Ambatshi Mboka Kimanyiyaka Akina
1 Yeso akate ate: “Dinela dieko efula, keli ekambi mbeli tshitshe; okone nyolombe uwandji a dinela, dia nyutumela ekambi lu dinela diandi.” Lam’ele ekambi waki yema tshitshɛ l’eleko ka ntondo ko mbilo kawɔ kaki woke, Yeso akakoke mbâtoma ɔtɔi ɔtɔi dia tewoya lokumu l’ɔlɔlɔ woho wa vɔ sambisha anto efula. Koko, nde “akâtumi ahendi ahendi.” (Luka 10:1, 2) Lande na ahende ahende na?
2 Ambeki ande waki eyoyo ndo watahokɔ olimu dimɛna. Lo sambisha kâmɛ, vɔ wotolakanyana ndo wotokeketshana l’asawɔ. Oko akate Sɔlɔmɔna, “antu ahendi ndeka untu otoi.” (Und. 4:9, 10) Kânga l’ɔkɔngɔ w’otshulwelo wa nyuma k’ekila lo Pɛntɛkɔsta ka lo 33 T.D., Paulo, Baranaba, l’akina wakatshindɛka anyawɔ ambetawudi l’esambishelo. (Etsha 15:35) Ande diɛsɛ diaki l’anto waketshama oma le apami asɔ vamɛ, apami wakoka mɛtɛ lee!
3 Ekongelo ka Dimɛna Efula k’Olowanyelo: Etshumanelo k’Akristo ka nshi nyɛ akalɔngɔswama dia sambisha oko kɛnɛ kaki l’eleko ka ntondo. Ndo tɔ lawɔ tolowanyaka. Onto tshɛ l’atei aso la dia mongaka la saki ka sambisha lokumu l’ɔlɔlɔ dimɛna efula. Dia apandjudi efula ndowanya yewo yawɔ ya sambisha, wambotosha ekimanyielo kɛmɔtshi.
4 Atete edja, lo Kalasa k’Olimu wa Diolelo, la Société akewoya dia ekongelo kɛmɔtshi kambosalema k’ɔnɛ ambatshi mboka wayokimanyiyaka anto akina l’olimu w’esambishelo. Onde ohomba w’ekimanyielo ka ngasɔ wekɔ? Eelo. Ɛnɔnyi esato wetshi ɛnɛ, apandjudi ndekana miliyɔ wakabatizama, ndo efula l’atei awɔ wekɔ l’ohomba wa ndowanyema dia monga tomanamana l’esambishelo. Akokaso mbelɛ dia mbâkimanyiya na?
5 Ambatshi mboka kokaka mbâkimanyiya. Ɔlɔngɔswamelo wa Jehowa mbashaka lokema l’alako ndo olowanyelo. Lo mingu hiende yɔtɔwɔ Kalasa k’Ambatshi Mboka, vɔ nongolaka wetshelo wasungana l’ehomba awɔ. Vɔ kondjaka ɛlɔlɔ nto oma lo nsanganya yɔtɔwɔ l’emendji w’otshimbedi la wa distrikɛ, ndo alako wawasha dikumanyi. Mɛtɛ, aha ambatshi mboka tshɛ mbahokɔ olimu dimɛna oko Paulo la Baranaba, koko vɔ nongolaka wetshelo wa mamba, ndo vɔ ngɛnangɛnaka dia mbewoya akina wetshelo akɔ.
6 Akɔna Ayokimanyiyama na? Onde paka apandjudi w’eyoyo la wanɛ weke kabatizama ato mbele l’ohomba w’ekimanyielo kɛsɔ? Atonga na! Akristo w’akɛnda ndo akina, esombe wambeya sɔlɔ deko aha nɛ wayɔngɛnangɛna dia kimanyiyama lo weho ɛmɔtshi w’esambishelo. Amɔtshi kahanyaka ekanda efula, ɔsɔ ekɔ dui dia dimɛna efula, koko vɔ mbokaka wolo membola anto kana tatɛ mbeka la wɔ Bible. Akina tatɛka mbeka l’anto Bible aha l’okakatanu, koko anto weka la wɔ hawohame. Kakɔna kâshimba na? Vɔ kokaka nɔmba ambatshi mboka wambohokɔ olimu dia vɔ mbâkimanyiya l’akambo asɔ. Ambatshi mboka amɔtshi hawɔkɔhɛ la mbisha anto saki, tatɛ mbeka la wɔ Bible ndo mbâlɔmbɔla oya l’ɔlɔngɔswamelo. Diewo diawɔ diayonga ohomba efula l’ekongelo kɛnɛ k’oyoyo.
7 Onde wɛ mɛnaka ɔnɛ ekongelo kayɛ ka wenya hatokosha diaaso dia wɛ sukɛ randevu w’esambishelo wa l’etshumanelo oko akombolayɛ? Naka ɔsɔku, kete ondo ombatshi mboka ɔmɔtshi ayokoka sambishaka la yɛ lo wenya wele apandjudi akina bu la diaaso.
8 Ekɔ Ohomba Efula Kamba Kâmɛ: Dikumanyi diayɔsaka tɛdikɔ mbala hiende l’ɔnɔnyi dia apandjudi wakombola kondja ekimanyielo ka lânde kikondja lo tshimbo y’ekongelo k’ɔnɛ: Ambatshi Mboka Kimanyiyaka Akina. Naka wɛ mbetawɔka kikondja, ko wɛ sawola l’ombatshi mboka woshawɔ ɔkɛndɛ wa kokimanyiya, nyotshe ekongelo ka wenya kasungana dia sambishaka ndo nyokilɛnya. Nyɔlɛnyake randevu tshɛ. Lam’atanyasambisha, lembetɛ toho toleki dimɛna ta mbewoya lokumu l’ɔlɔlɔ. Kanyiya bonde kele toho tɔmɔtshi ta tatɛ sawola l’anto mbishaka etombelo w’ɔlɔlɔ. Dja yimba l’alako wayokosha ombatshi mboka ondo dia wɛ ndowanya asawo ayɛ. Naka wɛ kamba l’awui wekayɛ, kete wɛmɛ ayɛna dia wɛ ambohokɔ olimu akɔ ndo anto akina wayɛna dikambo diakɔ. (Enda lo 1 Timote 4:15.) Nyokambe kâmɛ tena tshɛ dienyu la diaaso, nyosambisha lo weho tshɛ, mbidja ndo esambishelo ka lo tshakitudi, koko koyasha djekoleko lɛnɛ eyɛ l’ohomba w’ekimanyielo.
9 Omendji w’olimu ayoyasha dia mbeya woho wamboyohama. Tena tshɛ, nde ayombolaka ɔnɔmbɔdi anyu wa Wekelo wa Dibuku ɛlɔlɔ wakondjayɛ oma lo ekongelo kɛnɛ. Omendji w’otshimbedi ayokokimanyiya ndo nde lawɔ lam’ayondembola etshumanelo kanyu.
10 Jehowa nangaka di’ekambi ande ndowanyema ndo ‘monga l’akoka wa ntsha olimu tshɛ w’ɔlɔlɔ.’ (2 Tim. 3:17) Tɔshi ekongelo k’ɔnɛ: Ambatshi Mboka Kimanyiyaka Akina, oko yɛdikɔ y’ɔlɔlɔ efula yakɔsama dia kimanyiya wanɛ walanga ndowanya akoka awɔ wa sambisha ɔtɛkɛta. Naka wɛ ekɔ la diɛsɛ dia kamba olimu ɔsɔ, kete kambawɔ la lowando, la ndjakitshakitsha ndo l’ɔngɛnɔngɛnɔ.