Ayoyotɛ ose Hindu na?
1 Oko wakokayɛ dieya, waa Hindu wekɔ lo sɛna lo wedja efula, ndo kânga lo wodja aso ɔnɛ. Lâsɔ lushi lɔmɔtshi wɛ mbeyaka pomana la waa Hindu l’olimu ayɛ w’esambishelo. Ko naka nyambohomana, ngande wayoyôsambisha na?
2 Ohɔ akambo anɛ: Waa misiɔnɛrɛ wanɛ wakatondoya dia sambisha waa Hindu mbutaka ɔnɛ dia mbâsambisha, kema ohomba wa paka mbeka efula dia mbeya lɔsɛnɔ la wetshelo wa l’ɔtɛmwɛlɔ wa Hindu kɔnɔmɔ. Mbala efula, vɔ tetawɔka losango laso naka sho mbasambisha tsho la yewo ndo l’ɛtɛkɛta wa wɔdu. Naka wɛ ambokoma lo lokombo lɔmɔtshi, ona dia sawola ntondotondo la kanga ngelo. Naka nde ambetawɔ, kete aya bu wolo sambisha ase nkumbo akina. Lam’atatɛyɛ mbosambisha, ewɔ dia mbotɛ ɔnɛ lekɔ lo ndjakɛmbɛ losango loleki tshɛ dimɛna, ndeka ndo wetshelo wetawɔ ase nkumbo kanyu, kana ɔnɛ dimi nangaka sawola la yɛ lo kɛnɛ kendana la Nzambi kâmɛ ka mɛtɛ kana lo dikambo di’efundelo w’ekila woleki edja. Lam’ele waa Hindu efula mbɔsaka Bible oko dibuku di’Ase Mputu, wɛ mbeyaka minya tokanyi ta kɔlɔ tele lawɔ lo mbalembetshiya ɔnɛ Bible hetawɔ kanyi y’anto amɔtshi mbɔsaka ase wedja ekina oko fumbe yawɔ kana ɔnɛ anto wa lokoho lɔmɔtshi la demba ndeka anto wa woho okina.
3 Kamba la dihomɔ di’ɔlɔlɔ: Tobukubuku tohende takalɔngɔswama dikambo dia waa Hindu. Tobukubuku takɔ tɔ tɔnɛ: Pourquoi adorer Dieu en amour et en vérité ? la Nos problèmes — Qui nous aidera à les resoudre ? Tobukubuku takɔ tohende tanemaka lo Falase. Tobukubuku tɔnɛ: ‘Enda! Dimi Leetɛ Diangɔ Tshɛ Eyoyo’ la Onde na Nzambi tokanɛka mɛtɛ ondo? tekɔ nto dimɛna efula wonya wasambishaso waa Hindu. Sho kokaka kamba dimɛna la biukubuku Katɔlɔmba la dibuku Ewo dia mbeka l’anto Bible.
4 Nyotongi kanyi yâmɛ: Kema wolo dia monga kanyi yâmɛ la waa Hindu. Vɔ mbetawɔka dia tekɔ lo sɛna l’etena kɛnɛ kele akambo wa kɔlɔ wambokoma lo kondoko ndo ɔnɛ Nzambi ayanga mbela elanyelo ka woke dia minya ekakantanu tshɛ wa l’andja ɔnɛ; oma lâsɔ kete eleko k’akambo wa mɛtɛ kambotatɛ. Wɛ kokaka mɛna esadi eto di’akambo asɔ kokaka mbɔtɔnɛ la kɛnɛ ketsha Bible lo dikambo dia nshi y’ekomelo, fɔnu ka woke ndo lo dikambo di’andja w’oyoyo wayaye. Lam’ele waa Hindu efula mbɔsaka dia lɔsɛnɔ lekɔ l’ekakatanu wahakokaki nshila, vɔ ndjashaka l’awui anɛ wendana la lɔsɛnɔ la nkumbo, awui wa ngala, awui wendana la lotui tshitshi ndo nganɛ wayalaso lam’avɔso. Toho tohende takokaso pemba dia sambisha anto asɔ tɔ tɔnɛ:
5 Dikambo nɛ kokaka ngɛnyangɛnya ombotshi a pami.
◼ “Dimi lekɔ lo tasawola l’anto wayakiyanya dikambo dia lɔsɛnɔ la nkumbo lo wedja efula ɛlɔ kɛnɛ. Oko le yɛ, kakɔna kakoka kimanyiya ase nkumbo dia vɔ monga kâmɛ? [Tshikande akadimole.] Anto amɔtshi mbeyaka kɛnɛ kata efundelo wa waa Hindu lo dikambo dia nkumbo, koko ndoko lushi lambowokondja diaaso dia mbɛdika dikambo sɔ la kɛnɛ kata Bible. Dimi nangaka sho menda kɛnɛ kata Kolosai 3:12-14.” L’ɔkɔngɔ wa nyu mbadia divɛsa sɔ, ɛnyande tshapita 15 ya dibuku Ewo ndo tɛnde wate: “Layolanga mbɔsa taahe tongana toto dia mbadia tshapita nyɛ dimi la yɛ.”
6 Naka ɔlɔngɔlɔngɔ kete nde mbeyaka mbetawɔ kanyi nyɛ:
◼ “Aha la tamu, wɛ mbetawɔka ɔnɛ Nzambi ekɔ. Oko le yɛ, Nzambi asangoyande lo dikambo diaso?” Tshikande akadimole. L’ɔkɔngɔ ko wɛ ndjadia Etatelu 1:28 ndo mbuta wate: “L’ahole efula, anto wekɔ lo mɔtana lɔmɔtana ndo wekɔ l’ekakatanu woho w’anyanya. Onde wɛ fɔnyaka di’Otungi ayetawɔ tokimanyiya dia sho kandola ekakatanu aso?” L’ɔkɔngɔ wa nde kadimola, wɛ mbeyaka tshɔ la nde lo dibuku dimɔtshi diɛnɛ dimɛna.
7 Tayokondja etombelo w’ɛlɔlɔ: Ose Hindu ɔmɔtshi lele l’ɛnɔnyi 22 akaye oya le kadiyɛso kɛmɔtshi kakasambishaka lo lobingu ko nde la nde ate dimi nangaka mbeka Bible. Nde akatɛ kadiyɛso ate, ambeta ɛnɔnyi enanɛi wakamakoke wɛ asawola la mama akambo wa lo Bible. Kânga mbakandambe heyama lo mboka ekadimwelo washa Bible lo dikambo di’ekakatanu wahomana l’anto, nyango kondjasha l’akambo asɔ, koko lam’ele l’etena kɛsɔ ko ɔlɔngɔ ɔsɔ êke tshitshɛ efula, aki wolo nde mbɔsa yɛdikɔ ya ndjela akambo wa mɛtɛ. Koko kakianɛ, oko wayande opalanga, nde nangaka mbeya akambo efula. Ɔlɔngɔlɔngɔ ɔsɔ kombetsha wenya. L’ɔkɔngɔ wa nshi 23 tsho, nde akashidiya mbeka dibuku Ewo. Ngɔndɔ nyɛi l’ɔkɔngɔ wa nde pomana la kadiyɛso lo lobingu, nde akalɔmbɛ dia nde batizama!
8 Ɔnangɛso ɔmɔtshi akamɛ mbeka l’Ose Hindu ɔmɔtshi lakatatshɔka lawɔ lo kawolo. Pami kɛsɔ aki l’ekakatanu wa mamba l’asande la wadiɛnde. Ndo nto, nde aki omunga wa wanu. Pami kɛsɔ aketawɔ di’ɔnangɛso ndja ndjowenda ndo vɔ ndjɔkɛtshanya kɛnɛ kata Bible lo dikambo dia lɔsɛnɔ la lo nkumbo. Wetshelo wa lo Bible wendana la lɔkɛwɔ l’ɔlɔlɔ akɔngɛnyangɛnya efula ko nde aketawɔ mbeka Bible. Nde la nkumbo kande wakatatɛ ndja lo nsanganya. L’ɔkɔngɔ diko, vɔ wakamɛ sambisha angɛnyi l’ewotɔ awɔ akambo wa mɛtɛ. Ɛlɔ kɛnɛ, asamalo l’atei w’angɛnyi l’ewotɔ awɔ ɛsɔ wakayetawɔka akambo wa mɛtɛ!
9 Nzambi nangaka dia ‘weho w’anto tshɛ shimbamela ndo koma l’ewo k’oshika k’akambo wa mɛtɛ.’ (1 Tim. 2:4) Lo weho w’anto asɔ mbele ndo apami la wamato wele bu l’ɔtɛmwɛlɔ w’Akristo, ɛnyɛlɔ oko waa Hindu. Naka waa Hindu wekɔ lo ɛtshi kanyu ka nkɛtɛ, bonde kahayatshu aha la tshimbatshimba dia towaenda ko wɛ kamba l’alako wa lo sawo nɛ na?