Nkumu ya Diolelo ya Dianganya l’Andja w’Otondo l’Etena k’Ɔlɔlɔ
1 Lushi la Lomingu, Mɔmbi 23, dako dimɔtshi dia lânde diayoshama diele l’ɔtɛ a dui wa diambo w’ɔnɛ: “Ekomelo k’ɛtɛmwɛlɔ wa kashi kaya suke.” Lushi lɔsɔ, lo komelo ka losanganya, mbayokahanyema Nkumu ya Diolelo yele l’akatshi ahende yatshutshuya onto dia nde kana lomba. Losango lele lɔkɔ l’endana l’awui watomba l’andja ɔnɛ layodianganyema l’andja w’otondo lo mingu shato yayoyela, mbuta ate: tatɛ oma lo Mɔmbi 24 polo lo Yitshu 14.
2 Lo kɛtɛ k’otondo, anto wekɔ l’okandokando. Dihole tshɛ diasɛnawɔ, wekɔ l’ekakatanu. Nkumu ya Diolelo yayoyala la wahɔ w’oshika le wanɛ wayakiyanya mɛtɛ dia kɛnɛ keta, nɛ dia yɔ yekɔ lo kotola yambalo yawɔ lo Dui dia Nzambi, kiɔkɔ y’alako yahomaki dikambo di’onto. (Osam. 119:105) Tekɔ lo kongɛ l’asolo lokoloko dia nongola Nkumu ya Diolelo lo Mɔmbi 24. Latokomaka lɛsɔ, awui efula wasala wekɔ dia nɔngɔsɔla odianganyelo w’esadi esadi l’esambishelo ka mingu shato yayoyela.
3 Onto Tshɛ Ambokeketshama dia Kamba Olimu Ɔsɔ: Onto akɔna ayokoka sala odianganyelo ɔsɔ na? Aha la tamu, wanɛ tshɛ waya apandjudi wekɔ lo kongɛ dia ndjidianganya! Ko kayotota dia wanɛ weka ndo wɔtɔ tena la tena lo sanganya ya l’etshumanelo na? Amɔtshi wasanganakɔ laso mako tshanda y’ɔlɔlɔ ndo wekɔ lo tahame. Naka vɔ wekɔ lo ndjela alako w’oma lo Bible, onde vɔ wekɔ lo kotsha akambo walɔmbama dia ndjâla apandjudi wa Diolelo? Ɔmɛnyi walɔmbɔla wekelo kokaka tɛkɛta dikambo sɔ kâmɛ l’ombeki ndo, naka onto akɔ nangaka sambisha, dikumanyi dihende diayɔsɛdingola, kâmɛ lande, akambo wele lo lɛkɛ 99 la dibuku Organisés pour bien remplir notre ministère. Dikambo sɔ pombaka salema k’ɔmɔ, kele wanɛ tshɛ wakotsha akambo walɔmbama dia ndjâla apandjudi wahatalongola batismu mbisha lonya l’ohetoheto l’odianganyelo ɔsɔ wa lânde. Ambeki wa Bible wahatakotsha akambo walɔmbama dia ndjâla apandjudi wahatalongola batismu wambokeketshama dia vɔ mbisha angɛnyi awɔ l’ase nkumbo kawɔ Nkumu ya Diolelo yakɔ.—Enda lo Tshoto y’Etangelo ya Tshaka Fudu 15, 1988 (lo Falase), lɛkɛ 17, palagalafɛ 8.
4 Olimu ɔsɔ kema wolo; onto tshɛ kokaka mbokamba. Lo wonya wasalema wekelo wa Bible wa lomingu la lomingu lo nkumbo, ambutshi wayodja yimba dia mbeka woho wayowosala kele ose nkumbo tshɛ alɔngɔswame dimɛna dia mɛnyanya Nkumu ya Diolelo l’esambishelo ka lo luudu la luudu. Sala wɛnyanyelo wa wɔdu tolekaka dimɛna. L’ɔkɔngɔ wa mbɔtɔ lo sawo lo tshena pe, ɛnya ɔtɛkɛtshi ayɛ Nkumu ya Diolelo ndo keketshande dia nde ndjiala. Naka nde ambɛnya saki, lembetɛ kele koyotetemale l’ɔkɛtshanyelo mbala kekina. (1 Kor. 3:6, 7) Okanga wa pomɔ lokolo l’ɔlɔ ele, wɛnyanyelo waha okakatanu ndo wakalɔngɔswama dimɛna.
5 ‘Olimu ayonga efula’ lo Mɔmbi la lo Yitshu. Ɔnkɔnɛ, naka tokatshikatshi tɔsɔ hatotanemi lo lushi lakatama, kete sho kokaka ndjotidianganya kam’ayototanema. Lo tɔ toyaka, tayokambaka olimu la tɔnɛ tele lo lɔkɔtɔ la l’etshumanelo.—1 Kor. 15:58.