Ekadimwelo lo Wembola Anyu
◼ Ngande wahombaso nɔngɔsɔlaka dihomɔ diakambaso ladiɔ l’esambishelo na?
1 Aha l’ɔnɛ osambisha wa lokumu l’ɔlɔlɔ ekɔ la sawo dia dimɛna di’oma lo Bible l’ɔtɛ kete nde akalɔngɔsɔla dihomɔ diakambande ladiɔ dimɛna. Nde mbeyaka tokashimɔ lo soko dimɔtshi dia nde kema la losha la lo ngɔndɔ kengo. Periodikɛ, tobukubuku la tokatshikatshi tele lande taya wanɛ wanɛ kana tambatɛ. Oko wele mpata kande efutafuta, nde hotana ofundo kana dikatshi dimɔtshi dia nɔtɛ ya lo luudu la luudu. Ekɔ ohomba menda dihomɔ diaso ntondo ka sho ntshɔ otsha la tosambisha.
2 Naa diangɔ diahomba tanema lo tapa di’esambishelo diakalɔngɔsɔma dimɛna na? Bible ekɔ ohomba efula. Toyale l’akatshi wa nɔtɛ ya lo luudu la luudu. Toyashikikɛ dia tekɔ l’okanda washaso anto lo ngɔndɔ keso. Periodikɛ yeke ka tomba la tokatshikatshi ndo tobukubuku tekɔ ohomba. Tɛmbɛ dibuku Comment raisonner. Olimu Aso wa Diolelo wa ngɔndɔ keso ayotokimanyiya dia sho nyomenda wɛnyanyelo wolakanyemi la ntondo ka sho ntshɔ lo soko dimɔtshi. Lo mbilo katanaso tena dimɔtshi anto watɛkɛta ɔtɛkɛta ɔmɔtshi w’angɛndangɛnda, ayonga dimɛna monga la biukubuku Une bonne nouvelle pour toutes les nations. Naka sho mɛmba okanda aso ɔmɔtshi l’atei a wɛnɛ wakalɔngɔsɔma lo dikambo dia ɛlɔngɔlɔngɔ, kete tayokoka sawola la wanɛ waya tomangase.
3 Ɛngɔ tshɛ kakambaso latɔ pombaka nɔngama dimɛna lo tapa diaso. Aha ɔnɛ paka tapa diaso ndjâla oyoyo koko diɔ pombaka monga dimɛna ndo pudipudi. Tapa diaso di’esambishelo diekɔ l’ɔnɔngɔ wa dihomɔ diakambaso ladiɔ dia mbewoya lokumu l’ɔlɔlɔ. Todilɔngɛ dimɛna.