Toyalake la Lotumu Nshi Tshɛ
1 Ekambi wa Jehowa wekɔ la wesanu efula. Vɔ wekɔ l’ɛkɛndɛ heyama l’atei a nkumbo yawɔ, lɛnɛ akambawɔ olimu ndo lo kalasa. Lâdiko diakambo asɔ tshɛ, vɔ wekɔ la “lotumu efula l’olimu wa Nkumadiɔndjɔ” nshi tshɛ. (1 Kor. 15:58, NW) Sho pombaka nɔngɔsɔlaka nsanganya ya l’etshumanelo ya lomingu la lomingu ndo mbɔtɔka lɔkɔ. Sho keketshamaka di’aha mbetsha lomingu l’otondo ko aha sambisha. Sho pombaka ndjaombɛ etena k’ɔlɔlɔ ka mbekaka Bible mbala la mbala shoamɛ ndo l’atei a nkumbo. Dikumanyi l’ekambi w’olimu wekɔ l’ɛkɛndɛ heyama l’atei w’etshumanelo. Mbala mɔtshi, sho nɔmbamaka dia kimanyiya wanɛ wele l’ohomba.
2 Tena efula, amɔtshi l’atei aso tayaokaka dia kɛnɛ tshɛ kasalawɔ kamboleka wotsho le wɔ. Tete le, anto woleki ndjala la wesanu efula kokaka ndjâla l’ɔnɔngɔ a wanɛ woleki ngɛnangɛna, nɛ dia vɔ hawɛngɛnga naka ndo naka vɔ wekɔ la lokanyi l’ɔlɔlɔ.—Ond. 3:12, 13.
3 Ɔpɔstɔlɔ Paulo aki pami kɛmɔtshi kaki la lotumu efula. Koyanga mbakandayakotshɛka ehomba ande lo takaka mvudu y’apɛma, nde akakambe efula oleki apɔstɔlɔ akina tshɛ. Nde akayaɛnya dia nde aki osambisha wahalɛmbɛ, asambisha lo sɛkɛ ndo lo luudu la luudu, aha la minya yimba l’ɛkɛndɛ ande w’olami l’atei a lemba l’ɛkɔkɔ. (Etsha 20:20, 21, 31, 34, 35) Kânga mbakinde l’olimu wonya tshɛ, Paulo akalangaka nyomokamba olimu efula tena tshɛ l’olimu wakandakambɛka Jehowa.—Enda lo Romo 1:13-15.
4 Paulo kɔmɛngɛngaka ndo akayalaka paka l’otema w’ɔngɛnɔngɛnɔ âhɛ asolo lo wolo wakakokaka Jehowa mbosha. Lo asho ande, olimu ande waki ohomba dia kambema ndo nde akakondjaka ɔngɛnɔngɛnɔ oma lɔkɔ. (Fil. 4:13) Nde akeyaka ɔnɛ Nzambi hatohɛ olimu ande. (Heb. 6:10) Nde akatshutshuyamaka l’ɔngɛnɔngɛnɔ wa kimanyiya onyande. (1 Tes. 2:19, 20) Eshikikelo kaki lande ka mɛna okotshamelo w’elongamelo kande kaki l’etshina lo Bible akahɛtshahɛtsha ohetoheto ande.—Hɛb. 6:11.
5 Woho akɔ wâmɛ, tênde ɛlɔlɔ wokokiso kondja oma l’olimu aso. Woho wɔtɔso ndo washaso kɔmatɛrɛ lo nsanganya ya lomingu la lomingu tokeketshaka ndo keketshaka anto akina. (Hɛb. 10:24, 25) Weolo wadjaso l’otema ɔtɔi dia mbewoya anto tshɛ lokumu l’ɔlɔlɔ kimanyiyaka etshumanelo dia tɔ pama, nɛ dia sho pɛtshahɛtshaka saki kɛnya anto ndo kimanyiyaka eyoyo dia vɔ sangana la so. (Joa. 15:8) Lam’akimanyiyaso wanɛ wele l’ohomba, sho shinganyaka amama aso ndo mbishaka diaaso dia lomba la nkumbo ndjâla l’etshumanelo. (Jak. 1:17) Lâdiko dia lâsɔ tshɛ, l’ɛnyɛlɔ ka Paulo, tatohɛke pondjo ɔnɛ lam’akambaso elimu w’ɔlɔlɔ nshi tshɛ, sho ngɛnyangɛnyaka Jehowa Nzambi. Sho mɛnaka di’ekɔ diɛsɛ dia mamba dia mbokambɛ. Le so, ndoko yoho ya lɔsɛnɔ yoleki shɔ dimɛna.
6 Naka tayoyalaka la lotumu efula, kete tayoyakondjɛka ɔlɔlɔ okina. Mɛnamaka oko wonya mbetaka esadi esadi lam’ayelaso ekongelo ka lo nyuma ka dimɛna. Lam’eyaso ɔnɛ lushi tshɛ leta tosukanyaka l’andja w’oyoyo, sho tayetawɔ lɔsɛnɔ l’elimu efula lasɛnaso nshi nyɛ l’ɔngɛnɔngɛnɔ tshɛ. Ndo nto sho ndjeyaka ɔnɛ ekɔ dui dia tshundju dia ndjalaka la lotumu wonya tshɛ, ɔsɔku mbeso kema la wenya efula wa ndjela eweso w’anyanya wa l’andja ɔnɛ.—Ef. 5:15, 16.
7 Mɛtɛ, lotumu lekɔ efula l’olimu wa Nkumadiɔndjɔ. Koko sho kokaka ngɛnangɛna naka sho tetemala la ndjaɛkɛ le Jehowa Nzambi la Yeso Kristo, wanɛ watokeketsha ndo watofuta.—Mat. 11:28-30; 1 Joa. 5:3.