Ɛlɔlɔ Watomba Oma lo Kamba Kâmɛ
1 Onde wɛ fɔnyaka dia sho kokaka kondja ɛlɔlɔ lam’akambaso kâmɛ la anyaso l’olimu wa sambisha? Yeso akafɔnyaka ngasɔ. Kânga mbaki dinela woke ko ekambi yema tshitshɛ, nde akatome ambeki 70 dia vɔ tosambisha “ahendi ahendi.” Ande diɛsɛ diaki onto l’onto ladiɔ dia sambisha “lu esumba tshe ndu lu ahuli tshe wakandalangi ntsho” lee!—Luka 10:1, 17; Mat. 9:37.
2 Ekɔ dimɛna kamba kâmɛ la anyaso. Amɔtshi l’atei aso wekɔ diki ndo wekɔ l’ekakatanu dia mbutɛ anto wahaweye dui diele lawɔ l’otema. Shambu ya ntshɔ kâmɛ l’opandjudi okina kokaka tokeketsha dia sho mbewoya Dui dia Nzambi la dihonga. Sho kokaka kotsha olimu aso aha l’okakatanu lo yoho yakawatolowanya naka sho bu ɛpɔlɔngɔ. (Tok. 27:17) Kanga lomba akate ate: “Antu ahendi ndeka untu otoi.”—Und. 4:9.
3 Ekɔ dimɛna efula sambishaka kâmɛ l’apandjudi ndo l’ambatshi mboka wa weoho la weoho. Ɔpɔstɔlɔ Paulo aki l’asekande wakatakambaka lande kâmɛ oko: Baranaba, Silasi, Timɔtɛ, Joani Makɔ, ndo akina, ndo wakakondja ɛlɔlɔ efula lam’akawakambaka kâmɛ lo yoho shɔ. Kokaka ndjâla ɔsɔku ndo lo nshi yaso nyɛ. Onde tambosambishaka l’onto ɔmɔtshi laya edja l’etshumanelo? L’ɔkɔngɔ wa sho sɛdingola yewo yande ya sambisha, aha la tamu takɔshi tokanyi t’ɔlɔlɔ takatokimanyiya dia sho ndjalɔngɔsɔla dimɛna. Onde tambotshindɛka apandjudi weke eyoyo? Lâsɔ takakoke mbaewoya kɛnɛ kakateke, ndo dui sɔ diakakimanyiya dia vɔ sambisha dimɛna efula ndo ngɛnangɛna efula l’olimu.
4 Onde nshi nyɛ tekɔ lo mbeka l’onto Bible? Naka ɔsɔku mbediɔ, lande na ahatelɛ ekumanyi kɛmɔtshi kana omendji w’otshimbedi dia nde totshindɛ? Ekɔ dimɛna dia ambeki wa Bible mbeyana l’emendji. Naka tekɔ lo kandakanda dia nɔmbɔla wekelo etena kele ekumanyi lawɔ, ondo nde ayetawɔ dia nɔmbɔla lo tosha diaaso dia sho menda yoho yalakanyande. Towombole l’ɔkɔngɔ wa nde nɔmbɔla dia kana nde ekɔ l’alako wayotosha diaaso dia sho kimanyiya ombeki dia nde pama esadi esadi.
5 Tokeketsha anyaso lam’asambishaso kâmɛ lawɔ. Totake paka akambo w’ɔlɔlɔ lam’atɛkɛtaso lo kɛnɛ k’endana la mbilo. Aha sho tɛkɛta ɔtɛkɛtatɛkɛta lo dikambo dia anyaso ndoko yema ndo aha sho ndjakiyanya lo dikambo dia tɛdikɔ tambɔsama l’etshumanelo. Lo yimba yaso, tongake paka l’olimu aso ndo ɛlɔlɔ watosha Jehowa. Lam’asalaso ɔsɔku, sho kalolaka la wakaso kalo tsho lo nyuma, sho la anyaso.
6 Ondo ekɔ wolo le so dia sambisha l’anangɛso l’akadiyɛso tena tshɛ. Koko, naka sho kokaka sala ɔsɔku, lande na ahatayalɔngɔsɔla dia sambisha etena kɛmɔtshi kâmɛ l’opandjudi okina? Tayokondja ɛlɔlɔ oma lo dikambo sɔ sho akɔ ahende.—Romo 1:11, 12.