Tosha Jehowa Kɛnɛ Koleki Ɔlɔlɔ le So
1 Ɔlɛmbɛ wakasha Jehowa ase Isariyɛlɛ akɛnyaka dia nyama yakawolambolaka yakahombaka monga ‘aha la ɛkɔmɔ.’ Nyama kaki l’ɛkɔmɔ kombetawɔmaka. (Lew. 22:18-20; Mal. 1:6-9) Lâdiko dia lâsɔ, lam’akalambɔmaka olambo, wata tshɛ, mbut’ate etenyi koleki ɔlɔlɔ ka lo nyama, kaki ka Jehowa. (Lew. 3:14-16) Oko wakinde She Isariyɛlɛ ndo Owandji awɔ wa Woke, Jehowa akakokaka nongola kɛnɛ koleki ɔlɔlɔ.
2 Oko wakidiɔ lo nshi y’edjedja, Nzambi ngɛnangɛnaka efula la elambo w’ɔlɔlɔ wolambolaso ɛlɔ kɛnɛ. Olimu aso la dia mɛnya wɔma wɔsɔhanyemi la dilɛmiɛlɔ wele laso otsha le Jehowa. Lo mɛtɛ, onto l’onto ekɔ l’ekakatanu ande. Koko, tekɔ l’ɔkɔkɔ w’ɔlɔlɔ wa ndjasɛdingola dia ndjashikikɛ dia tekɔ lo mbosha kɛnɛ koleki ɔlɔlɔ.—Ef. 5:10.
3 Olimu wa l’Otema Ɔtɔi: Di’olimu aso tombola Jehowa ndo munanda etema w’ampokami aso, vɔ hawohombe monga wa lâdiko di’ɛlɔmɔ. Kɛnɛ katatate lo dikambo dia Nzambi kaso ndo k’asangwelo ande wa weke pombaka ndja oma l’etema woludi tɔɔ la lowando. (Osam. 145:7) Kɛsɔ tɔtɔmiyaka ohomba wa monga l’ekongelo k’ɔlɔlɔ ka wadielo ndo ka wekelo wa Bible w’onto ndamɛ.—Tuk. 15:28.
4 Mbisha Jehowa kɛnɛ koleki ɔlɔlɔ nembetshiyaka nto mbokoya ngandji kende latɔ otsha le anto. (Ef. 5:1, 2) Ngandji kaso otsha le anto kayototshutshuya dia sambisha anto efula losango l’akambo wa mɛtɛ washa lɔsɛnɔ. (Mako 6:34) Tɔ totshutshuyaka dia ndjasha le wanɛ wakasawola la so. Tɔ totshutshuyaka dia kanyiya dikambo diawɔ l’ɔkɔngɔ wa sawo diaso dia mbala ka ntondo ndo tshɔ towaenda aha la tshimbatshimba. Tɔ totshutshuyaka dia sala kɛnɛ tshɛ kakokaso sala dia mbakimanyiya dia vɔ pama lo nyuma.—Etsha 20:24; 26:28, 29.
5 ‘Olambo wa Lotombo’: Yoho kina yashaso Jehowa kɛnɛ koleki ɔlɔlɔ le so ele oma l’ohetoheto aso l’olimu w’esambishelo. Naka sho ndjakongɛ dimɛna ndo mbika washo l’olimu aso, kete tayokoka sala kɛnɛ koleki ɔlɔlɔ l’etena kele laso. (1 Tim. 4:10) Ndjalɔngɔsɔla dimɛna tokimanyiaka dia tɛkɛta awui wokɛma hwe ndo l’eshikikelo, lo yoho shɔ mbakoka onto mbetawɔ losango laso esadi eto. (Tuk. 16:21) Lam’asambishaso anto akina lokumu l’ɔlɔlɔ, ɛtɛkɛta aso w’oma k’ɛse otema kokaka mbelamɛ ɔnɛ ‘olambo wa lotombo.’—Heb. 13:15.