Tofudia Olimu Aso Wele oko Ɛngɔ k’Oshinga a Wolo
1 Yeso akɛdinya dikongelo dia Diolelo l’ɛngɔ k’oshinga a wolo efula. (Mat. 13:44-46) Onde ndo sho tekɔ oko anto wele lo wɛla wa Yeso, wanɛ wakasondja kɛnɛ tshɛ kaki lawɔ dia somba ɛngɔ k’oshinga a wolo? Naka ɔsɔku, kete tayetsha Diolelo dia Nzambi la ntondo, kânga dikambo diakɔ diekɔ wolo ndo nemanɛka la ndjasɛka.—Mat. 6:19-22.
2 Lam’ele olimu wakambaso lo dikambo dia Diolelo ekɔ ɛngɔ k’oshinga a wolo, sho pombaka ndjâla la saki ka fudia olimu akɔ. Yoho yaso ya lɔsɛnɔ ɛnyayɔ na? Onde sho tshikitanyaka yoho yakamba olimu aso? Sho kokaka sala ɔsɔku lam’asambishaso lo weoho wotshikitanyi wele oko: esambishelo ka lo soko la soko, waendelo w’eyoyo, mbeka l’anto Bible, esambishelo ka tshakitudi, ndo weoho ekina.
3 ‘Woho Akɔna Ayomoleka Sambisha Na?’ Ekɔ dimɛna dia onto l’onto sɛdingola olimu ande l’atei atei w’ɔnɔnyi w’olimu, dia nde mɛna kɛnɛ kakokande sala dia nyomoleka mbetsha wenya l’olimu, ndo nde ndjambola ɔnɛ: ‘Onde dimi kokaka ndjalɔngɔsɔla woho wa ndjalaka ombatshi mboka wa tshanda tena la tena kana nshi tshɛ? Onde dimi kokaka kamba olimu w’ombatshi mboka wa pondjo naka dimi tshikitanya awui amɔtshi?’ Wanɛ wayotatɛ olimu w’ombatshi mboka lo Lovula 1 wayokoka mbɔtɔ lo Kalasa k’ambatshi mboka ka l’ɔnɔnyi wayaye.
4 Apandjudi wakayadjɛ oweso wa sambisha efula lo yoho ya tshakitudi. Olimu ɔsɔ mbishaka etombelo w’ɔlɔlɔ tena efula. Akina wakɛnyi dimɛna dia vɔ pombaka pama efula lo kɛnɛ k’endana la kalola dia tenda anto ndo dia tatɛ la mbeka l’anto w’eyoyo Bible.
5 Naka tambɛna l’ekomelo ɔnɛ hatoyosambisha efula, woho akɔna ayotokoka fudia olimu aso na? Wanɛ wakakotsha eweso a lâdiko mbishaka dako dia pombaka ntondo ndjafundɛ dia mbetsha akambo wa Diolelo la ntondo oyadi pâ kakɔna kayonga laso. (Mat. 6:33) Ndjâla la mbetawɔ ndo mbɛkama le Jehowa ekɔ ohomba. (2 Kor. 4:7) Totetemale la mbɔlɔmba l’otema ɔtɔi. (Luka 11:8, 9) Toyashikikɛ dia Jehowa ayɔtshɔkɔla weolo wadjaso l’otema ɔtɔi dia kamba olimu ande efula.—1 Joani 5:14.
6 Tosawolake l’anangɛso ndo l’akadiyɛso wakafudia olimu awɔ. Towambole woho akɔna wakawatokomɛ wekamu aha la nɛmba. Ondo akambo wakawɛnyi vɔamɛmɛ ekɔ kɛnɛ kahombama dia sho mbetawɔ ɔnɛ ndo sho lawɔ kokaka pamia olimu aso.
7 Lam’alaso asawo wa lo Tshoto y’Etangelo la lo Olimu Aso wa Diolelo watɛkɛta dikambo di’esambishelo, tende, lo dombɛlɔ, woho akɔna wakokaso kamba olimu l’alako wele lɔkɔ. Tosale yoho yakɔ yamɛ lam’ɔtɔso lo sanganya ya l’etshumanelo ndo lo sanganya ya weke. Alako woshami lanɛ wakɔsama oma lo dako diakasalema lo losanganya l’otshimbedi la l’ɔnɔnyi ɔnɛ w’olimu. Artikɛlɛ ɔnɛ ekɔ sawo dia ntondo l’ɔnɔngɔ a wanɛ wele l’oyango wa tokimanyiya dia sho kamba olimu l’ekeketshelo kakatakondja lo losanganya lɔsɔ la woke.
8 Yeso akadje olimu ande yimba efula. Nde aketsha olimu akɔ la ntondo k’akambo ande tshɛ. Nde akate ate: “Ma diami, dieli ntsha lulangu la one lakantumi.” (Joani 4:34) Onde ndo sho tekɔ la woho a lomba la ngasɔ? Naka ɔsɔku kete mɛtɛ tayokondja akoka wa tshikitanya yoho ya kamba olimu aso ndo wa kahana l’anyaso “[akambo w’ɔlɔlɔ, NW]” wotombi oma l’ɛngɔ kaso k’oshinga a wolo.—Mat. 12:35; Luka 6:45.