Tolomialomia Saki y’Anto lo Dikambo dia Dibuku Vivre éternellement
1 Lam’atshɔso dia towaenda, sho mɛnaka nshi tshɛ, dia anto wekɔ lo ndjakiyanya la “tukanyi t’akambu wa l’etena kene.” (Mako 4:19) Sho pombaka ntokomɛ lotumu la wolo: nomialomia saki kawɔ l’ekimanyielo ka wɛnyanyelo watshutshuya onto dia nde kana lomba. L’etatelo, anto efula hawoleke ndjasha lo losango laso. Lam’ayotɔtɛkɛta dia dikambo dimɔtshi di’endana la lɔsɛnɔ lawɔ, sho kokaka mbaotsha saki ka losango la Diolelo. Yoho yoleki dimɛna ya tatɛ asawo ele sɔna tokanyi takotola yambalo tele lo dibuku Vivre éternellement. Akokaso mbuta na?
2 Sho kokaka tatɛ ɔnkɔnɛ:
◼ “Otondonga wɛ ekɔ la dikoka, naa dikambo dioleki mbata anto asolo lo nshi yaso nyɛ diotoyolanga shidiya na? [Tshikɛ onto akɔ dihole akadimole ndo, naka sunganaka, tetawɔ ɔnɛ ndo anto akina efula mbakanyiya ɔsɔku.] Polo ndo kakianɛ, ewandji wa mbolamatadi wekɔ lo mbisha okandwelo wa lo tshenyi ya wonya l’ekakatanu wele ɛlɔ kɛnɛ, wekɔ efula heyama ndo ohokosanu. Koko onto ɔmɔtshi ekɔ, lele la wolo ndo la lolango la shidiya pâ tshɛ yanyɔkɔla anto. Ohenda kɛnɛ kata Osambu 145:16. [Ala divɛsa diakɔ ndo ɛnyande asango wele lo lɛkɛ 11-13.] Palagalafɛ 14 lo lɛkɛ 14 tɛkɛtaka dia tokanyi tomiso la mbuta ndo komɛka la dimbola nɛ: ‘Ko etena kakɔna?’ ” Tolembetshiya ɔnɛ dibuku diakɔ kadimolaka lo dimbola sɔ ndo towoshadiɔ naka onto akɔ ekɔ lo mɛnya saki.
3 Oko ɛnyɛlɔ, sho mbeyaka mbuta ɔnɛ:
◼ “Ondo wɛ ambokaka dia nyɔi k’onto lalanganyɛ efula kotshikaka etshike. Ondo wɛ akayaoke kɛtshikɛtshi ndo akashisha dikongelo ndo, aha la tamu, wɛ akakane lomba lo wembola ɛnɛ: [Ala wembola wele lo palagalafɛ 1, lɛkɛ 76.] Onde wɛ hokeketshama lam’ayoyeya ekadimwelo lo wembola ɛsɔ? Ondo wɛ ayokeketshama dia mbeya ɔnɛ Bible mbishaka dikongelo dimɔtshi dia mɛtɛ lo dikambo dia wanɛ tshɛ wakavu. [Ala Joani 5:28, 29.] Dibuku nɛ tokimanyiyaka dia shihodia woho akɔna wele wanɛ wakavu ndo dikongelo diakɔna diele laso lo nshi yayaye.” Tɔtɛkɛtɛ esadi esadi dia kɛnɛ kele lo tshapita 8 la 20. Naka ɔtɛkɛtshi aso ekɔ oko lo mɛnya saki, towote dia sɛdingola dibuku diakɔ.
4 Ondo tena dimɔtshi tayonga la diaaso dia sambisha lo woho wa tshakitudi. L’etena kɛsɔ, sho mbeyaka mbuta, oko ɛnyɛlɔ, l’ɛtɛkɛta aso shoamɛ ɔnɛ:
◼ “L’etena kaso kɛnɛ andja wekɔ lo sutshasutshama l’ekakatanu ndo aha la tamu, wɛ ekɔ la yema yayɛ y’ekakatanu akɔ. Lonyangu ko, mɛnamaka oko wanɛ waha l’onongo mbaleka mɛna pâ. Onde wɛ fɔnyaka dia Nzambi ayoshidiya fɔnu tshɛ lushi lɔmɔtshi? [Tshikɛ onto akɔ dihole akadimole.] Dimi nangaka kɛnya kɛnɛ kasangoya Nzambi dia salɛ wanɛ tshɛ wawokambɛ. [Ala Osambu 37:40, l’ɔkɔngɔ fola dibuku Vivre éternellement lo lɛkɛ 99.] Dibuku nɛ nembetshiyaka lande na kakikɛ Nzambi kɔlɔ ndo woho akɔna wayondoyikumiya.”
5 Naka wɛ ekɔ opandjudi weke dikɛnda, wɛ mbeyaka mɛnyanya dibuku l’ekimanyielo k’esato wele lo lɛkɛ 156-8. Wɛ kokaka tambudi dimbola nɛ ntondo:
◼ “Onde wɛ nangaka mbidjasɛ l’andja wa nganɛ? [Tshikɛ onto akɔ dihole akadimole.] Osato l’osato w’amɛna ɛnɛ shikikɛka daka diakasalema lo Dui dia Nzambi, Bible. [Ɛnyande avɛsa w’oma lo Bible woshilami.] Dibuku nɛ diayokokimanyiya dia wɛ nyomoleka mbewa lo kɛnɛ k’endana la daka diakalake Nzambi dia kadimola kɛtɛ k’otondo paradiso. Aui efula w’ohomba tanemaka lɔkɔ ndo sunganaka dia diombɛ etena ka diala.”—Joani 17:3.
6 Lam’ɛnyanyaso dibuku, tatohɛkɛ mbutɛ ɔtɛkɛtshi aso oshinga w’ekimanyielo ndo l’ɔkɔkɔ akɔna walɔmbamatɔ.