‘Tônge La Lowando’
1 Lam’akiso akɛnda, efula l’atei aso taketshama dia mbutaka ɔnɛ: “lam’alangɛ” ndo “losaka” naka onto ambotosalɛ ɔlɔlɔ. Paulo ekɔ lo tolaka dia ‘sho mongaka la lowando’ nshi tshɛ, ndo sho pombaka monga la lowando djekoleko le Jehowa. (Kol. 3:15, 16) Ko ngande wakokaso mɛnya lowando laso le Otungi aso wa Woke na? Naa ekɔkɔ ɛmɔtshi wa lânde wele laso wa mbowandola?
2 Ɔpɔstɔlɔ Paulo akafunde ate: “Tôke Nzambi losaka, nɛ dia nde toshaka otshumba oma le Nkumɛso Yeso Kristo!” (1 Kɔr. 15:57, NW ) Ɔnɔnyi tshɛ, l’etena ka Eohwelo ka Nyɔi ka Yeso, sho mbohɔka ngandji kaha l’olelo kakatoke Nzambi nde la Kristo lo tosha tshungo diatokimanyiya dia sho monga l’elongamelo ka nshi yayaye ya pondjo. (Joa. 3:16) Efula l’atei aso takashisha onto ɔmɔtshi lalangaso, diɔ diakɔ dieso la lowando l’efula lo eolwelo kakalake Yeso. Otema aso ndolaka la lowando lam’akanyiyaso dia elongamelo ka kondja panda l’ekomelo ka dikongɛ nɛ, aha la mvɔ. (Joa. 11:25, 26) Hateye ndo ka mbuta dia mɛnya lowando laso lo ɛtshɔkɔ wa mamba wayotolongola oma l’anya wa Jehowa, lo Paradiso kayoya. (Eny. 21:4) Ɛkɔkɔ akɔna woleki amɛna wokoki ndjâla laso dia ‘monga la lowando’ le Nzambi na?
3 Woho wa Mɛnya Lowando Laso le Nzambi: Sunganaka mɛtɛ kaloya Jehowa losaka l’ɔlɔlɔ ande lo dɔmbɛlɔ. (Osam. 136:1-3) Sho tshutshuyamaka nto dia mɛnya lowando laso le nde lo weho ekina nto. L’ɔngɛnɔngɛnɔ ‘mbandolaso Jehowa la diangɔ diaso dia nɛmɔ,’ woho wa sukɛ etshumanelo kaso ndo olimu wa l’andja w’otondo la diangɔ dia l’emunyi. (Tuk. 3:9) Sho sukɛka dikumanyi lo tshɛ ndo kambaka kâmɛ la wɔ, ɔsɔku mbɛnyaso Jehowa lowando laso lo ekimanyielo katoshande lo tshimbo yawɔ. (1 Tes. 5:12, 13) Lushi la lushi, sho ndjatshutshuyaka dia monga la lɔkɛwɔ l’ɔlɔlɔ latombola lokombo la Nzambi. (1 Pet. 2:12) Toho tɔsɔ tshɛ tɛnyaso lowando laso ngɛnyangɛnyaka Jehowa.—1 Tes. 5:18.
4 Yoho Yoleki Dimɛna Yɛnyaso Lowando: Ndjasha l’anima aso tshɛ l’esambishelo ka Diolelo, tombola lokombo la Jehowa, mbosha losaka lo dɔmbɛlɔ, mamɛ awui wa mɛtɛ la kɔlamelo tshɛ, akambo asɔ tshɛ wekɔ l’atei a toho toleki dimɛna ta mɛnya losaka l’oma ka tshina di’otema lokokiso mbisha Otungi aso lo kɛnɛ tshɛ kakandatosalɛ. Jehowa nangaka dia “antu [wa weho] tshɛ nshimbamela” ndo nde ngɛnangɛnaka tɛna tawokambɛ olimu w’ekila wakimanyiya dia lolango lande kotshama. (1 Tim. 2:3, 4) Diɔ diakɔ diele apandjudi efula wele la diaaso dia sala ɔsɔku mbetawɔka lo leeta lawaetawɔ l’Olimu Aso wa Diolelo wa Asase a Ndjoko lo monga ambatshi mboka wa tshanda ngɔndɔ ɔtɔi kana efula lo Yitshu ndo lo Mam’ɛkɔngɔ la Tange. Yoho yoleki dimɛna ya ‘sho monga la lowando’ le Nzambi ele ndjasha efula l’olimu. Onde tayonga ambatshi mboka lo Yitshu ndo lo Mam’ɛkɔngɔ la Tange?
5 Takakondja elongamelo ka shikaa ka monga la lɔsɛnɔ la pondjo. Naka tayokiɛnaka ɔnɛ kaya suke la kotshama, kete tayongaka l’ɛkɔkɔ efula nto wa tetemala la kaloya Jehowa losaka nshi tshɛ l’ɔngɛnɔngɛnɔ.—Osam. 79:13.