Tokimanyiya Nkumbo Dia Yɔ Ndjalamɛ Nshi Yayaye Ya Pondjo
1 Ombeyi ɔmɔtshi w’awui w’okundji wa lo wodja akatɛ wanɛ wakalongola apɔlɔmɛ lo kalasa k’adidi kɛmɔtshi ka l’Amérique ate: “Okombwelo w’okundji mbishaka lɔsɛnɔ. Onto kokaka monga la saki k’okundji koko hɛnyi dia ekɔ kɔlɔ.” Kɛsɔ mɛtɛ kɛnaso l’andja ɔnɛ, wɛnyawɔ lokaki oko mboka kɛmɔtshi k’onto ndjalɔngɔsɔlɛ nshi yande yayaye. Koko, Yeso akɛnya ɔnɛ Okristo pombaka ‘ndjasɛka ndamɛ, nɛ dia naa wahɔ wayonga l’onto naka nde kondja andja w’otondo, koko shisha lumu lande?’ (Mat. 16:24-26) Di’onto ndjalamɛ nshi yayaye ya pondjo nde pombaka mbetshaka lɔsɛnɔ lande l’otondo lo kotshaka lolango la Nzambi, kɛsɔ kahomba monga oyango wa nkumbo ɛlɔ kɛnɛ. (Osam. 143:10; 1 Tim. 4:8) Kanyi shɔ mbele lo tshapita ya komelo ya dibuku Sheke y’Ɔngɛnɔngɛnɔ wa lo Nkumbo. Dibuku di’oyoyo sɔ kimanyiyaka anto dia vɔ mbeya kɛnɛ kele ohomba mɛtɛ lo lɔsɛnɔ ndo nganɛ wokokiwɔ sala dia nkumbo yawɔ mbikama. Lam’atatatetemala la sambisha lokumu l’ɔlɔlɔ l’ahole tshɛ, kakɔna kakokaso mbuta dia keketsha wanɛ wahomana la so dia vɔ mbadia dibuku Ɔngɛnɔngɛnɔ wa lo Nkumbo na? Tokanyi tɔmɔtshi tɔnɛ:
2 L’asoko kana l’ɔsɛsɛ, sho kokaka pemba dia tatɛ sawo l’ekimanyielo ka kiatshikatshi yata ɔnɛ “Lɔsɛnɔ l’Ɔngɛnɔngɛnɔ la Nkumbo.” Sho kokaka mumbola nganɛ:
◼ “Lɔsɛnɔ la nshi nyɛ lekɔ kiɔkɔ y’ekiyanu efula, koko onde wɛ fɔnyaka dia kânga mbediɔ ɔsɔku onto kokaka monga la lɔsɛnɔ la nkumbo l’ɔngɛnɔngɛnɔ mɛtɛ? [Tôtshike akadimole.] Kiatshikatshi nyɛ toshikikɛka ɔnɛ eelo. Onde wɛ nangaka ndjiala?” Naka nde ambolongola, kete sho kokaka tetemala ɔnkɔnɛ: “Lam’ele dikambo sɔ kotolaka yambalo yayɛ, ondo wɛ ayɔngɛnangɛna ndo dibuku nɛ diasha alako w’eshika wendana la yoho ya monga l’ɔngɛnɔngɛnɔ lo nkumbo.” Towɛnya ɛtɛ w’awui wofundami wa dibuku Ɔngɛnɔngɛnɔ wa lo Nkumbo. Tɔsɔtɔlɛ totshapita tɔmɔtshi tele l’ɛtɛ w’awui wakotola yambalo yande. Tofole dibuku lo lɛkɛ 10 ndo tadia etelo ka ndjihelo ka l’odingɔ 17 kâmɛ ndo odingɔ 18 w’otondo. Towosha dibuku ndo towote oshinga adiɔ. Tolembetshiya onto akɔ ɔnɛ sho kokaka sawola nto efula lo dikambo sɔ ndo towombole etena kakɔna kayotokoka nyomɛnana la nde.
3 Sho mbeyaka tetemala la sawo diakatasawola lo dikambo dia lɔsɛnɔ la nkumbo l’ɔngɛnɔngɛnɔ lo mbuta ɔnkɔnɛ:
◼ “Dimi nte kɛnya kanyi mɔtshi yele lo dibuku diakamakotshikɛ; dimi fɔnyaka dia kanyi yakɔ yayokɔngɛnyangɛnya. Tshapita ya komelo mbutaka dikambo dia sheke y’ɔngɛnɔngɛnɔ wa lo nkumbo. [Tadia odingɔ 2 wa lo lɛkɛ 183.] Lembetɛ dia sapi y’ɔngɛnɔngɛnɔ ele kamba kâmɛ dia lolango la Nzambi kotshama. Sho sɛngɔlaka anto dia vɔ mbeka Bible lo nkumbo dia vɔ mbeya lolango la Nzambi ndo likotsha lo nkumbo. Sho mbetshanaka Bible ofele l’edja ka ngɔndɔ ngana tsho. Naka wɛ alanga, layokɛnya woho wasalaso.” Toye nto la biukubuku Kakɔna Katɔlɔmba Nzambi? kana dibuku Ewo, lo sɔna nɛ dioleki sungana.
4 Naka tekɔ lo kɛtshanya l’asekaso wa la kalasa kana l’ɛlɔngɔlɔngɔ l’etenyi kaso ka ngelo, kete sho kokaka mboka dimbola nɛ:
◼ “Naa ohomba wa ambutshi l’anawɔ tetemala la sawolaka l’asawɔ? [Tôtshike akadimole.] Enda kɛnɛ kata dibuku nɛ lo dikambo dia ‘sawo dia hwe ndo dia mɛtɛ.’ [Tâdia odingɔ 4 w’otondo la etelo ka ntondo ka l’odingɔ 5 wa lo lɛkɛ 65 la dibuku Ɔngɛnɔngɛnɔ wa lo Nkumbo.] Edingɔ wayela ɛnɛ mbishaka alako w’eshika lo kɛnɛ kendana la woho wa ndowanya sawo lo nkumbo. Dibuku nɛ diekɔ l’ɔtɛ a dui w’ɔnɛ Sheke y’Ɔngɛnɔngɛnɔ wa lo Nkumbo. Naka wɛ nangaka dikondja ndo kombolaka diala mɛtɛ, kete dimi kokaka kotshikɛdiɔ naka wɛ kimɔ yema ya woshasha ya. . . ” Tolembetshiya ɔtɛkɛtshi aso ɔnɛ sho nangaka nyomɛnana la nde nto dia mbeya lokanyi lande lo kɛnɛ kayondadia.
5 Tayokoka mbika lâdiko di’etshina k’ɔkɛtshanyelo aso wa ntondo sho l’ɔlɔngɔlɔngɔ ɔmɔtshi lo dikambo dia sawo dia l’asa ambutshi l’ana lo mbuta ɔnɛ:
◼ “Lakangɛnangɛna efula nɛ dia wɛ mɛnaka ɔnɛ sawo l’atei a nkumbo ekɔ ohomba efula. Oko le yɛ, dikambo diakɔna dioleki ohomba diahomba ambutshi sawolaka l’anawɔ?” Tôtshike akadimule. Tofole dibuku Ɔngɛnɔngɛnɔ wa lo Nkumbo lo lɛkɛ 68 ko sho mbadia okadimwelo washa etenyi ka l’ahende ka ntondo k’odingɔ 11. “Yoho mɔtshi yoleki ɔlɔlɔ ya kondja ewo ka Nzambi ele mbekaka Bible lomingu tshɛ.” Towɛnya biukubuku Kakɔna Katɔlɔmba Nzambi? Tôlembetshiya ɔnɛ wekelo 16 wele lɔkɔ mɔmbɔlaka atshina w’akambo wa lo Bible. Tâdia mbɔtwɛlɔ kele lo lɛkɛ 2 ndo tɔsɛdingole la nde wekelo wa ntondo.
6 Naka, lo soko la soko, kana ondo la kalasa kana lo lobingu, tambohomana l’ombutshi ɔmɔtshi wa pami kana wa omoto, kete sho kokaka memula saki kande la mbuta ɔnɛ:
◼ “Dimi mbetawɔka dia wɛ ayosanga la mi lolemi lo mbuta ɔnɛ wôdielo w’ana ekɔ dikambo dia wolo efula nshi nyɛ. Oko le yɛ, kakɔna kokoki kokɛ nkumbo kayɛ oma lo tɔsɛngiya ta kɔlɔ na? [Tôtshike akadimule.] Enda alako w’eshika wakangɛnyangɛnya.” Tokotole yambalo yande l’ɛnyɛlɔ koshami lo lɛkɛ 90 la dibuku Ɔngɛnɔngɛnɔ wa lo Nkumbo, l’odingɔ 1, ko sho mbadia odingɔ 2. Towɛnya woho wele alako w’eshika washa dibuku sɔ sunganaka dimɛna dia kokɛ nkumbo oma lo tɔsɛngiya ta kɔlɔ. Tokane l’onto akɔ dia sho mbotshikɛ dimɔtshi ndo dia ndjowenda nto dia ndjokadimola wembola wayondoyokoka mimbola.
7 Lam’akalolaso dia ndjenda ombutshi wa pami kana wa omoto wakalongola dibuku “Ɔngɛnɔngɛnɔ wa lo Nkumbo,” sho kokaka tetemala la sawo lo yoho nyɛ:
◼ “Mbala ketshi kakatɛnana, lakɛnyi dia mɛtɛ wɛ ndjakiyanyaka lo dikambo di’anayɛ ndo wɛ nangaka sala la wolo ayɛ tshɛ dia mbakokɛ oma lo tɔsɛngiya ta kɔlɔ. Ondo wɛ atâdia dibuku diakamakotshikɛ, koko lokanyi lɔmɔtshi l’ohomba efula lekɔ lɔkɔ lalangami kɛ̂nya. [Tâdia odingɔ 19 wa lo lɛkɛ 59.] Dia monga la diokanelo la Nzambi, sho pombaka mbeka dia mbêya l’ekimanyielo ka Bible, Dui diande diakafundama. Wɛ nangaka dimi kɛnya woho wekaso Bible lo nkumbo?”
8 L’andja ɔnɛ, andaki hawotokoka mɛnya nkumbo mboka k’ɔngɛnɔngɛnɔ; vɔ mbeyaka ndjakɔmɔla alemba. Todianganya dibuku Ɔngɛnɔngɛnɔ wa lo Nkumbo l’ahole tshɛ, woho wa Dui dia Nzambi kimanyiya anto wa weho tshɛ dia vɔ ndjalamɛ nshi yayaye ya pondjo.—1 Tim. 6:19.