Tokambe dimɛna la wenya aso l’esambishelo
1 Tekɔ mɛtɛ la olimu efula wa sala l’esambishelo, koko etena kambotshikala kaya yema tshitshɛ. (Joa. 4:35; 1 Kor. 7:29) Naka sho takonge akambo la ntondo ndo ndjalɔngɔsɔlaka dimɛna, kete sho kokaka kamba dimɛna la wenya wakatakongɛ dikambo dia esambishelo.
2 Toyalɔngɔsɔlake: La ntondo ka sho ntshɔ lo losanganya l’otsha l’olimu w’esambishelo, toyashikikɛ dia tekɔ la ekanda wayotonga laso ohomba ndo takalɔngɔsɔdi mbɔtwɛlɔ dimɛna. Kam’akomiyawɔ losanganya la dɔmbɛlɔ, nyotshu mbala kakɔ ɔtɔi l’esambishelo. Sala ngasɔ ayonyokimanyiya dia nyu kamba efula lo wenya wakanyakonge dikambo dia esambishelo.
3 Naka dikumanyi wambokɔsɔna dia nɔmbɔla losanganya l’otsha l’olimu w’esambishelo, kete wɛ pombaka tatɛ la wonya. Sala losanganya lo tshena pe, mbuta ate aha ndekanya minitɛ 10 kana 15. La ntondo ka anto tshɛ ntshɔ, yashikikɛ dia onto tshɛ mbeyaka dihole diatandatshu dia tosambisha ndo onto lahomba sambisha la nde.
4 Etena kenyu l’esambishelo: Kama washila losanganya l’otsha l’olimu w’esambishelo, tanyemalake wemalemala, koko nyotshu mbala kakɔ ɔtɔi lo ɛtshi kanyu ka nkɛtɛ. Naka wɛ mɛnaka dia wɛ ayokalola oma l’ɛtshi kanyu ka nkɛtɛ esadi, kete ondo wɛ kokaka talɔngɔsɔdi dikuta dia tofuta mutuka diaha anto akina wa l’olui anyu kalola esadi l’ɔtɛ ayɛ. Etena kasambishanyu l’olui, kanɛ anto akina wakokonga dia wɛ shidiya ɔtɛkɛta. La yewo tshɛ wɛ mbeyaka tshika onto lalanga mbidja tâmu kana wɛ mbeyaka nɔngɔsɔla woho wa ndjokalola lushi lokina le onto lɛnyisha nsaki.—Mat. 10:11.
5 Etena kasalayɛ waendelo w’eyoyo, wɛ kokaka mbewɔ weteto w’anyanya lo membola ntondo anto wa lo lɛkɛ ɔtɔi ko l’ɔkɔngɔ ndjotshɔ lo lɛkɛ lokina. Wɛ mbeyaka mbelɛ anto amɔtshi walangayɛ tembola lo telefɔnɛ dia ndjashikikɛ dia wayonga la ngelo. (Tuk. 21:5) Naka wɛ ambokongɛ dia toviya lo wendelo ɔmɔtshi, kete anto akina wa l’olui anyu kokaka sambisha lo ahole akina wele suke la lawɔ kana sala waendelo w’eyoyo ekina.
6 Tekɔ lo nsɛna l’etena ka dinela dia woke dia lo nyuma. (Mat. 9:37, 38) Kem’edja olimu akɔ wayanga komɛ. Omalɔkɔ, sho pombaka monga la nsaki ka kamba dimɛna la wenya aso etena keso l’esambishelo.