Ekadimwelo lo wembola anyu

◼ Onde wɛ amboyalɔngɔsɔlaka lo dikambo dimɔtshi dia wanyandja?

L’andja wa nshi nyɛ ɔnɛ, ‘tena l’akambo wa shashimoya’ tokomɛka ko mbelaka akambo wa wanyandja wendana la lopitadi, ndo watototshutshuyaka dia paka mbidja dikila. (Und. 9:11) Dia sho ndjâlɔngɔsɔla dimɛna lo woho wa dikambo dia ngasɔ diakoka tokomɛ, Jehowa tokimanyiyaka lo weho efula oma lo tshimbo y’ɔlɔngɔswamelo ande, koko nde tɔlɔmbaka di’aha sho kɔma anya ko mendɛka tshɛ oma le nde. Awui woshilami l’ɛse anɛ wayokokimanyiya:

• Ɛngɔlaka la Instructions médicales/Attestation wonya tshɛ.

• Yâshikikɛ di’anayɛ mɛngɔlaka la Carte d’identité.

• Vusola awui wele lo dikatshi di’okotsha di’Olimu Aso wa Diolelo wa Ngɔndɔ ka 1992, kele lembetɛ woho akɔna wakokayɛ kana yimba la dɔkɔtɛlɛ kana la shushi lo kɛnɛ kendana l’esakelo kahomba nongola ɔnayɛ.

• Vusola asawo wendana la weho ekina w’ekanga wakoka kaloya dikila. (Enda asawo akɔ lo: Tshoto y’Etangelo, ya Ngɔndɔ ka Dikumi 1, 1994, lɛkɛ 31; Ngɔndɔ ka Samalo 1, 1990, lɛkɛ 30-1; Ngɔndɔ ka Sato 1, 1989, lɛkɛ 30-1; Réveillez-vous !, wa Ngɔndɔ ka Dikumi l’Ahende 8, 1994, lɛkɛ 23-7; Ngɔndɔ k’Enanɛi 8, 1993, lɛkɛ 22-5; Ngɔndɔ ka Dikumi l’Ɔtɔi 22, 1991, lɛkɛ 10; ndo lo dikatshi di’okotsha di’Olimu Aso wa Diolelo wa Ngɔndɔ ka Divwa 1992 la wa Ngɔndɔ ka Dikumi l’Ɔtɔi 1990. Ombawɔ lo dihole dia suke di’aha wɛ ndjohekɔ nyanga wonya wa dikambo.)

• Ɔsa tɛdikɔ oma k’ɛse otema dia kana wɛ ayolanga vɔ kamba la mashinyi watondjawɔ dikila l’andja wa demba ko dikaloya aha la diomba, ko kana wɛ ayetawɔ vɔ kokaloya ashi wele paka la tovitaminɛ takawɔshi oma lo dikila.

• La ntondo ka wɛ ntshɔ lo lopitadi, sala tshɛ dia tewoyisha dikumanyi dia vɔ mbeya woho wokokiwɔ kokimanyiya kana kɛnyanya la Comité de liaison hospitalier (CLH) naka ekɔ ohomba. Naka ɔna dikɛnda kele la hemɔ, kete lɔmba dikumanyi dia vɔ tewoyisha CLH la ntondo.

Ɛnya hwe dia wɛ halange dikila: Alapɔlɔ walongolaso mɛnyaka di’anangɛso l’akadiyɛso amɔtshi tokongɛka paka dikambo diopeta ko ndjotɛ dɔkɔtɛlɛ ɔnɛ sho hatolange kaloya dikila. Dikambo sɔ tokiyanyaka wanɛ watosakɛ ndo shamamɛ ndjadjaka lo wâle wa kaloyama dikila. Naka adɔkɔtɛlɛ mbeya dia tokanyi tayɛ la kɛnɛ kalangɛ shikikɛma lo mikanda ɛmɔtshi wakayake lohita wɛnya kɛnɛ kalangayɛ vɔ kosalɛ, kete dui sɔ diayowakimanyiya dia vɔ kosakɛ aha la mbetsha wenya ndo di’aha kodja dikila.

Lam’ele dikambo dimɔtshi dia wanyandja diendana la lopitadi kokaka kokomɛ, mbala efula, etena kahayadilongamɛ, wɛ pombaka mbɔsa tɛdikɔ oma ko kakianɛ dia wɛ ndjâkokɛ ndo kokɛ anayɛ lo kɛnɛ kendana l’okaloyelo wa dikila.​—⁠Tuk. 16:20; 22:⁠3.