Yimba Yakɔna Yɛnyaso?
1 Paulo akadihiya mukanda ande wakandafundɛ etshumanelo ka la Filipi l’ekeketshelo kɛnɛ ate: “Ngandji ka mamba ka Khumadiondjo Jesu Kristu kayali [la yimba yɛnyanyu, NW]!” (Fil. 4:23) Nde akandola ase Filipi nɛ dia vɔ wakayashaka l’otema ɔtɔi l’olimu wa sambisha lokumu l’ɔlɔlɔ, waki l’ohetoheto ndo onto l’onto akayakiyanyaka la ngandji tshɛ lo dikambo di’osekande.—Fil. 1:3-5; 4:15, 16.
2 Sho pombaka ndjâla la saki ka mɛnya yimba yakɔ yâmɛ lo etshumanelo kaso. Etena kele anto tshɛ l’ohetoheto, kɛnyawɔ ɔlɔlɔ awɔ ndo kalongɔnawɔ, yimba mɔtshi tombaka yɛna anto watoshishima. Yimba y’ɔlɔlɔ ndo ya ngandji mbishaka diaaso dia sho ndjâla kâmɛ ndo pama lo nyuma. (1 Kor. 1:10) Yimba ya kɔlɔ mbishaka ohekwelo ndo ɛnɛndɛ.—Eny. 3:15, 16.
3 Dikumanyi Mbishaka Ɛnyɛlɔ: Dikumanyi diekɔ l’ɔkɛndɛ wa nama yimba y’ɔlɔlɔ efula l’asawɔ ndo l’atei w’etshumanelo. Lande na? Nɛ dia eongelo kawɔ la lɔkɛwɔ lawɔ lekɔ la shɛngiya lâdiko di’etshumanelo. Sho ngɛnangɛnaka dia ndjâla la dikumanyi diasambisha l’ohetoheto, diatolongola l’ɔmɔnɔmɔnɔ w’efula ndo la tshɛkɛta ya dimɛna, ndo diasha alako w’ɛlɔlɔ ndo w’eshika, oyadi lo oshɛshɛ kana la diko dia lɔyɛnga.—Heb. 13:7.
4 Oko wadieyaso, sho tshɛ pombaka mbidja wolo dia etshumanelo ndjâla la ngandji, nongolaka anto, ohetoheto ndo nge lo nyuma. Onto l’onto l’atei aso kokaka ndjaɛnya osalanganu ndo ndola la ngandji l’akambo ande wasande l’anto akina. (1 Kor. 16:14) Watɔnelo wotombi oma lo ɛnɔnyi wa mbotɔ, lokoho la demba, ewo ka mukanda kana ekondjelo ka falanga hahombe tanema l’atei aso. (enda Efeso 2:21) Elongamelo kaso tokimanyiyaka dia mɛnya yimba y’ɔngɛnɔngɛnɔ, ya nongolaka anto ndo ohetoheto l’olimu.—Romo 12:13; Kol. 3:22, 23.
5 Wanɛ tshɛ wasangana laso, mbidja ndo anto weke ka ndjasha l’akambo wa mɛtɛ, pombaka ndjaoka dia wambolongɔma l’atei a nkumbo k’anangɛso ndo mbeya ɔnɛ ngandji la dilɛmiɛlɔ dia Nzambi diekɔ lo kamba olimu l’atei a nkumbo kakɔ. Lam’asambishaso ndo wɛnyaso waonga w’amɛna efula w’Akristo, sho shikikɛka dia etshumanelo kekɔ “ekoho la usuko w’akambu wa mete.” (1 Tim. 3:15) Tekɔ lo namema nto lo nyuma oma l’ekimanyielo ka ‘ki ka Nzambi’ kalama etema aso ndo akoka aso wa lo yimba. (Fil. 4:6, 7) Nyɛsɔ toyatshutshuya sho tshɛ dia mɛnya yimba yayotokimanyiya dia kondja wahɔ oma lo ngandji ka mamba ka Jehowa, oma lo tshimbo ya Yeso Kristo!—2 Tim. 4:22.