Toshihodiake Dui di’Endana la Diolelo
1 Lo wɛla w’omboki a woho, Yeso akalembetshiya ɔnɛ woho wakokama lo “kete y’ololo” mɛnyaka “one latukaka diui, latudishihudiaka.” (Mat. 13:23) L’ɔkɔngɔ wa sho mboka losango l’endana la Diolelo, onde ‘takaloshihodia?’ Naa shɛngiya yele la dikambo sɔ lo lɔsɛnɔ laso mɛtɛ? Onde taketsha wahɔ wa Diolelo la ntondo, tɛnya ɔsɔku ɔnɛ takashihodia losango?
2 Wekelo w’onto ndamɛ ekɔ ohomba dia mana losango la Diolelo fundo. Sho pombaka mbɔsaka etena ka kana lomba lo mbo ya ndɛ ya lo nyuma yatoshawɔ. Naka sho mbalaka Tshoto y’Etangelo esadi esadi, kete ekɔ oko tekɔ lo mɛna mma dia dimɛna ndo diasha demba wolo epiko. Onde sho mbɔsaka etena ka tɔnyatɔnya mma dia lo nyuma? Dia kondja wahɔ efula oma lɔkɔ, sho pombaka mboka ndjala ndo ndjâla la saki ka ndɛ mbo ya lo nyuma. Naka aha ɔsɔku, kete elimu ekina kokaka kitshakitsha ɛlɔlɔ watomba oma lo wekelo w’onto ndamɛ kana mbɔsa etena kele laso ohomba dia mbeka. Dia shikimala l’ekongelo ka dimɛna ka wekelo kema dikambo dia tshitshɛ. Mɛtɛ ekɔ ohomba dia mbidja yimba wolo lo mbɛdinyaka akambo wetshaso la ntondo, koko ɔngɔnyi wa lo nyuma wokokiso kondja hakoke sombama.—Tuk. 3:13-18; Kol. 1:27.
3 Lam’asɛdingolaso Afundelo, sho tayoyalaka nshi tshɛ la tokanyi t’ɛlɔlɔ ndo tatokeketsha lo dikambo dia Diolelo. Wanɛ “weya ehomba awɔ wa lo nyuma” ndjalɔngɔsɔlaka dia mbetshaka taahe tɔmɔtshi lushi la lushi lo dikambo dia walelo w’avɛsa wa lushi la lushi ndo diɔmbwɛlɔ diawɔ. (Mat. 5:3, NW) Avɛsa efula tɛkɛtaka dikambo dia Diolelo lo weoho wotshikitanyi. Ɛnyɛlɔ, divɛsa diakashama lo Tshaka Fudu 22, 1994 aki Mateu 13:4. Diɔmbwɛlɔ diakatɛkɛtaka dikambo dia elongamelo ka Diolelo ndo akoholaka wâle wokoki ndja oma lo diekesanelo dia kɔlɔ kâmɛ l’asukanyi kana l’ase nkumbo kaso. Lo wa Bɛtɛlɛ tshɛ, ɔsɛdingwelo ɔmɔtshi wa divɛsa dia lushi la lushi salemaka lo edja ka taahe 15 nshi tshɛ yakambema olimu. Yɛdikɔ shɔ mbikaka epole ɔsɛkɛ l’ohomba wa sɛdingolaka avɛsa kâmɛ ndo ɛlɔlɔ wokokiso kondja lo salaka ngasɔ. Onde l’ekongelo ka nkumbo kanyu nyakalɔngɔsɔla etena kɛmɔtshi ka sawolaka nshi tshɛ lo woho wa ngasɔ?
4 Lo yɛdikɔ yatafule lowando laso lo dikambo dia Diolelo, mbatataleke sɛngiyama dia mbewoya anyaso losango l’endana la Diolelo diakɔ. Tshoto y’Etangelo la Réveillez-vous! toshaka kɛnɛ kokokiso mbelɛ ɔnɛ esasɛ kana mandjoto wa lo lomba, walesha yimba yaso l’elembetshiyelo w’eyoyo. Oma l’ekimanyielo ka periodikɛ shɔ mbeyaso l’ɔlɔlɔ tshɛ ɔnɛ mɛtɛ andja wekɔ l’ohomba wa Diolelo diaki Nzambi. Yɔ tokimanyiyaka dia sho ndjâla anto wahɛtahɛta lo nyuma wele la “yimba ya Kristu.” (1 Kor. 2:15, 16) Ɔsɔku mbokokiso keketsha mbetawɔ kaso ndo fudia ohetoheto aso lo mbewoyaka anto elongamelo k’endana la Diolelo.—1 Pet. 3:15.
5 Ekɔ ohomba efula dia sho shihodia losango la Diolelo sho tshɛ. Oma l’ekimanyielo ka Diolelo mbayoshikikɛ Nzambi lowandji lande, mbayondoshidiya akambo wa kɔlɔ tshɛ ndo mbayondoshikikɛ andja w’oyoyo, mbuta ate paradiso. Yeso akatɔlɔmbɛ dia sho mbidja Diolelo lo dihole dia ntondo lo lɔsɛnɔ laso. Naka sho nangaka ndjâla la lɔsɛnɔ la tshina dia lowandji lande, kete sho pombaka ndjâla ambolami wafɔna l’ɛkɔkɔ. (Mat. 6:10, 33) Tatohandjake diaaso diambowotosha dia kondja ɛlɔlɔ watomba oma lo Diolelo!