Tokondja Ɛlɔlɔ Watomba Oma Lo Kalasa K’olimu Wa Teokrasi Ka 1996—etenyi Ka Hende
1 Oheta yema, l’ɔkɔngɔ wa vɔ sapola Kalasa k’Olimu wa Teokrasi lo 1943, filialɛ kɛmɔtshi ka la Société akakɔndɔla ɔnɛ: “Yɛdikɔ nyɛ ya dimɛna efula yakakimanyiya anangɛso efula waki konongamɛka ɔnɛ wokɔtɛkɛta lushi lɔmɔtshi la ntondo k’anto, dia vɔ ndjâla ambahemi a loseke w’eshika ndo apandjudi wakoka l’ɔkɔngɔ wa tshanda mɔtshi.” Kalasa kekɔ lo tetemala la mbisha olowanyelo w’oshika wayangaso sho tshɛ.
2 Walelo wa Bible: Aha wanɛ wasala asawo ato mbakondja ɛlɔlɔ watomba oma lo kalasa. Lo mɛtɛ, sho tshɛ kondjaka ɔkɛndɛ ɔmɔtshi wa sala: walelo wa Bible wa lomingu la lomingu. Ekongelo ka kalasa mɛnyaka totshapita takɔna tahombaso mbala lomingu la lomingu. Alako efula watɛtɛ di’ohomba wa mbalaka Bible lushi la lushi tanemaka l’Afundelo. (Jas. 1:8; Osam. 1:2; Etsha 17:11) Walelo ɔsɔ ekɔ ohomba efula dia sho ndjâla la yonge ya wolo lo nyuma; vɔ ndeshaka yimba ndo otema. Naka tayalaka Bible taahe totanu kana ndekana lo lushi, kete tayokoka ndjela ekongelo ka lomingu la lomingu. L’ekomelo k’ɔnɔnyi, kete tambadja olekanyi totshapita 150 ta Dui dia Nzambi. Naka sho momba Bible kɛmɔtshi lo dihole diakoma anya wonya tshɛ, kete mɛtɛ tayokoka kialaka, tshenyi tshenyi lushi la lushi.
3 Dako dia Wetshelo: Dia tshutshuya anangɛso l’akadiyɛso dia kambɛ Jehowa la kɔlamelo ndo l’ohetoheto, ombahemi a loseke lasha dako dia wetshelo pombaka ndjâla ombetsha a lokombo, mbokiya anto awui wetshande ndo sokoya wanɛ wôlonga dia vɔ monga la lowando le Nzambi, Dui diande ndo ɔlɔngɔswamelo ande. Dikumanyi la ekambi w’olimu kokaka sala dikambo sɔ naka vɔ ndjalɔngɔsɔla dimɛna, lo mbikaka dako diawɔ etshina l’ɔtɛ a dikambo, lo tɛkɛtaka l’eshikikelo tshɛ ndo lo pɛtshahɛtshaka awui walakanyawɔ. (Heb. 4:12) Ekɔ ohomba dia ombahemi a loseke nɛnya yɛdikɔ ya wonya yowoshawɔ. Dibuku “Toute Écriture” ndola l’avɛsa amɔtshi w’oma lo Bible ndo diekɔ l’ɔnɔngɔ w’avɛsa w’Afundelo wakotola yambalo, wakokaso kondja ɛlɔlɔ lo nyuma. Dibuku Prédicateurs diekɔ lo kɔndɔla ɔkɔndɔ w’ɔlɔngɔswamelo wɛnama waki Jehowa ndo akambo wakakomɛ anto wa mɛtɛ lo nsɛnɔ yawɔ, wanɛ waki la mbetawɔ, l’ohetoheto, la yimba ya ndjakimɔ ndo la ngandji. Tekɔ l’akambo efula wa mbeka w’endana la lɔsɛnɔ laso la Teokrasi la ntondo ndo la woho watshɔkɔla Jehowa anto ande nshi nyɛ.
4 Atshina w’Akambo w’oma lo Bible: Anangɛso walongola ɔkɛndɛ ɔnɛ pombaka sɔna avɛsa w’eshika, wokokiwɔ kimanyiya etshumanelo dia kamba la wɔ. Lâsɔ ekɔ ohomba dia nde mbala totshapita takashama, dia nde kana latɔ yimba ndo sala eyangelo lo avɛsa wɔsɔnami dia kondja elembetshiyelo wayotiɔmbɔla hwe. L’ekomelo k’Index des publications de la Société Watch Tower, “Index biblique” wekɔ wokoki ndjâla ohomba efula lam’ayangaso elembetshiyelo lo divɛsa dimɔtshi. Anangɛso washa dako nɛ pombaka monga la lokanyi l’ɔlɔlɔ ndo aha tɛkɛta akambo wahɔtɔnɛ la kɛnɛ kele l’avɛsa akɔ. Aha nɔngɔsɔla awui wamboleka efula wahakoke tɛkɛtama lo taahe tosamalo.
5 Onto l’onto l’atei aso kokaka kondja ɛlɔlɔ watomba oma lo Kalasa k’Olimu wa Teokrasi. Tɔ kokaka tokimanyiya dia sho ndowanya akoka aso w’ambahemi a loseke ndo w’embetsha. Kondja ɛlɔlɔ tshɛ watomba oma lo yɛdikɔ shɔ ayotokimanyiya mɛtɛ dia sho ‘mɛnya ohamelo aso lo asho w’anto tshɛ.’—1 Tim. 4:15.