“Ɔtɛkɛta w’Amvutshi wa Nzambi”—Losanganya la Distrikɛ l’Ɛmɛnyi wa Jehowa 1999
1 Lam’aki Ase Isariyɛlɛ l’oswe wa shɛnga, Jehowa akadjangɛ Mɔsɛ dia ntsha amama ahende wa fɛsa. Naka wamboda dimama ɔtɔi to, ko ewandji wa nkumbo mɔtana l’ɛɔtwɛlɔ ka luudu l’esanganelo la dipɛma. Naka wamboda amama akɔ ahende, kete olui tshɛ w’Ase Isariyɛlɛ mɔtana kâmɛ. (Wal. 10:1-4) Ɛlɔ kɛnɛ sho ngɛnangɛnaka etena kokaso waewoyelo wele oko londjo l’amama, ɔnɛ tosangani lo losanganya laso la distrikɛ lasalaso ɔnɔnyi tshɛ, shi mɛtɛ? Lo nsanganya yaso ya weke sho nongolaka wetshelo ndo ɛlɔmbwɛlɔ oma le Jehowa lo tshimbo ya Dui diande la y’atomami ande wakandasɔnɛ. Dui sɔ tokimanyiyaka dia sho mamema olimu wa Nzambi. Shi sho ngɛnangɛnaka etena kɛnaso nunu—kana nunu akumi—dia wanyaso ekambi wa kɔlamelo wotshumanyi kâmɛ lo ngandji ndo lo wɔladi? Ɔsɔku mbediɔ!—Osam. 122:1, 7, 8.
2 Oma lo Ngɔndɔ k’Enanɛi polo ka Divwa 1998, wakalɔngɔsɔla dia nsanganya 58 ya distrikɛ yaki l’ɔtɛ a dui w’ɔnɛ: “Mboka ka Nzambi ka Lɔsɛnɔ,” salema l’esomba 56 lo mbilo kaso. Lo République démocratique du Congo, nsanganya esambele kosalema lo datɛ diakawalɔngɔsɔla l’ɔtɛ w’akambo weta lo wodja aso. Oma l’ekimanyielo ka Jehowa, tekɔ lo nongamɛ dia ndjisala kem’edja. Tekɔ lo nyoka losaka oma ka tshina di’otema lo weolo wodjishanyu la dihonga tshɛ dia nsangana kânga mbele esukusuku nshi nyɛ. Alapɔlɔ walongolaso mɛnyaka ɔnɛ anto efula, kâmɛ ndo nkumbo y’etondo l’akanga a dikɔmɔ, wakakɛndakɛnda etale efula l’ekolo dia ndjɔtɔ lo losanganya lɔsɔ. Amɔtshi wakakɛndakɛnda nshi efula, kânga mingu. Ɔnangɛso ɔmɔtshi la tshungu akasale kilɔmɛtɛlɛ 260 l’ekolo dia tɔtɔ lo losanganya la distrikɛ la Mbuji-Mayi. Ngasɔ mbokondotshaka ɔnɔnyi tshɛ. Onde aki mɛtɛ ohomba dia nde ndjaɛnya pâ ngasɔ? Eelo! Wanɛ tshɛ waki lɔkɔ wakangɛnangɛna dia ‘keketshana l’asawɔ djekoleko lam’ɛnawɔ ɔnɛ lushi lakɔ laya suke.’ (Heb. 10:24, 25) Ɔnangɛso ɔmɔtshi akate kɛnɛ kakandɛnyi ate: “Onto tshɛ akakeketshama lo nsanganya shɔ ya lo nyuma.” Lo losanganya laso la distrikɛ la lo 1999, tayokondja waaso akina wa mɛnana la nkumbo kaso k’anto l’ɔnango ndo mbisha Jehowa losaka dia kâmɛ katoshande.
3 Nyotayalɔngɔsɔdi k’ɔlɔmɔ woho wa nyu monga lo nshi shato ya dambo dia dimɛna efula sɔ dia lo nyuma, oma ko osambu wa tatelo polo lo dɔmbɛlɔ dia ndjihelo. Esangɔ efula, losanganya lokelewɔ mongaka lɔnɛ loleki suke la lakayɛ. La Société tshaka tshɛ dia nyonyɛ wotsho ɔmɔtshi lo dikambo sɔ. Wambokotsha ahole akina anɛi wayosalema losanganya dia kimanyiya onto tshɛ l’atei aso dia ndeshama lo nyuma kâmɛ l’ase nkumbo kande tshɛ. (Euh. 31:12) Ahole akɔ vɔanɛ: Nyabihanga lo Burundi, Luiza lo Kasai Occidental, Basankusu la Bosondjo l’Équateur. Ɔnɛ kele etena ka nyu kanyiya kɛnɛ kayonyokoka ntsha dia kondja akuta wa lɔkɛndɔ. Dia mɛnya lowando lo weolo wakadje la Société, tambolongamɛ di’onto l’onto mbɔtɔ lo losanganya lakawelɛ otshimbedi awɔ. Koko, naka wɛ pombaka mbɔtɔ lo losanganya lokina l’ɔkɔkɔ ɔmɔtshi w’oshika, kete ndoko layokoshimba.
4 Lam’ayonyɔsa tɛdikɔ dia mbɔtɔ lo losanganya lɔsɔ la distrikɛ, nyɛnya ngandji kanyu lo kanɛ wanɛ wele l’ohomba w’ekimanyielo, djekoleko wanɛ weke ka ndjasha lo sɔlɔ, dia ndo vɔ lawɔ mbɔtɔ lo tenyi diakɔ tshɛ. Ayonga ohomba efula tasɛdingudi awui wele lo dikatshi di’okotsha nɛ kâmɛ l’anto weka la so Bible ndo wasangoya mbɔtɔ lo losanganya la woke lɔsɔ. (Ngal. 6:6, 10) Lushi la Tanu la la Samalo, losanganya layomɛ la mishiki lo 9 h 30, ko layoshila la dikɔlɔ otsha lo 17 h 00. Etenyi ka pindju ka Lushi la Lomingu, ayomɛ lo 9 h 30, ko losanganya ndjoshila otsha lo 16 h 00. Waewoyelo wayela anɛ wayonyokimanyiya lam’ayalɔngɔsɔlanyu.
5 Ohangelo w’anto tosalemaka tena efula lo mvudu yakana. Sho pombaka monga la lowando le anangɛso wetawɔ todjasha lawakawɔ. Ndo nto, hosungana dia anto walongolawɔ ngasɔ nanya ɔlɔlɔ ɔsɔ ndo tohika ɔnɛ wâhangia nshi efula la ntondo kana l’ɔkɔngɔ wa losanganya. Pango mbishamaka paka LO NSHI ya losanganya. Wanɛ washawɔ pango ya ngasɔ pombaka nɛnya diangɔ dia kanga luudu, aha nanya ndoko ema, aha ntshɔ l’ahole wewɔ hawowaele ndo mbidja yimba dia ndo anawɔ sala ngasɔ. Naka akanga a mvudu wekɔ l’okakatanu ɔmɔtshi lo dikambo sɔ, vɔ la dia mbewoya esadi wanɛ wakamba olimu wa pangia anto, ko wayonga l’ɔngɛnɔngɛnɔ dia mbâkimanyiya. Ekimanyielo k’onto l’onto kekɔ ohomba di’olimu wa pangia anto kɛndakɛnda dimɛna. (Heb. 13:17) Takalongola alapɔlɔ ɔnɛ anto amɔtshi totshikaka luudu lakawawosha la panga aha la mbuta ko ntshɔ lo lokina lele ɔngɛnyi ande kana onto ɔmɔtshi leyana la nde. Dikambo sɔ futanyaka lotumu l’anangɛso wakamba olimu wa pangia anto. Sho nyɔlɔmbaka nyu tshɛ dia nyu mbisha lonya l’olimu ɔsɔ.
6 Esombe w’anto kana wanɛ wele la dikɔmɔ, ekambi wa lo tena tshɛ kana akina mbeyaka monga l’ohomba w’ekimanyielo dia vɔ monga l’assemblée. Wanɛ wôtɔ la wɔ, dikumanyi kana ase etshumanelo weya pâ yawɔ ya lânde kokaka sala kɛnɛ kahombama la ngandji tshɛ, koko aha kitsha ɔkɛndɛ awɔ tshɛ l’ahɛka w’anangɛso walɔngɔsɔla assemblée.—Enda lo 1 Timote 5:4.
7 Mɛtɛ Jehowa sukɛka kɛnɛ katshama lo dikambo dia nsanganya ya weke yasalema ɔnɔnyi l’ɔnɔnyi. Lam’ele anangɛso efula wamɔ oma lawakawɔ dia ntshɔ lo losanganya la distrikɛ tongaka l’ohomba wa mvudu ya panga, sho kokaka monga l’eshikikelo ɔnɛ Jehowa ayokotsha ehomba awɔ lo woho wakoka. Lam’ele akambo asɔ mendanaka la ɔtɛmwɛlɔ wa mɛtɛ, sho pombaka ndjela alako wotoshawɔ l’ɔngɛnɔngɛnɔ tshɛ. Tɛnya dia tekɔ la kɔlamelo lo kɛnɛ koleki tshitshɛ; ko tayonga la dikoka dia kondja ɛlɔlɔ efula wakongɛ wanɛ walangema le Jehowa.—Luka 16:10.
8 Tambonyokeketsha dia nyu ndjalɔngɔsɔla oma ko kakianɛ dia mbɔtɔ nshi yakɔ shato lo Losanganya la Distrikɛ 1999 “Ɔtɛkɛta w’Amvutshi wa Nzambi.” Sho tshɛ mbakongɛ l’asolo lokoloko dia nonga ‘waelo w’ɔngɛnɔngɛnɔ ndo esambu wa eokelo ka losaka’ wadja atɛmɔdi wa Jehowa wosangani kâmɛ. (Osam. 42:4) Jehowa atshɔkɔlɛ ɛlɔngɔswɛlɔ tshɛ wosalemi dia tɔngɔnya lo nyuma!
1. Naka wɛ pombaka ntsha lɔkɛndɔ l’otale dia tɔtɔ lo assemblée, kete tatɛ momba falanga ya lɔkɛndɔ layɛ wɛ la nkumbo kayɛ, ndo y’olelo anyu lɛkɔ.
2. Kanyokanyiya ndo dia sukɛ ɔlɔngɔswɛlɔ wa assemblée la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔ̂lɛmia la diangɔ dianyu di’oshinga wolo.’—Euh. 16:16; Tuk. 3:9.
3. Tayotombola lokombo la Jehowa nto lo monga la lɔkɛwɔ l’ɔlɔlɔ l’assemblée kamɛ ndo ɔlɔtɔ wa pudipudi ndo wa kɔmba.—1 Kor. 10:31.
4. Ntsha tshɛ dia kamba kâmɛ l’anangɛso wele l’ɔkɛndɛ wa nɔnga anto. Tolamake dihole tshanana, paka di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna. Mbo ya ndɛ ya wotsho mbishaka djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto katshake tshɛ dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ dia dikadja l’ahole wakalɔngɔsɔma dia mbikadjaka mindu.—1 Pet. 1:15, 16.
[Caption on page 3]
[Caption on page 3]
Ekongelo ka Wenya
Lushi la Tanu la la Samalo: 9 h 30 – 17 h 00
Lushi la Lomingu: 9 h 30 – 16 h 00
[Caption on page 5]
[Box on page 5]
Tɛdikɔ Tɔmɔtshi ta Mbɔsa dia Mbɔtɔ lo Losanganya la Distrikɛ “Ɔtɛkɛta w’Amvutshi wa Nzambi”