Esambishelo: Diɛsɛ ndo Lokumu
1 Olimu wa lokumu l’ɔlɔlɔ ekɔ diɛsɛ ndo lokumu mbatosha Jehowa. (Romo 15:16; 1 Tim. 1:12) Onde ɔsɔku mbɔsaso olimu akɔ? Oyadi wenya weta kânga lɔsɔkɔ latɔsɔka asekaso halokoke kitshakitsha ohomba w’olimu akɔ lo asho aso. Ekɔ paka anto yema tshitshɛ tsho mbele la lokumu la mɛmba lokombo la Nzambi. Ngande wokokiso nyomoleka mandola diɛsɛ sɔ na?
2 Esambishelo ka losango la Diolelo hatohumuya lokolo l’ɔlɔ lo asho w’anto wa l’andja ɔnɛ. Efula mbɔsaka elimu aso la sawosawo kana mendjolaka. Akina mɔnyɔlaka elimu akɔ ndo tonaka. Otonelo ɔsɔ mbeyaka ndja oma le asekaso wakamba laso, asukanyi aso, kânga ndo oma le ase nkumbo kaso. Sho mɛnamaka oko dinginya kana tolele lo asho w’anto amɔtshi. (Joa. 15:19; 1 Kor. 1:18, 21; 2 Tim. 3:12) Akambo awɔ watɔlɛndja wekɔ l’oyango wa tutsha ohetoheto aso ndo tokonya djungudungu kana totshutshuya dia sho tshika diɛsɛ diaso. Ekɔ paka Satana mbele lo kiɔkɔ ya yimba shɔ ya diɔnyɔ, nɛ dia nde “ambete waku wahetawo uku tutshungu lu tukanyi tawo, ne dia usasi a lukumu l’ololo . . . tawahetelaki.” (2 Kor. 4:4) Ngande watotosalaka la ntondo ka dikambo sɔ na?
3 Ekɔ ohomba dia sho mbohɔka ɔnɛ esambishelo ka Diolelo ekɔ olimu woleki ohomba weso la diaaso dia kamba ɛlɔ kɛnɛ. Tekɔ lo mbewoya anto losango la panda lahawakoke mbeya l’ekimanyielo ka woho okina. (Romo 10:13-15) Kɛnɛ kele ohomba ele dia sho mbetawɔma le Nzambi koko aha le anto. Kanyi ya kɔlɔ yele l’anto wa l’andja ɔnɛ lo dikambo di’olimu aso w’esambishelo hatohekoya dia sho sambisha lokumu l’ɔlɔlɔ l’ohetoheto.—Etsha 4:29.
4 Yeso akɔsaka diɛsɛ diaki lande dia sala lolango la She la nɛmɔ efula. (Joa. 4:34) Nde akayasha tshɛ l’olimu ande ndo nde kotshika akambo wekola yimba kana atunyi mbɔlɛmbia. Esambishelo ka losango la Diolelo akongaka nshi tshɛ lo dihole dia ntondo lo lɔsɛnɔ lande. (Luka 4:43) Sho pombaka mbôkoya, ɔsɔ ekɔ didjango. (1 Pet. 2:21) Lam’ayotosala ɔsɔku, tayoyala “ekambi kame la [Nzambi, NW].” (1 Kor. 3:9) Onde tɛnyakɔ ɔnɛ sho mandolaka diɛsɛ sɔ? Onde tayangakɔ waaso wa mbewoya anto akina lokumu l’ɔlɔlɔ lo yoho yokotosalaka tena tshɛ kana lo tshakitudi? Nɛ dia tekɔ Ɛmɛnyi wa Jehowa, sho pombaka mangemɛka nshi tshɛ dia ‘sala wotelo wa lo sɛkɛ dikambo dia lokombo lande.’—Heb. 13:15.
5 Kanyi yele laso mɛnyaka lo yɛdikɔ ya woke woho wakambaso olimu. Onde tekɔ lo mandola Jehowa oma ka tshina di’otema lo kɛnɛ tshɛ katosalɛnde? Onde sho tekɔ la ngandji ka Jehowa l’otema aso nshi tshɛ, woho wa sho tshutshuyama dia kamba olimu ande la wolo aso tshɛ? Naka sho kanaka lomba l’ɛtshɔkɔ wambotoshila la kondja ndo lo wɛnɛ watolaka Jehowa lo nshi yayaye, kete tayoka Otungi aso ngandji ka mamba. Ngandji ka ngasɔ kayototshutshuya dia sho kamba ndo, lo yɛdikɔ y’akoka aso, ndjâla l’etete ndo l’ɔkɔkɔmalo lo sambisha Diolelo. Ohetoheto aso ayɛnya ngandji kokaso Jehowa la onyaso.—Mako 12:30, 31.
6 Sho mɛnyaka nɛmɔ diashaso ɛngɔ kɛmɔtshi oma lo woho wakambaso latɔ olimu ndo lo woho watɛkɛtaso di’ɛngɔ kakɔ. Onde mɛtɛ tekɔ lo mbɔsa diɛsɛ diele laso dia sambisha Diolelo la nɛmɔ? Onde sho tombolaka olimu aso? Onde sho ndjashikikɛka dia tetemala l’olimu ɔsɔ w’ohomba, kânga mbele wekamu? Naka sho nanga diɛsɛ nɛ dia diambo efula, kete tayonga mɛtɛ l’ohetoheto ndo otema aso tshɛ wayonga l’olimu akɔ.—2 Kor. 4:1, 7.