‘Toke Nkumbo Kaso’
1 Tamu kema dia, l’andja w’otondo, lɔsɛnɔ la nkumbo lekɔ lo pandjɔ. Andja walɔmbwama oma le Satana ngɛnangɛnaka lo kɔlɔ la l’awui wa mindo. (1 Joa. 5:19) Dui sɔ mɛnyaka dia nshi nyɛ kamboleka ohomba tshɛ dia sho ‘mbika nkumbo yaso’ ndo dia mbetsha anto akina woho wokokiwɔ mbika yawɔ.—Tuk. 24:3, 27.
2 Awui wa lo Bible Kokɛ̂ka: Okitanyielo w’awui wa lo Bible ekɔ sapi k’ɔngɛnɔngɛnɔ w’oshika wa lo nkumbo. Awui wa mɛtɛ wa lo Bible wele la nkudu wekɔ ɔlɔlɔ le ose nkumbo tshɛ lo weho tshɛ w’akambo wa lo lɔsɛnɔ. Lo mbakitanyiyaka, nkumbo mongaka l’ɔngɛnɔngɛnɔ ndo kondjaka wɔladi a Nzambi.—Enda lo Isaya 32:17, 18.
3 Awui watokimanyiya dia sho mbika nkumbo kaso mɛnyama hwe lo dibuku di’oyoyo dielɛwɔ Sheke y’Ɔngɛnɔngɛnɔ wa lo Nkumbo. Tshapita tshɛ komɛka la kiombokombo yasɔtɔla awui wahomba ase nkumbo mbohɔka. Tokombokombo efula l’atei atɔ mumɛka la dimbola di’ɔnɛ “Ngande wakoka awui anɛ wa lo Bible kimanyiya. . . ?” Dui sɔ kotolaka yambalo yaso lo lokanyi la Nzambi, lo toshaka kanyi yande lo dikambo diatawɔ lo tshapita yakɔ.—Is. 48:17.
4 Tekesane la dibuku diakɔ. Teke woho wa tana awui wokokiso monga lawɔ l’ohomba lam’atomba ekakatanu. Dibuku diakɔ mbutaka akambo wele oko: kɛnɛ kahomba onto mendɛ le ɔnɛ layonga otshukanyi ande (tshapita 2), etshina ka diwala dialomba ndo di’ɔngɛnɔngɛnɔ (tshapita 3), kɛnɛ kakoka ambutshi sala dia anawɔ weke ɛlɔngɔlɔngɔ koma epalanga wakotsha ɛkɛndɛ awɔ ndo woka Nzambi wɔma (tshapita 6), woho wa kokɛ nkumbo oma lo tɔsɛngiya tokoki kihandjola (tshapita 8), awui wakimanyiya nkumbo yele l’ombutshi ɔtɔi dia yɔ sɛna dimɛna (tshapita 9), ekimanyielo ka lo nyuma le nkumbo yele fumbe ya wanu la akambo wa ngala (tshapita 12), woho wa sala naka diwala diayanga pandjɔ (tshapita 13), kɛnɛ kakokaso sala dia nɛmiya ambutshi waya esombe (tshapita 15) ndo woho wokoki onto namɛ nkumbo kande nshi yayaye ya pondjo (tshapita 16).
5 Tokambe la Dibuku di’Oyoyo Sɔ l’Ɔlɔlɔ Tshɛ: Lande na kahanyeke dibuku Ɔngɛnɔngɛnɔ wa lo Nkumbo l’atei a nkumbo kanyu naka nyatamɛ na? Woho akɔ wamɛ, naka nkumbo kaso kekɔ lo pomana l’ekakatanu w’eyoyo kana kekɔ la dikambo dimɔtshi dia wolo, tonyomenda totshapita tele lo dibuku tatɛkɛta dikambo diakɔ ndo tokanyiya lo dɔmbɛlɔ yoho ya kamba l’alako akɔ. Lo wedi okina, tonge akanga a lokaho lo mombaka etena dia sambisha ndo sala tshɛ dia mbisha anto efula dibuku Sheke y’Ɔngɛnɔngɛnɔ wa lo Nkumbo lo ngɔndɔ ka Mɔmbi.
6 Nkumbo yele la yimba ya mamema Nzambi yayokeketshama lo nyuma ndo yayokimanɛ, yayonga l’akoka wa mbewɔ ɛsɔmbwɛlɔ waki Satana. (1 Tim. 4:7, 8; 1 Pet. 5:8, 9) Ande lowando lele laso le Otungi wa nkumbo latosha wetshelo ande lee!