Ekadimwelo wa wembola anyu

◼ Onde ekɔ ɔlɔlɔ mbuda nsaka wonya wewoyawɔ okaloyamelo w’onto l’atei w’etshumanelo?

Lo ngandji kande, Jehowa Nzambi akalɔngɔsɔla l’atei w’Afundelo kɛnɛ kakoka kanga kɔlɔ layatshumoya sala dia kondja ekimanyielo kande ndo kalola l’atei w’etshumanelo k’Akristo. (Osam. 51:​12, 17) Lam’akaloyamawɔ, sho keketshamaka dia shikikɛ ngandji kaso le weho w’anto wa ngasɔ wayatshumoya l’otema ɔtɔi. ​—⁠2 Kor. 2:​6-8.

Koko, kânga mbeso l’ɔngɛnɔngɛnɔ lam’akaloyama onto ɔmɔtshi lotɔ laso kana leyaso dimɛna, ki koludi la dilɛmiɛlɔ tshɛ pombaka monga wonya wewoyawɔ okaloyamelo w’onto l’atei w’etshumanelo. Tshoto y’Etangelo ya Ngɔndɔ ka Dikumi 1, 1998, lɛkɛ 27, yakatɛkɛta dia dikambo sɔ ɔnɛ: “Koko, tatôhɛke ɔnɛ ase etshumanelo efula haweye kɛnɛ kakakonya onto dia mbitshanyema kana kaloyama l’etshumanelo. Lâdiko dia lâsɔ, mbeyaka monga k’anto amɔtshi wakanyange efula​—⁠ondo l’edja ka nshi efula​—⁠oma lo kɔlɔ kakatshe onto lamboyatshumoya. Omalɔkɔ, naka wɛ mbeyaka akambo asɔ wakete kana asolo ayɛ wakakɛtɛ wolo, ko wambosha diewoyelo ɔnɛ kapanda ambokaloyama l’etshumanelo, mbokɛmaka mɛtɛ di’ondo wɛ mbeyaka mɛna wolo mbolongola nto osangɔ akɔ wâmɛ l’anto akina, paka kana wɛ kôlungudi lo woshɛshɛ.”

Kânga mbele tekɔ l’ɔlɔ efula dia mɛna onto ɔmɔtshi ambokaloyama l’atei w’etshumanelo, kema ɔlɔlɔ mbuda nsaka wonya watawɔ ɔnɛ nde ambokaloyama.