Tokoya Ombetsha wa Woke etena kakambaso la dibuku Bible etshatɔ

1. Ngande waketshaka Yeso?

¹ Mbala tshɛ, Yeso Ombetsha wa Woke akalembetshiyaka awui lo yoho ya wɔdu ndo yokɛma hwe. Dia kimanyiya ampokami ande dia vɔ kana yimba, ntondotondo nde akawambolaka mbala efula kanyi yawɔ. (Mat. 17:24-27) Nde akakotolaka yambalo yawɔ lo Ɔtɛkɛta wa Nzambi. (Mat. 26:31; Mako 7:6) La yewo tshɛ nde kombetshaka ambeki ande awui efula wamboleka, nɛ dia nde akeyaka dia vɔ wayotetemalaka mbeka. (Joa. 16:12) Yeso akayakiyanyaka nto dia mbeya kana ambeki ande waketawɔka ndo wakashihodiaka kɛnɛ kakandawaetshaka. (Mat. 13:51) Dibuku Bible etshatɔ diakatondjama dia tokimanyiya lo dikambo sɔ.

2. Lo toho takɔna takokaso kamba la ambola wa mbɔtwɛlɔ wa tshapita tshɛ?

² Ambola wa mbɔtwɛlɔ: Etena katatɛnyu mbeka tshapita mɔtshi, ekɔ dimɛna kotola yambalo y’ombeki lo ambola wa mbɔtwɛlɔ wele l’ɛse k’ɔtɛ a dui wa tshapita. Oka ambola lo yoho yalɔmba ombeki dia nde kadimola l’otema dia nomialomia nsaki kande. Kana wɛ kokaka mbɔlɔmba dia nde mbisha okadimwelo wa lo tshena pe wa ambola akɔ. Kema ohomba mbetsha wenya efula lo ekadimwelo woshande kana dia mingola oseka dui tshɛ diahandakadimodi dimɛna. Wɛ mbeyaka mbosha losaka loto lo kanyi yotshinde ko nyu tatɛ wekelo. Ekadimwelo woshande lo ambola wa mbɔtwɛlɔ wayokokimanyiya dia wɛ mbeya kana ayonga ohomba wɛ ndeka mbidja yimba lo etenyi kɛmɔtshi ka wekelo.

3. Ngande wakokaso mbetɛ wekelo wɔdu?

³ Afundelo: Wekelo pombaka tomba oma lo Afundelo. (Heb. 4:12) Koko, kema ohomba mbadia oseka divɛsa tshɛ dioshilami. Tɔtɔmiya avɛsa wasukɛ dietawɔ diaso. Kema ohomba mbadia avɛsa washa elembetshiyelo wa lâdiko. Dibuku Bible etshatɔ nembetshiyaka akambo wa mɛtɛ lo yoho ya wɔdu. Etɛ wekelo wɔdu. Tɔtɔmiya awui woleki ohomba ndo ewɔ dia tɛkɛtaka efula lo awui wele bu ohomba efula kana mbidja awui wele kema lo wekelo tshanana.

4. Kakɔna kashikikɛ dia kana sho pombaka sɛdingola awui wele l’okotsha wonya wa wekelo?

⁴ Okotsha: Okotsha wekɔ la ɛtɛ w’awui 14 lâdiko w’awui wele lo wekelo. Hawotshi ɔnɛ paka kɛtshanya awui wa l’okotsha wonya wa wekelo. Lo ɛtɛ w’awui ɛmɔtshi, wɛ mbeyaka keketsha ombeki ayɛ wa Bible dia nde tadia awui wa l’okotsha ndamɛ, djekoleko naka nde shihodiaka ndo mbetawɔka awui wele lo wekelo. Ɛnyɛlɔ, naka ombeki mbetawɔka dia Yeso ekɔ Mɛsiya, mbeyaka monga ko kema ohomba sɛdingola la nde okotsha wata ɔnɛ: “Yeso Kristo kele Mɛsiya wakalakema,” etena kakɛtshanyanyu tshapita 4 yata ɔnɛ: “Ele Yeso Kristo?” Lo waaso akina, mbeyaka monga ohomba mbɔsa yema y’etena wonya wa wekelo dia sɛdingola okotsha kana etenyi kɛmɔtshi k’okotsha akɔ.

5. Naka tambɛna ɔlɔlɔ sɛdingola awui wele l’okotsha, ngande wakokaso sala dui sɔ?

⁵ Naka wɛ ambɛna ɔlɔlɔ dia nyu kɛtshanya awui wele l’okotsha, kete wɛ pombaka nɔngɔsɔla ambola la ntondo ndo sɛdingola edingɔ kâmɛ la ombeki woho watonyɔsɛdingolaka awui wa lo tshapita. Kana wɛ mbeyaka mɛna ɔlɔlɔ dia mbɔsaka minitɛ ngana wonya wa wekelo dia mvusola awui akɔ kâmɛ la ombeki lo ndjela ehomba ande. Dui sɔ diayokoshikikɛ dia kana nde shihodiaka awui wende lo mbadia ndamɛ.

6. Ngande wakokaso kamba la kiombo y’ovuswelo yele lo ekomelo ka tshapita tshɛ?

⁶ Kiombo y’ovuswelo: Kiombo yele l’ekomelo ka tshapita tshɛ kadimolaka mbala efula lo ambola wa mbɔtwɛlɔ. Wɛ koka kamba la awui akɔ dia mvusola awui woleki ohomba wa lo tshapita yakɔ. Apandjudi amɔtshi wakɛnyi di’ekɔ ohomba efula mbadia etelo tshɛ ndo mbadia avɛsa wele lâwɔ kâmɛ la ombeki. Oma lâsɔ, ko vɔ mimbola ombeki dia nde nembetshiya lo tshena pe woho wasukɛ avɛsa kɛnɛ kotami. Dui sɔ kimanyiyaka ombetsha dia nde mbeya kana ombeki shihodiaka awui woleki ohomba wa lo wekelo, woho wasukɛ Bible awui akɔ ndo kana nde mbaetawɔka. Dui sɔ mbetshaka nto ombeki woho wa nde kamba la Bible dia nembetshiyaka anto akina akambo wa mɛtɛ.

7. Ngande wakokaso kamba la dibuku Bible etshatɔ dia kotsha ɔkɛndɛ aso?

⁷ Yoho yoleki dimɛna ya kotsha ɔkɛndɛ aso wa mbetsha anto ndo mbaetɛ ambeki ele mbokoya toho ta wetshelo taki Yeso. (Mat. 28:19, 20) Dibuku Bible etshatɔ koka tokimanyiya dia sho sala dui sɔ. Tokambe dimɛna la kiombo y’ovuswelo dia mbetsha anto akina akambo wa mɛtɛ lo yoho ya wɔdu ndo ya dimɛna.