Totate Mbeka l’Anto Bible lo Biukubuku Katɔlɔmba
1 Alapɔlɔ w’oma l’andja w’otondo mɛnyaka ɔnɛ biukubuku Kakɔna Katɔlɔmba Nzambi? ekɔ ehomɔ ka dimɛna efula ka mbetsha anto mɛtɛ. Lomingu tshɛ, tekɔ lo tatɛ mbeka Bible la nunu di’anto lo biukubuku yakɔ. Onde wɛ totatɛka ndo tekaka l’anto Bible lo biukubuku Katɔlɔmba aha l’okakatanu?
2 Kânga mbele efula hawoke wolo mbisha onto biukubuku yakɔ, amɔtshi mbokaka wolo ndo haweye ka mbuta dia tatɛ mbeka l’onto. Naa toho takɛnyi anto amɔtshi ɔnɛ tekɔ dimɛna efula dia tatɛ mbeka l’anto Bible l’ekimanyielo ka biukubuku Katɔlɔmba na? Tokanyi tayela tɔnɛ tayotokimanyiya efula.
3 Towɛnya Woho Wekaso l’Anto: Etena kasawolaso l’onto mbala ka ntondo kana kawembolaso, l’ɔkɔngɔ wa sho mbɔ̂sɛngɔla dia mbeka la nde Bible, sho kokaka mbɛ̂nya woho wasalema wekelo akɔ. Dui sɔ ayokimanyiya anto efula wasawola la so dia vɔ minya ohokohoko l’ekiyanu w’anyanya watongaka lawɔ lam’okawɔ tshɛkɛta “mbeka.” Kam’ayotowɛnya, tayɛna dia ko mbɔtwɛlɔ kaso sho kokaka tatɛ mbeka la nde Bible.
4 Ndjalɔngɔsɔla Kele Okanga: Wangasanu wele laso dia tatɛ mbeka l’anto Bible ndjaka oma lo woho wakatayalɔngɔsɔdi dimɛna. Naka tayoyalɔngɔsɔlaka la ntondo kete hatotokandakandaka lo mbeka l’anto Bible. Naka tayovusolaka sawo diaso mbala ko mbala, kete tayoleka mbeya sawola l’anto ndo tayokokaka tɛkɛta woho wokotɔtɛkɛtaka l’ɛtɛkɛta aso shamɛ. Dui sɔ diayotokimanyiya di’aha sho didima ndo ngɛnyangɛnya ɔnɛ lasawola laso.
5 Ekɔ dimɛna mbɛdika wonya etena kahembayɛ sawo diayɛ woho wa wɛ totɛ ɔnɛ lasawola layɛ wenya engana wayoyɔsa dia mbɛ̂nya nganɛ wekaso Bible l’anto. Ɔnangɛso ɔmɔtshi akate l’ɔkɔngɔ wa nde ndjalowola ate: “Te kɛ̂nya woho wekaso l’anto Bible ofele. Mbiviyaka paka taahe totanu toto dia kɛ̂nya. Onde wɛ ekɔ la taahe totanu ta mbishami?” Sho koka mɛnya onto Wekelo 1 lo biukubuku Katɔlɔmba lo taahe totanu. Mɛtɛ, nyayadia paka avɛsa amɔtshi ato, koko naka nyu shidiya wekelo wa ntondo lo taahe tongana toto, onto akɔ ayokoka nembetɛ wekelo ande wa ntondo. L’ɔkɔngɔ ko wɛ mbotɛ ɔnɛ lam’ayoya dia nyu ndjeka Wekelo 2, nyayeka l’edja ka taahe 15 toto.
6 Sawo diayela nɛ mbeyaka monga dimɛna efula:
◼ “Te kɛ̂nya yoho mɔtshi ya wɔdu ya mbeka Bible esadi esadi la ngelo l’ekimanyielo ka biukubuku nyɛ: Kakɔna Katɔlɔmba Nzambi? Efula wambɛna dia lo mbekaka kânga taahe 15 toto lo lomingu, vɔ koka kondja ekadimwelo w’ɛlɔlɔ lo wembola ɛnɛ wa lo Bible w’ohomba efula l’ɔkɔngɔ wa mingu 16.” Ɛnyande, lo tshena pe, mɛsa w’awui wofundami. Fola lo Wekelo 1 ko wɛ mbuta wate: “Naka wɛ tosha taahe oko totanu, tayokɛnya nganɛ wasalema wekelo akɔ. Wekelo 1 wekɔ l’ɔtɛ a dui w’ɔnɛ: ‘Woho Wakokayɛ Mbeya Kɛnɛ Kakɔlɔmba Nzambi.’ ” Ma lâsɔ, adia wembola akɔ esato ko wɛ mbolembetshiya toshifidi tele lo tokombo. Adia odingɔ 1, ko wɛ mbɛ̂nya woho wa mbishola okadimwelo. Wɛ mbeyaka mbɔ̂lɔmba dia nde mbadia odingɔ 2. Ko wɛ ndjota ɔnɛ: “Ngande wokokiyɛ kadimula lo dimbola sɔ lo ndjela kɛnɛ kâdjishayɛ? [Adia dimbola nto, ko wɛ mbôtshika dia nde kadimula.] Wɛ ayɛna dia avɛsa w’oma lo Bible wekɔ l’odingɔ l’odingɔ. Vɔ tɛnyaka okadimwelo washa Bible lo wembola akɔ. Ɛnyɛlɔ, ɛsɔ tadia 2 Timote 3:16, 17 kele tênde kana diɔ sukɛka okadimwelo wakayasha lo kɛnɛ kendana la kiɔkɔ ya Bible.” L’ɔkɔngɔ a mbadia odingɔ 3, oka dimbola, ndo nyadia Joani 17:3, vusola wekelo 1 dia kotola yambalo yande lo ewo kamondokondja. Lâsɔ ko wɛ mbifola Wekelo 2 ndo mbadia dimbola dia ndjihelo, “Naa weoho ehende watokimanyiya dia sho mbeka akambo wa Nzambi?” L’ɔkɔngɔ ko wɛ mombola ɔnɛ: “Etena kakɔna kayokondja kânga taahe 15 dia sho ndjêka Wekelo 2 dia mbeya okadimwelo wa dimbola sɔ na?”
7 Ekɔ ohomba efula sawola l’ɛtɛkɛta wa wɔdu ndo mandola ɔnɛ lasawola laso naka kokaka. Lam’awotɛyɛ dia ndjowembola, towombolake ɔnɛ kana nde nangaka nyu tetemala. Keketshande tsho dia nde ntsha woho akɔ wamɛ la wekelo okina wayela. Ewoyande dia wɛ ayokalola esadi dia ndjowenda. Apandjudi amɔtshi wakasɛngɔla anto dia mbeka la wɔ wekelo ɔtɔi lo telefɔnɛ etena kakinde wolo dia mbishana radevu. Wɛ mbeyaka keketsha ombeki nto dia nde momba biukubuku yande lo dihole di’ɔlɔlɔ woho wa nde ndjoyiɛna esadi lam’ayoyowenda mbala kekina.
8 Onga l’Etete: Kânga mbele ndjalɔngɔsɔla kele okanga, sho pombaka monga l’etete. Ndakanya onto wekelo w’otondo lo taahe tongana toto kema dikambo dia tshitshɛ, omalɔkɔ onga l’etete dia mbekaka asawo tena tshɛ woho wa wɛ mongaka la lolemi l’ɔsɛlɔ wonya walakanyayɛ onto woho wekawɔ. Hemba mɛnya onto tshɛ lahomana la yɛ lo soko, l’ɔsɛsɛ, ndo lo telefɔnɛ woho wekaso. Naka wɛ hakondja anto wa mbetsha Bible, tɔlɛmbake. Dia wɛ tatɛ mbeka Bible l’anto, onga l’etete ndo la saki k’oma ka tshina di’otema ka mbetsha akina mɛtɛ.—Ngal. 6:9.
9 Naka wɛ kamba l’alako asɔ, kete wɛ lawɔ mbeyaka monga la diɛsɛ dia kimanyiya onto ɔmɔtshi tsha lo mboka ka lɔsɛnɔ, lo tatɛ ndo mbeka la nde Bible lo biukubuku Katɔlɔmba.—Mat. 7:14.