‘Ekimanyielo Lo Wonya Wakoka’
1 Sho tokeketshamaka mɛtɛ naka tambokondja ekimanyielo lo wonya weso latɔ ohomba! (Heb. 4:16) Lo losanganya la distrikɛ laki l’ɔtɛ a dui ɔnɛ: “Akɛndji wa Wɔladi a Nzambi,” takangɛnangɛna efula lam’akatalongola ekanda ehende wele ekimanyielo le so lo wonya wakoka.
2 Dibuku di’oyoyo dielɛwɔ Sheke y’Ɔngɛnɔngɛnɔ wa lo Nkumbo diakaye lo wonya wasungana mɛtɛ. Diɔ mbikaka epole ɔsɛkɛ lo akambo anɛi wele ohomba dia nkumbo monga la lɔsɛnɔ l’ɔngɛnɔngɛnɔ: (1) ndjâkimɛ, (2) nɛmiya lowandji, (3) sawo di’ɔlɔlɔ ndo (4) ngandji. Alako wele lo dibuku Ɔngɛnɔngɛnɔ wa lo Nkumbo wayokimanyiya nkumbo tshɛ yayela alako akɔ dia yɔ kondja wɔladi a Nzambi. Toyatshungolɛke etena dia mbadiaka dibuku sɔ dimɛna dimɛna ndo diekaka l’atei a nkumbo. Tekesane l’awui wa lɔkɔ dia sho nɔngɔswama dia kamba ladiɔ dimɛna lam’ayototadikahɛka anto mbala ka ntondo, lo ngɔndɔ ka Mɔmbi.
3 Biukubuku y’oyoyo yelɛwɔ Kakɔna Katɔlɔmba Nzambi yakaye lo wonya wasungana mɛtɛ dia tokimanyiya di’olimu aso wa mbetɛ anto ambeki kɛndakɛnda esadi esadi. Kânga mbakayɔalɔngɔswama ntondotondo l’oyango wa kimanyiya anto waheye mbadia dimɛna, epalanga efula weya mbadia ndo ana w’akɛnda wayokimanyiyama oma l’elembetshiyelo wa wɔdu w’atshina a wetshelo wa Bible wele lɔkɔ. Yɔ mbeyaka tokimanyiya dia sho tatɛ mbeka l’onto Bible ko ndjotetemala la wekelo akɔ lo dibuku Ewo. Biukubuku shɔ mɛtɛ yayokimanyiya anto efula dia vɔ mɛna ɛtshɔkɔ efula wakokawɔ kondja naka vɔ sala kɛnɛ katɔlɔmba Nzambi.
4 Davidi akeye kɔndɔla woho wayaokaso lam’akandate ate: ‘Ndoko ema kakandahombaka, anima ande wakakeketshama ndo dikɔhɔ diande diakalole tɔ.’ (Osam. 23:1, 3, 5) Tayonga l’ɔngɛnɔngɛnɔ dia mbɔsa ekanda ɛsɔ w’amɛna ko takahɛka anto efula wele la mposa k’oma k’ɛse otema ka mbeya Jehowa, Nzambi ka mɛtɛ, ndo mbokambɛ.