuhomi.” (1 Kor. 11:24) Ambeki wa Yeso w’akitami, wanɛ wakakɛndakɛndaka lo wanya ande wakakitanyiya ɔlɛmbɛ ɔsɔ. Woho akɔ wâmɛ mbele okambi wa Jehowa tshɛ ambelamɛ dia ndjâla lawɔ dia sala Eohwelo ka nyɔi ka Yeso. Ayoyala nto ɔlɔlɔ dia sho mbelɛ ndo ase nkumbo kaso, wanɛ weka laso Bible ndo wanɛ wakakɛtshanya laso lo Bible, wanɛ weyana laso wele kema Ɛmɛnyi, ndo wanɛ wakamba laso olimu dihole ɔtɔi. Sho kokaka funda kombo yawɔ lo dikatshi di’aha sho mbohɛ ndoko onto.
7 Tayokondja waaso akina dia keketsha anto walanga la dikɔlɔ dia lushi l’Eohwelo ka nyɔi ka Yeso. Todje yimba dia ndja wonya w’ɔlɔlɔ woho wa ndjolongola eyoyo wayoya mbala ka ntondo. Naka efula ka wanɛ weka laso Bible wayoyala lawɔ, ayosungana dia opandjudi okina tayangi woho wa mbidjasɛ suke l’amɔtshi a l’atei awɔ lo wonya wa losanganya. Sho kokaka mbelɛ eyoyo woye dia ndjoyela dako dia lo sɛkɛ dia l’etshumanelo. Ekumanyi kayɔsɔnama dia sala dako dia lo sɛkɛ pombaka ndjalɔngɔsɔla dimɛna dia sawo diande keketsha anto.
8 Lam’ayotoshidiya la sala Eohwelo ka nyɔi ka Yeso tayosanganya awoyi aso lo memba osambu 105, wata ɔnɛ: “Saluons le Premier-né de Dieu!”, tayonga atɔi amɔtshi a wanɛ wangɛnangɛna lo woho wakawayasha l’ohetoheto l’olimu lo ngɔndɔ kakɔ, dia lotombo la Jehowa!