Tokeketsha Anyaso dia Vɔ Ndjâla Ambeki Ande

¹ Paulo akafunde lo 1 Koreto 3:6 ate: “Dimi lakune, Apolo akatela ashi, keli [Nzambi, NW] akatosha diango.” Nde akɔshi ɛnyɛlɔ kɛsɔ dia kimanyiya anango lo vɔ mbeya ohomba wa kamba kâmɛ l’ɛlɔmbwɛlɔ ka Kristo. Oma l’ɛtɛkɛta ɛsɔ, nde akâkimanyiya nto dia vɔ mbeya ɔkɛndɛ w’ohomba efula waki lawɔ wa monɛ la mbitela ashi.

² Olimu ɔsɔ washa eko pombaka shila l’etena kaso kɛnɛ. Sho wanɛ wele Akristo, tekɔ l’ɔkɛndɛ wa kimanyiya anyaso dia vɔ ndjâla ambeki wa Yeso. (Etsha 13:48) Woho akɔna wayotowesa saki kolomialomiami l’ekimanyielo ka dibuku Le plus grand homme de tous les temps?

³ Naka tambokalola dia tênda onto lakalongola dibuku, sho mbeyaka mbuta ɔnɛ:

◼ “Mbala ka komelo kakatɛnana, takasawola lo dikambo dia woho w’onto waki Yeso. Lakangɛnangɛna dia kotshikɛ dibuku Le plus grand homme de tous les temps. Dikambo diakɔna diakaleke konda l’asolo lo wetshelo la lonto la Yeso na?” Tshikɛ onto akɔ etena akadimole. Tshɔka lo tshapita 113, kele tɛkɛta dikambo dia ɛnyɛlɔ ka dimɛna efula k’okitshakitsha kakatshike Yeso. Ala Filipi 2:8 dia wɛ mɛnya woho wakɔsaka ɔpɔstɔlɔ Paulo dionga dia ndjakitshakitsha dia Yeso. Wɛ mbeyaka shikikɛ ɔnɛ sho kokaka mbeya awui efula oma l’ekimanyielo ka wekelo wa Bible wa tena la tena.

⁴ Ondo tayoleka nanga mbɔtwɛlɔ ka lo sawo kɛnɛ:

◼ “Takatɛkɛta dikambo dia elimu wakasale Yeso lam’akinde lanɛ la kɛtɛ wakɛnyaka ɔnɛ nde ndjakiyanyaka mɛtɛ lo dikambo diaso. Oko akanayɛ, ayondosala l’ɔkɔngɔ diko dia wanɛ wambosowa efula mumuya na?” Tshikɛ onto akɔ etena akadimole. Fola dibuku lo tshapita 133, kele enda tokanyi tele lo odingɔ wa tanu. Ɛnyande sango diele lo lɛkɛ layelana ndo lembetshiyande nganɛ wayoyala akambo wa lo lɔsɛnɔ lam’ayosalema lolango la Nzambi la kɛtɛ oko asalemalɔ l’olongo. Ka epole ɔsɛkɛ lo ɛlɔlɔ wokokiso kondja naka sho mbeka awui asɔ efula.

⁵ Naka onto hɛnyisha saki kakoka dia mbosha dibuku ko mbala ka ntondo, ondo ayokoka dia wɛ tatɛ sawola lande nganɛ:

◼ “Dimi kanaka dia sho tshɛ mbetawɔka dia mbuta ɔnɛ anto efula ɛlɔ kɛnɛ wekɔ lo nɔmbɔla lɔsɛnɔ lawɔ lo ndjela onto ɔmɔtshi lɔsawɔ oko ɛnyɛlɔ. Yeso Kristo ekɔ ɛnyɛlɔ koleki diɛnyɛlɔ tshɛ diokokiso ndjela. Dimi nangaka kewoya wetshelo ɔmɔtshi w’ohomba efula wakamakondja lam’akameke ɛnyɛlɔ kakatshike Yeso. [Tshɔka lo tshapita 40 ya dibuku Le plus grand homme kele kotola yambalo yande lo wetshelo wa kɛtshi ka mamba ka Yeso.] Dikambo sɔ diakambohola la wolo tshɛ lo yɛdikɔ yakɔna yahombami mɛnya dionga dia ngasɔ otsha le onyami.” Ala Mateu 5:⁠7. Naka kakianɛ onto akɔ ambɛnya saki kambe, towosha dibuku, kana biukubuku Dieu se soucie-t-il vraiment de nous?

⁶ Kana ondo tayolanga pemba la wɛnyanyelo ɔnɛ wa mbala kakɔ ɔtɔi:

◼ “Mbala ka ndjihelo kakamaye, takatɛkɛta lo dikambo di’ohomba wa mbeka dia mbeya Yeso. Sho mbalaka lo Joani 17:3 ɔnɛ okondjelo wa ewo kɛsɔ ‘kɛdikɛdi lɔsɛnɔ la pondjo.’ Woho akɔna wokokiso kikondja?” Tshikɛ onto akɔ etena akadimole. Tetemala la sawo lo mbolembetshiya woho wasalema wekelo wa Bible ndo woho wa kondja wahɔ oma lɔkɔ.

⁷ Paulo mbutaka dia okambi l’okambi “ayulungula difutu uku ulimu andi.” (1 Kor. 3:⁠8) Naka sho ndjatshutshuya dia kimanyiya anyaso l’osalosalo dia vɔ ndjâla ambeki wa Kristo, kete mɛtɛ difuto diaso diayoyala woke.