Woho wa kamba la dibuku ‘Ngandji ka Nzambi’ dia nɔmbɔla wekelo wa Bible
1. Naa oyango wa dibuku ‘Ngandji ka Nzambi’?
1 Taki mɛtɛ l’ɔngɛnɔngɛnɔ dia nongola dibuku ‘Nyotshikale lo ngandji ka Nzambi’ lo Losanganya la distrikɛ laki l’ɔtɛ a dui ɔnɛ: “Nyuma kaki Nzambi kekɔ lo tɔlɔmbɔla.” Oko wakadiewoyama, dibuku sɔ diekɔ l’oyango wa tokimanyiya dia sho mbeya ndo nanga ɛlɛmbɛ waki Jehowa wendana la lɔkɛwɔ, koko aha dia tetsha wetshelo w’etatelo wa lo Bible. Hatotokahɛka anto dibuku sɔ lo esambishelo ka soko la soko.
2. Ngande wayotokamba la dibuku ‘Ngandji ka Nzambi,’ ndo le waa na?
2 Tayokambaka la dibuku sɔ oko okanda wa hende dia mbekaka la anto Bible l’ɔkɔngɔ wa vɔ shidiya dibuku Bible etshatɔ. Tatohɛke dia anto pamaka lo nyuma lo toho totshikitanyi. Sho pombaka mbeka l’onto l’onto lo yɛdikɔ yɛdimi l’akoka ande. Sho pombaka ndjashikikɛ dia ombeki ekɔ lo shihodia awui wekaso. Mbala efula, hatohombe kamba la dibuku sɔ dia mbeka l’anto wamboshilaka mbeka abuku akina koko hawɔtɔ lo nsanganya ya l’etshumanelo ndo mɛnamaka dia hawolange mbɔtɔnganyiya nsɛnɔ yawɔ la akambo wa mɛtɛ wa lo Bible wekawɔ.
3. Kakɔna kahombaso sala naka tekɔ lo mbeka l’onto lo dibuku Tɛmɔla Nzambi nshi nyɛ?
3 Naka wɛ ekɔ lo mbeka l’onto lo dibuku Tɛmɔla Nzambi ndo nyaya lo totshapita t’ekomelo, kete wɛ mbeyaka mbɔsa yɛdikɔ ya shidiya dibuku diakɔ ko keketsha ombeki dia ndamɛ mbadia dibuku ‘Ngandji ka Nzambi.’ Lo wedi okina, ayoleka dimɛna nyu tatɛ mbeka dibuku di’oyoyo sɔ oma l’etatelo. Oko wediɔ lo dikambo dia dibuku Bible etshatɔ, opandjudi ndamɛ mbɔsa yɛdikɔ ya kana ekɔ ohomba sɛdingola l’ombeki awui wa lo okotsha.
4. Kakɔna kahombaso sala naka ombeki ambobatizama la ntondo ka nde shidiya mbeka dibuku Bible etshatɔ kana ‘Ngandji ka Nzambi’?
4 Naka ombeki ambobatizama la ntondo ka nde shidiya dibuku Bible etshatɔ kana ‘Ngandji ka Nzambi,’ kete nyu pombaka tetemala mbeka polo lam’ayonyoshidiya abuku akɔ. Kânga naka ombeki ambobatizama, onto lalɔmbɔla wekelo kokaka mbadia wenya, waendelo w’eyoyo ndo mbâdia oko ombeki. Opandjudi watshindɛ ɔnɛ lalɔmbɔla wekelo ndo lasha kɔmatɛrɛ kokaka nto mbadia wenya.
5. Ngande wakokaso kamba la dibuku ‘Ngandji ka Nzambi’ dia kimanyiya anto wambɔla lo nyuma ndo wahayosambisha?
5 Naka ekumanyi kɛmɔtshi ka lo Kɔmite k’olimu ka l’etshumanelo ambokosha ɔkɛndɛ wa mbeka Bible la onto ɔmɔtshi lambɔla lo nyuma ndo lahayosambisha, kete mbeyaka monga ohomba dia wɛ sɛdingola la nde totshapita tɔmɔtshi ta lo dibuku ‘Ngandji ka Nzambi.’ Wekelo wa ngasɔ hahombe mbɔsa etena k’otale. Ande ehomɔ ka dimɛna efula kambotokondja katokimanyiya dia sho tshikala lo ‘ngandji ka Nzambi’ lee!—Jude 21.