Tâkimanyiya dia vɔ kitanyiya diewoyelo
1 Lam’atatasambisha, sho mbishaka anto diaaso dia vɔ ‘mboka akambo wa pɔlɔfɛsi ka l’Enyelo.’ (Eny. 1:3) Koko vɔ pombaka kitanyiya diewoyelo diakɔ, naka vɔ nangaka mbika lo “pa ka wuki.” (Eny. 7:14) Nsɛnɔ y’anto yekɔ lo wâle! Diɔ diakɔ diele, todje yimba dia nyomotɛnana l’anto wakɛnya posa kawɔ lo sawo diaso dimɔtshi diakatasale lo ngɔndɔ kɛnɛ.
2 Naka takatshike dibuku “Révélation: dénouement,” kokaka sho mbuta ɔnkɔnɛ:
◼ “Lekɔ l’ɔngɛnɔngɛnɔ dia nyomɛnana layɛ. Mbala kêtshi, takatɛkɛta dia pɔlɔfɛsi kɛmɔtshi ka lo dibuku di’Enyelo, ndo lakakotshikɛ okanda wakilembetshiya. Mɛtɛ wɛ akɛnyi dia dibuku di’Enyelo diekɔ wolo mboka, koko sho kokaka dimana fundo lo menda akambo wasalema ɛlɔ kɛnɛ lo ndjela atshina wa mɛtɛ kele l’atei a Bible. Dimi nangaka kɛnya lo taahe tɔmɔtshi ta wenya, akambo amɔtshi wata Bible di’etena kaso kɛnɛ.” L’ɔkɔngɔ diko, tokotole yâmbalo y’onto akɔ oya lo mukanda wokokiso tatɛ mbeka lande Bible.
3 Naka takatshike kiatshikatshi “Andja one wayoka?” lo wetelo aso wa ntondo, kokaka sho mbuta ɔnkɔnɛ:
◼ “Lekɔ l’ɔngɛnɔngɛnɔ dia kotana lâkayɛ ɛlɔ. Mbala k’etshi, takatɛkɛta di’akambo wa lo djembetelo yayɛnama la ntondo k’ekomelo k’andja. [Ohola waɛnamelo amɔtshi wasungana wa lo djembetelo yakɔ lo Mateu 24:3-14.] Onde wɛ akɛnyi dikambo dimɔtshi di’oma salema l’andja ɔnɛ kana lo dihata dimɔtshi mbutate l’ɛtshi kɛmɔtshi ka ngelo, dikambo diambokotsha etenyi kɛmɔtshi ka djembetelo oka?” Lam’ayotokamba l’esato wa lo tshapita 16 ya dibuku Révélation: dénouement, tɔ̂mbɔlɛ okotshamelo wa pɔlɔfɛsi mɔtshi ya lo Bible. L’ekomelo ka diembwelo, totatshi ɔtɛ wa dako dia lo sɛkɛ dia lo lomingu lakɔ ndo têle onto akɔ dia nde ndja lo Mbalasa ka Diolelo.
4 Naka takêlɛ ɔtɛkɛtshi wakiso oya lo losanganya laso lɔmɔtshi, kokaka sho mbuta ɔnkɔnɛ:
◼ “Mbala k’etshi kakamaye dia ndjokenda, takatɛkɛta dia ekakatanu wa l’etena kaso kɛnɛ ndo yoho yambɔlɔngɔsɔla Nzambi dia mbâkandola oma l’ekimanyielo ka Yeso. Dimi lakakêlɛ nto oya lo losanganya laso lɔmɔtshi, lo sanganya yatotêkaka Bible. Dimi lakaye ɛlɔ dia ndjokohola dia wɛ ambêlamɛ lo sawo dia lo sɛkɛ. [Shikikɛ wonya la ɔtɛ wa dako.] Wɛ ayohotɔ elembetshiyelo k’etena kaso kɛnɛ kambofukutana lam’ayoyɔtɔka lo sanganya esangɔ tshɛ, lɛnɛ atotɔkɛtshanyaka efula lo Dui dia Nzambi, lo pɔlɔfɛsi yande ndo lo dionga diahomba monga l’Okristo.” L’ɔkɔngɔ diko, toyatshutshuya dia sɛdingola akambo amɔtshi wasungana wele lo periodikɛ yêke ka tomba kana wanɛ wele lo tshapita 41 ya lo dibuku Révélation: dénouement. Sho kokaka nto mbika epole ɔsɛkɛ l’esato wele lo lɛkɛ la dikatshi la 294, 299 la 308. Naka kokaka, tɔ̂shi tɛdikɔ dia kimanyiya onto akɔ dia nde ndja lo losanganya lomingu lakɔ.
5 Naka ɔtɛkɛtshi wakiso akatohokamɛka tsho, kete ɛtɛkɛta ɛnɛ mbeyaka mbokimanyiya:
◼ “Lakangɛnangɛna sawo diaso di’etshi dia kɛnɛ k’endana l’akambo wa lo Bible. Lambonyomoya nɛ dia dimi nangaka dia wɛ kondja ewo ka kɛnɛ kakalake Nzambi wanɛ walanga nyomêka akambo efula w’endana lande.” Tâdia Joani 17:3, ko l’ɔkɔngɔ diko, towɛnya kiatshikatshi Loseno la woladi l’andja w’oyoyo.
6 Ngandji k’okaso lɔsɛnɔ la lowando lele laso l’otshungɔ atutshutshuya dia sho sala waembwelo w’eyoyo le anto wele la posa! Tâkimanyiya dia vɔ kitanyiya diewoyelo nɛ dia “etena k’akambu ako kaya suki.”—Eny. 1:3.